ཨེ་ཤ་ཡཱ་ཤར་ལྷོའི་མནའ་འབྲེལ་གྱི་ཁོངས་གཏོགས་རྒྱལ་ཁབ་བཅུའི་སྲིད་གཞུང་འཐུས་མིས་ཚེས་བཞི་ཉིན་ཁམ་ཕུ་ཀྲེ་ཡི་རྒྱལ་ས་ཅིན་པེན་ནས་གྲ་སྒྲིག་གྲོས་ཚོགས་བསྡུས་ཏེ།ཟླ་རྗེས་མའི་ཟླ་མགོར་ཅིན་པེན་ནས་འཚོགས་རྒྱུ་ཡིན་པའི་ཨེ་ཤ་ཡཱ་ཤར་ལྷོའི་མནའ་འབྲེལ་གྱི་མཐོ་རིམ་གྲོས་ཚོགས་དང་མུ་འབྲེལ་གྲོས་ཚོགས་ཀྱི་འཕེལ་རིམ་ལ་གྲོས་བསྡུར་བྱས་ནས་འབྲེལ་ཡོད་ཡིག་ཆ་གཏན་འབེབས་བྱས།ཁམ་ཕུ་ཀྲེ་རྒྱལ་ཁབ་ཀྱི་ཕྱི་འབྲེལ་པུའུ་ཡི་རྒྱལ་སྲིད་དྲུང་ཡིག་སུང་ལཱ་ཁྲ་ཝེ་ཡིས་མགོ་རྩོམ་པའི་མཛད་སྒོའི་སྟེང་བསྟན་དོན། ད་ལོའི་ཨེ་ཤ་ཡཱ་ཤར་ལྷོའི་མནའ་འབྲེལ་གྱི་རེས་སྐོར་ཀྲུའུ་ཞིའི་རྒྱལ་ཁབ་ཡིན་པའི་ཆ་ནས།ཁམ་ཕུ་ཀྲེ་རྒྱལ་ཁབ་ཀྱིས་རང་ནུས་ཅི་ཡོད་ཀྱིས་ཨེ་ཤ་ཡཱ་ཤར་ལྷོའི་མནའ་འབྲེལ་གྱི་མཐོ་རིམ་གྲོས་ཚོགས་དང་འབྲེལ་ཡོད་གྲོས་ཚོགས་བཟང་བོར་བསྡུས་ཏེ།གྲོས་ཚོགས་ལ་འཛུགས་སྐྲུན་རང་བཞིན་གྱི་གྲུབ་འབྲས་ཐོབ་པར་འབད་འབུངས་བྱེད་རྒྱུ་ཡིན་ཟེར།ཁོ་མོས་བཤད་རྒྱུར།ད་ལོར་ཨེ་ཤ་ཡཱ་ཤར་ལྷོའི་མནའ་འབྲེལ་གྱི་མཐོ་རིམ་གྲོས་ཚོགས་རྒྱལ་ཁའི་ངང་བསྡུས་ཏེ་ས་ཁུལ་དེའི་རྒྱལ་ཁབ་ཡོངས་ཀྱིས་ཉིས་སྟོང་བཅོ་ལྔ་ལོར་ཐུན་མོང་ཚོགས་པ་བཙུགས་ཏེ་ས་ཁོངས་དེའི་རྒྱལ་ཁབ་དག་གི་མི་དམངས་བར་གྱི་འབྲེལ་འདྲིས་ལ་ཤུགས་སྣོན་པ་དང་།དཔལ་འབྱོར་རྒྱུན་མཐུད་ངང་འཕེལ་རྒྱས་སུ་འགྲོ་བར་ཡར་སྐུལ་བྱས་ནས།ས་ཁོངས་ཀྱི་བརྟན་འཇགས་དང་དར་རྒྱས་ལ་སྲུང་སྐྱོབ་བྱེད་ཐུབ་པར་རེ་བ་བཅངས་ཡོད་ཟེར།གྲ་སྒྲིག་གྲོས་ཚོགས་དེ་ཨེ་ཤ་ཡཱ་ཤར་ལྷོའི་མནའ་འབྲེལ་གྱི་མཐོ་རིམ་དཔོན་པོའི་གྲོས་ཚོགས་གསུམ་དུ་དགར་ཡོད་པ་དང་།དེའི་ནང་དོན་ཨེ་ཤ་ཡཱ་ཤར་ལྷོའི་མནའ་འབྲེལ་གྱི་ཆབ་སྲིད་དང་བདེ་འཇགས་ཐུན་མོང་ཚོགས་པ་དང་། དཔལ་འབྱོར་ཐུན་མོང་ཚོགས་པ།སྤྱི་ཚོགས་དང་རིག་གནས་ཐུན་མོང་ཚོགས་པའི་འཛུགས་སྐྲུན་འཕེལ་རིམ་ལ་འབྲེལ་བ་ཡོད་པར་མ་ཟད།ཨེ་ཤ་ཡཱ་ཤར་ལྷོའི་མནའ་འབྲེལ་ཕན་ཚུན་འབྲེལ་འདྲིས་བྱེད་པའི་སྤྱིའི་འཆར་འགོད་དངོས་འབེབས་བྱས་པའི་གནས་ཚུལ་སྤྱི་བསྡོམས་བྱས་ཏེ།ཨེ་ཤ་ཡཱ་ཤར་ལྷོའི་མནའ་འབྲེལ་གྱི་མཐོ་རིམ་གྲོས་ཚོགས་དང་འབྲེལ་ཡོད་གྲོས་ཚོགས་ལ་གྲ་སྒྲིག་བྱེད་རྒྱུ་རེད།གྲོས་ཚོགས་ཡོད་ཚད་ཚེས་དྲུག་ཉིན་མཇུག་སྒྲིལ་རྒྱུ་རེད།