ས་དེའི་ཚེས་ཉེར་ལྔ་ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པའོ་ཡིས་སི་ཐོག་ཁོར་མོ་ནས་ཕོ་ལན་གྱི་ཙུང་ལི་ཐུའུ་སི་ཁི་ཡིས་གྲོས་མོལ་གནང་བ་དང་རྒྱལ་ཁབ་གཉིས་ཀྱི་འཐབ་ཇུས་གྲོགས་པོའི་འབྲེལ་བ་གཏིང་ཟབ་ཏུ་སྤེལ་བའི་ཐད་ནས་གཅིག་མཐུན་གྱི་ལྟ་ཚུལ་གལ་ཆེན་བྱུང་། ཝུན་ཅ་པའོ་ཡིས་ཀྲུང་གོ་དང་ཕོ་ལན་བར་འབྲེལ་བ་བཙུགས་པའི་ཚུན་ལ་འཛམ་གླིང་དང་རྒྱལ་ཁབ་གཉིས་ཀར་འགྱུར་ལྡོག་ཆེན་པོ་བྱུང་ནའང་།རྒྱལ་ཁབ་གཉིས་ཀྱི་མི་དམངས་བར་གྱི་མཛའ་མཐུན་བརྩེ་བ་མ་འགྱུར་བ་དང་།དེང་གི་ཆར།རྒྱལ་སྤྱིའི་ཆབ་སྲིད་དང་དཔལ་འབྱོར།བདེ་འཇགས་རྣམ་པ་བཅས་ལ་རྙོག་འཛིང་དང་གཏིང་ཟབ་པའི་འགྱུར་ལྡོག་འབྱུང་བཞིན་ཡོད་ལ།ཀྲུང་གོས་ཕོ་ལན་གྱི་འཕེལ་རྒྱས་ཁྱད་སྟོབས་དང་ཡོ་རོབ་གླིང་།དེ་མིན་རྒྱལ་སྤྱིའི་ལས་དོན་ཁྲོད་ཀྱི་ཤན་ཤུགས་གལ་ཆེན་ལ་མཐོང་ཆེན་བྱེད་ཀྱིན་ཡོད་ལ།ཕོ་ལན་བར་གྱི་མཐོ་རིམ་འགྲོ་འོང་དང་ཁྱབ་ཁོངས་ཁག་གི་མཉམ་ལས་ལ་ཤུགས་བསྐྱེད་དེ།ཀྲུང་གོ་དང་ཕོ་ལན་བར་གྱི་འཐབ་ཇུས་གྲོགས་པོའི་འབྲེལ་བ་མུ་མཐུད་དུ་འཕེལ་རྒྱས་སུ་འགྲོ་བར་སྐུལ་འདེད་གཏོང་འདོད་ཡོད་ཅེས་གསུངས། ཝུན་ཅ་པའོ་ཡིས་བསྟན་དོན།ཀྲུང་གོ་དང་ཕོ་ལན་བར་དུ་ཙུང་ལིའི་དུས་བཅད་ཐུག་འཕྲད་ལམ་ལུགས་བཙུགས་ཏེ་ཆབ་སྲིད་ཐད་ཀྱི་ཡིད་ཆེས་དང་འཐབ་ཇུས་འབྲེལ་བ་ཇེ་ཟབ་ཏུ་གཏོང་བ་དང་།རྒྱལ་ཁབ་གཉིས་ཀྱི་སྲིད་གཞུང་བར་གྱི་མཉམ་ལས་ཨུ་ཡོན་ལྷན་ཁང་བཙུགས་ནས་ཁྱབ་ཁོངས་ཁག་གི་མཉམ་ལས་ལ་གཅིག་གྱུར་འཆར་འགོད་དང་མཐུན་སྦྱོར་བྱེད་རྒྱུ།ཕྱོགས་གཉིས་ཀྱིས་འབྱོར་ཚོང་མཉམ་ལས་ཀྱི་འབྲིང་རིང་འཆར་འགོད་གཏན་འབེབས་བྱས་ནས་མཉམ་ལས་ཀྱི་ཁྱབ་ཁོངས་གཙོ་བོ་དང་ལས་གཞི་གལ་ཆེན་གཏན་ཁེལ་བྱེད་རྒྱུ། ཕན་ནུས་ལྡན་པའི་བྱེད་ཐབས་སྤྱད་དེ་ཕྱོགས་གཉིས་ཀྱི་ཉོ་ཚོང་དོ་མཉམ་འཕར་སྣོན་ཡོང་བར་ཡར་སྐུལ་བཏང་སྟེ།ལོ་ལྔ་ཡི་ནང་ཉོ་ཚོང་གི་ཚད་ལྡབ་གཅིག་འཕར་བར་བརྩོན་ལེན་བྱེད་རྒྱུ།ཐོན་ལས་མཉམ་ལས་མཛུབ་སྟོན་ཨུ་ཡོན་ལྷན་ཁང་བཙུགས་ནས་རྒྱལ་ཁབ་གཉིས་ཀྱི་ཁེ་ལས་འབྲེལ་འདྲིས་ལས་སྟེགས་འཛུགས་པ་དང་འཐུས་ཚང་དུ་བཏང་སྟེ།དངུལ་གཏོང་དང་རྨང་གཞིའི་སྒྲིག་ཆས།ནུས་ཁུངས་གསར་བ།ཚན་རྩལ་མཐོན་པོའི་ཁྱབ་ཁོངས་ཀྱི་མཉམ་ལས་ལ་ཤུགས་བསྐྱེད་རྒྱུ།རིག་གནས་དང་སློབ་གསོ།གནས་སྐོར།ན་གཞོན་དང་ས་གནས་འབྲེལ་འདྲིས་ཇེ་ཟབ་ཏུ་བཏང་ནས་ཕན་ཚུན་བར་གྱི་རྒྱུས་ལོན་དང་མཛའ་བརྩེ་ཇེ་ཟབ་ཏུ་གཏོང་རྒྱུ་བཅས་ལ་འཐད་པ་ཡིན་ཞེས་གསུངས།ཝུན་ཅ་པའོ་ཡིས་ཕོ་ལན་གྱིས་མི་འགྱངས་པར་འཚོགས་རྒྱུ་ཡིན་པའི་ཀྲུང་གོ་དང་ཡོ་རོབ་དབུས་ཤར་རྒྱབ་ཁབ་ཀྱི་མགོ་ཁྲིད་པའི་ཐུག་འཕྲད་དང་འབྱོར་ཚོང་གླེང་སྟེགས་ཐད་ལ་བྱ་བ་མང་པོ་བསྒྲུབས་པར་བསྟོད་བསྔགས་བྱས། ཐུའུ་སི་ཁི་ཡིས་ཙུང་ལི་ཝུན་ཅ་པའོ་ཕོ་ལན་ལ་འཚམས་འདྲིར་ཡོང་བར་དགའ་བསུ་ཞུས་པ་དང་། ཐེངས་འདིའི་འཚམས་འདྲིར་དོན་སྙིང་གལ་ཆེན་ལྡན་ལ་ཕུགས་ཡུན་རིང་བར་འདོད།ཁོ་ཝུན་ཅ་པའོ་ཡིས་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་སུ་གཏོང་བའི་ཐད་བཏོན་པའི་དགོངས་འཆར་ལ་ཡོངས་སུ་འཐད་པ་བྱུང་།ཁོས་ཕོ་ལན་དང་ཀྲུང་གོའི་འབྲེལ་བ་ལོ་རྒྱུས་ཀྱི་ཆེས་མཐོའི་ཆུ་ཚད་དུ་གནས་ཡོད་ལ།ཕོ་ལན་གྱིས་ཀྲུང་གོའི་བར་དུ་ཆབ་སྲིད་གྲོས་མོལ་མང་དུ་སྤེལ་བ་དང་།ཙུང་ལི་ཡི་དུས་བཅད་ཐུག་འཕྲད་ཀྱིས་ཕྱོགས་གཉིས་ཀྱི་འབྲེལ་བར་ཐོན་པའི་སྣེ་ཁྲིད་ཀྱི་ནུས་པ་འདོན་སྤེལ་བྱེད་འདོད་ཡོད་པ་དང་།རྒྱལ་ཁབ་གཉིས་ཀྱི་ཁེ་ལས་ཀྱིས་ཕན་ཚུན་གྱི་དངུལ་གཏོང་རྒྱ་བསྐྱེད་པར་སྐུལ་མ་གཏོང་བ་དང་།ཉོ་ཚོང་སྟབས་བདེ་ཅན་དུ་གཏོང་བ།ནུས་ཁུངས་དང་རྒྱུ་ནོར་སོགས་ཁྱབ་ཁོངས་གསར་བའི་མཉམ་ལས་གསར་གཏོད་བྱེད་དགོས། ཕན་ནུས་ལྡན་པའི་བྱེད་ཐབས་སྤྱད་དེ་མུ་མཐུད་དུ་མི་ཚུལ་བརྗེ་རེས་དང་ས་གནས་མཉམ་ལས་རྒྱ་བསྐྱེད་དགོས་ལ། ཕོ་ལན་གྱིས་རང་ངོས་ཀྱི་དགེ་མཚན་འདོན་སྤེལ་གང་ལེགས་བྱས་ཏེ།ཡོ་རོབ་དབུས་ཤར་རྒྱལ་ཁབ་དང་ཀྲུང་གོའི་བར་གྱི་རྒྱུས་ལོན་དང་མཉམ་ལས་ཇེ་ཟབ་ཏུ་བཏང་སྟེ།ཡོ་རོབ་གླིང་དང་ཀྲུང་གོའི་འབྲེལ་བའི་འཕེལ་རྒྱས་ཐད་ལ་ཧུར་ཐག་སྒོས་བྱས་རྗེས་འཇོག་འདོད་ཡོད་ཟེར།གྲོས་མོལ་གྱི་རྗེས་སུ་རྒྱལ་ཁབ་གཉིས་ཀྱི་ཙུང་ལི་མཉམ་དུ་ཕྱོགས་གཉིས་ཀྱི་འབྲེལ་ཡོད་མཉམ་ལས་ཡིག་ཆ་འགོད་པའི་མཛད་སྒོར་ཞུགས་པ་མ་ཟད། གསར་འགོད་པར་ཐུག་འཕྲད་བྱས།