ཁྲའོ་ཞན་གྱིས་ཚེས་ཉེར་དགུ་ཉིན་ཕིན་དབྱང་ཅིན་རི་ཁྲིན་ཐང་ཆེན་དུ་གཟབ་རྒྱས་ངང་མྱ་ངན་ཚོགས་ཆེན་བསྡུས་པ་དང་། ཁྲའོ་ཞན་གྱི་ལས་རིགས་སོ་སོའི་མང་ཚོགས་འབུམ་གཅིག་ལྷག་མྱ་ངན་ཚོགས་ཆེན་དུ་ཞུགས་ནས། ཁྲའོ་ཞན་གྱི་མཐོ་རིམ་མགོ་ཁྲིད་པ་ཅིན་ཀྲིན་རི་སྐུ་གཤེགས་པར་གདུང་སེམས་ངང་མྱ་ངན་ཞུས།

མྱ་ངན་ཚོགས་ཆེན་ནི་ས་དེའི་དུས་ཚོད་སྔ་དྲོའི་དུས་ཚོད་བཅུ་གཅིག་གི་སྟེང་དང་པེ་ཅིན་གྱི་དུས་ཚོད་བཅུའི་སྟེང་མགོ་བརྩམས་པ་དང་། ཁྲའོ་ཞན་གྱི་ངལ་རྩོལ་ཏང་གི་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ཅིན་ཀྲིན་ཨུན་དང་། ཁྲའོ་ཞན་གྱི་ཆེས་མཐོའི་མི་དམངས་གྲོས་ཚོགས་ཀྱི་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཅིན་ཡུང་ནན། ཁྲའོ་ཞན་མི་དམངས་དམག་གི་སྤྱིའི་ཇུས་འདོན་པ་ལེ་ཡུན་ཧའོ་དང་། ཁྲའོ་ཞན་མི་དམངས་དྲག་ཤུགས་པུའུ་ཡི་པུའུ་ཀྲང་ཅིན་ཡུང་ཁྲོན་སོགས་ཁྲའོ་ཞན་གྱི་ཏང་དང་སྲིད་ཕྱོགས། དམག་ཕྱོགས་བཅས་ཀྱི་མགོ་ཁྲིད་པ་དང་ཁྲའོ་ཞན་དུ་སྡོད་པའི་གཞུང་ཚབ་པ། དེ་མིན་ལས་རིགས་སོ་སོའི་མང་ཚོགས་བཅས་ཀྱིས་ཅིན་རི་ཁྲིན་ཐང་ཆེན་དུ་མྱ་ངན་ཚོགས་ཆེན་ལ་ཞུགས།

ཚོགས་ཆེན་སྟེང་ཅིན་ཡུང་ནན་གྱིས་མྱ་ངན་ཞུ་ཚིག་ཕུལ། ཞུ་ཚིག་སྟེང་བཤད་རྒྱུར། ཅིན་ཀྲིན་རི་ཡིས་མེས་རྒྱལ་དང་མི་རིགས་ལ་ཇི་སྲིད་བར་དུ་འགྱུར་མི་སྲིད་པའི་བྱས་རྗེས་བཞག་པ་དང་། བློ་མཐུན་ཅིན་ཀྲིན་རི་སྐུ་གཤེགས་པ་ནི་ཁྲའོ་ཞན་གྱི་ཏང་དང་གསར་བརྗེའི་ཆེས་ཆེ་བའི་གྱོང་གུད་ཅིག་ཡིན་ཟེར། ཅིན་ཡུང་ནན་གྱིས་ཞུ་ཚིག་སྟེང་བཤད་རྒྱུར། ཅིན་ཀྲིན་ཨུན་ནི་ཁྲའོ་ཞན་གྱི་ཏང་དང་དམག་དཔུང་། དེ་མིན་མི་དམངས་བཅས་ཀྱི་ཅེས་མཐོ་བའི་མགོ་ཁྲིད་པ་ཡིན་པ་དང་། ཁྲའོ་ཞན་གྱིས་བློ་མཐུན་ཅིན་ཀྲིན་ཨུན་གྱི་མགོ་ཁྲིད་འོག སྡུག་བསྔལ་སྟོབས་ཤུགས་སུ་སྒྱུར་ཏེ། དཀའ་ཁག་གི་གནས་བབ་ལས་རྣམ་པར་རྒྱལ་ནས། བློ་མཐུན་ཅིན་ཀྲིན་རི་ཡིས་བཏོད་པའི་ལམ་བུའི་སྟེང་མུ་མཐུད་དུ་སྤོབས་སེམས་ངང་མདུན་དུ་བསྐྱོད་དགོས་ཟེར།

ཁྲའོ་ཞན་ངལ་རྩོལ་ཏང་གི་ཀྲུང་དབྱང་ཧྲུའུ་ཅི་ཅིན་ཡེ་ནན་དང་ཁྲའོ་ཞན་མི་དམངས་དམག་གི་སྤྱིའི་ཆབ་སྲིད་ཅུའི་ཅུའུ་ཀྲང་གཞོན་པ་དང་པོ་ཅིན་ཀྲིན་ཀི་སོགས་ཀྱིས་དེའི་རྗེས་ཞུ་ཚིག་ཕུལ་བ་དང་། མྱ་ངན་ཚོགས་ཆེན་ཧ་ལམ་དུས་ཚོད་གཅིག་ཙམ་ལ་འཚོགས།
ས་དེའི་ཉིན་གུང་གི་དུས་ཚོད་བཅུ་གཉིས་སྟེང་། རྒྱལ་ས་ཕིན་དབྱང་དང་ལྟེ་གནས་གྲོང་ཁྱེར་སོ་སོ་རུ་མེ་སྒྱོགས་རྒྱབ་པ་དང་། ཁྲའོ་ཞན་གྱི་མི་དམངས་ཡོངས་ཀྱིས་སྐར་མ་གསུམ་ལ་ངག་བསྡམས་མྱ་ངན་ཞུས་པ་དང་། མེ་འཁོར་དང་མཁའ་འགྲུལ་སོགས་ཀྱིས་ཀྱང་དུས་མཉམ་དུ་ཅོང་བརྡ་གྲགས་སུ་བཅུག་ནས་མྱ་ངན་ཞུས།

ཚེས་ཉེར་དགུ་ཉིན། ཁྲའོ་ཞན་གྱི་སྐུ་གཤེགས་ཟིན་པའི་ཆེས་མཐོ་བའི་མགོ་ཁྲིད་པ་ཅིན་ཀྲིན་རིའི་ཀྲུང་དབྱང་མྱ་ངན་ཚོགས་ཆེན་དུས་ལྟར་བསྡུས་པ་དང་། ཚོགས་ར་གཙོ་བོ་ཅིན་རི་ཁྲིན་ཐང་ཆེན་ལས་གཞན། བཞི་གཉིས་ལྔ་རིག་གནས་ཚོགས་ཁང་དང་ཏང་འཛུགས་རྗེས་དྲན་རྡོ་རིང་སོགས་མཚོན་བྱེད་ཅན་གྱི་འཛུགས་སྐྲུན་གྱི་མདུན་དུའང་མང་ཚོགས་མང་པོ་འདུ་ཚོགས་རྒྱབ་ཡོད་ལ། ཁོ་ཚོས་རུས་རྐང་ཟུག་པའི་གྲང་རླུང་གི་ཁྲོད་དུ་དྲང་མོར་འགྲེངས་ཏེ་མྱ་ངན་ཞུ་བཞིན་ཡོད།