གློག་བརྙན་གཏོང་བཞིན་པའི་ཡུལ་དངོས།
ཉེ་ཆར་ཨ་རིའི་ཧཱ་ཧྥའོ་སློབ་གྲྭ་ཆེན་མོའི་རྒྱུ་ཆ་ཁང་དུ་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་ཀྱི་བརྩམས་ཆོས་ཏེ《ལྷིང་འཇགས་ཀྱི་མ་ཎི་རྡོ་འབུམ》དང《ཁྱི་རྒན》གཉིས་བཏང་བ་རེད།
　　ཐེངས་འདིའི་བྱ་འགུལ་ནི་ཧཱ་ཧྥའོ་སློབ་ཆེན་གློག་བརྙན་ཞིབ་འཇུག་ལྟེ་གནས་དང་། ཧཱ་ཧྥའོ་སློབ་ཆེན་མིའི་རིགས་རིག་པ་ཚན་ཁག་གི་མི་རིགས་རྣམ་བཤད་དབང་བོའི་ཚོད་ལྟ་ཁང་། ཧཱ་ཧྥའོ་སློབ་ཆེན་ཧྥེ་ཀྲིན་ཆིན་ཀྲུང་གོ་ཞིབ་འཇུག་ལྟེ་གནས་བཅས་ཀྱིས་མཉམ་དུ་བསྒྲུབས་པ་རེད།
　　འཁྲབ་ཁྲིད་པ་པདྨ་ཚེ་བརྟན་ལགས་ཐེངས་འདིའི་བྱ་འགུལ་ཁྲོད་ཞུགས་པ་དང་། ཧཱ་ཧྥའོ་སློབ་ཆེན་གྱི་ཆོས་རིག་པའི་སློབ་གླིང་གི་དགེ་རྒན་ཆེན་མོ་ཀྲའེ་ནཱེ་ཐི་རྒྱ་མཚོ་ལགས་ཀྱིས་མདོ་འཛིན་བྱས་ཤིང་། གློག་བརྙན་བཏང་ཚར་རྗེས་གློག་བརྙན་དེ་གཉིས་དང་འབྲེལ་བའི་བགྲོ་གླེང་རྒྱ་ཆེན་པོ་གནང་བ་དང་། ལྟད་མོ་བ་མང་བོས་གློག་བརྙན་དེ་གཉིས་བརྒྱུད་ནས་བོད་ཁམས་དང་བོད་ཀྱི་རིག་གནས་ལ་སྔར་ལས་ལྷག་པའི་རྒྱུས་ལོན་བྱེད་ཐུབ་ཅེས་བརྗོད་པ་རེད། རྒྱུས་ལོན་བྱུང་བ་ལྟར་ན་པདྨ་ཚེ་བརྟན་ལགས་ཀྱི་གློག་བརྙན་བསྟུད་མར་ཨ་རིའི་སློབ་ཆེན་འགའ་རུ་གཏོང་རྒྱུ་རེད།