འཇར་པན་གྱི་ཡེ་ཐེན་ཅཱ་ཡན་ནེ་ཀི་གསར་བས་ཚེས་བཞི་ཉིན་གྱི་དགོང་མོར་ནེ་ཀིའི་གྲོས་ཚོགས་ཐོག་མ་བསྡུས་ཏེ།ནེ་ཀི་གསར་བའི་སྲིད་སྐྱོང་བྱེད་ཕྱོགས་གཏན་འཁེལ་བྱས་ནས།སྤྱི་ཚོགས་འགན་སྲུང་གི་བརྟན་འཇགས་རྒྱུ་ནོར་ཡོང་ཁུངས་དང་ནོར་སྲིད་འཐུས་ཚང་ཅན་མངོན་འགྱུར་བྱེད་པའི་ཐབས་ལམ་འཚོལ་ཞིབ་བྱས།ནེ་ཀི་གསར་བའི་སྲིད་སྐྱོང་བྱེད་ཕྱོགས་ཀྱི་ནང་དོན་གཙོ་བོ་ལ།དལ་འགོར་བྱེད་མི་རུང་བའི་གྲོས་གཞི་ཐག་གཅོད་བྱེད་པར་འབད་འབུངས་བྱས་ཏེ་མང་ཚོགས་ཀྱིས་ཆབ་སྲིད་ཐད་འཛིན་པའི་ཡིད་ཆེས་སླར་གསོ་བྱེད་པར་བརྩོན་བྱེད་པ་དང་།འཇར་པན་གྱི་སྒོར་མོའི་རིན་ཐང་འཕར་བའི་སྲིད་ཇུས་སྤྱད་དེ་སྔ་མོ་ནས་ནུས་ཁུངས་ཀྱི་བཀག་རྒྱ་ལས་ཐར་ནས་འཇར་པན་གྱི་དཔལ་འབྱོར་སླར་གསོ་འབྱུང་བ་མངོན་འགྱུར་བྱེད་པ།འཇར་པན་དང་ཨ་མེ་རི་ཁའི་མནའ་མཐུན་རྨང་གཞི་བྱས་པའི་ཕྱི་ཕྱོགས་སྲིད་ཇུས་ལ་ཤུགས་སྣོན་བྱས་ཏེ།ཨེ་ཤ་ཡཱའི་རྒྱལ་ཁབ་བར་གྱི་རིམ་པ་མང་བོའི་འབྲེལ་འདྲིས་ཇེ་ཟབ་ཏུ་བཏང་ནས།མཐོ་རིམ་དཔལ་འབྱོར་མཉམ་ལས་ལ་ཡར་སྐུལ་བྱེད་པ།ས་འགུལ་གནོད་འཚེ་ཐེབས་སའི་རེ་བ་གཞིར་བཟུང་སྟེ།གནོད་ཐེབས་རྗེས་ཀྱི་བསྐྱར་འཛུགས་བྱ་བར་ཡར་སྐུལ་བྱེད་པ་སོགས་རེད།ཡེ་ཐེན་ཅཱ་ཡན་གྱིས་ཉིན་དེར་ཁོས་དབུ་བཞུགས་བློན་ཆེན་གྱིས་འགན་ཁུར་བའི་ཚུན་གྱི་ནེ་ཀིའི་ལེགས་སྒྲིག་ཐེངས་གཉིས་པ་བྱས།དབུ་བཞུགས་བློན་ཆེན་གཞོན་པ་དང་སྤྱི་ཚོགས་འགན་སྲུང་དང་ཁྲལ་བསྡུའི་ལམ་ལུགས་གཞི་གཅིག་ཅན་གྱི་བཅོས་བསྒྱུར།སྲིད་འཛུགས་བཅོས་བསྒྱུར་བཅས་ཀྱི་འགན་གཅིག་ལྕོགས་སུ་ཁུར་མཁན་ཀང་ཐེན་ཁི་ཡེ་དང་།ཕྱི་འབྲེལ་བློན་ཆེན་ཞོན་ཡེ་ཀོང་དབྱེ་ལིང་སོགས་སྔོན་ཆད་ཀྱི་ནེ་ཀིའི་བློན་ཆེན་བཅུ་གསུམ་སྔར་མུས་སུ་བཞག་པ་དང་།རྒྱལ་སྲུང་བློན་ཆེན་དང་རྒྱལ་ཁབ་མངའ་ཁོངས་འགྲིམ་འགྲུལ་བློན་ཆེན་སོགས་མི་ལྔ་བརྗེ་སྤོར་བྱས།