མཉམ་འབྲེལ་རྒྱལ་ཚོགས་གནོད་སེལ་ཧྲུའུ་ཨ་ཧྥེ་རི་ཁ་ས་ཁུལ་གྱི་འགན་འཁུར་བ་པཱ་སཱ་ཝེ་ཡིས་ཚེས་བཅུ་གཉིས་ཉིན་ནེ་ལོ་པུས་ནས་བཤད་རྒྱུར། འཛམ་གླིང་གི་ས་ཁུལ་གཞན་པ་དང་བསྡུར་ན་ཨ་ཧྥེ་རི་ཁའི་དབུལ་ཕོངས་ཀྱི་ཚད་མཐོ་བ་དང་། དེས་ཨ་ཧྥེ་རི་ཁའི་མང་ཚོགས་གནོད་འཚེ་མྱོང་མཁན་དུ་འགྱུར་བར་བྱས་ཡོད་ཟེར།པཱ་སཱ་ཝེ་ཡིས་རྒྱལ་སྤྱིའི་གནོད་སེལ་ཉིན་མོ་ཐེངས་ཉེར་གཉིས་པའི་སྔོན་ལ་གསལ་བསྒྲགས་སྤེལ་ཏེ། དབུལ་ཕོངས་ཀྱིས་ཨ་ཧྥེ་རི་ཁའི་སྐམ་ས་ཆེན་མོའི་མི་མང་བོའི་འཚོ་སྡོད་ཆ་རྐྱེན་ཧ་ཅང་དཀའ་སྡུག་ཏུ་གྱུར་བ་དང་། ཐན་པ་དང་ཆུ་ལོག་སོགས་ཀྱི་གནོད་པ་ཐེབས་སླ་ཟེར།པཱ་སཱ་ཝེ་ཡིས་བསྟན་དོན། མིག་སྔར་ཨ་ཧྥེ་རི་ཁའི་སོ་མཱ་ལི་དང་ཨེ་སེ་ཨོ་ཕེ་ཡཱ་སོགས་རྒྱལ་ཁབ་དང་བཅས་པའི་ཨ་ཧྥེ་རི་ཁ་ཤར་མའི་གླིང་སྣེ་ས་ཁུལ་དང་ནུབ་བྱང་ཕྱོགས་ཀྱི་སཱ་ཧི་ལེ་ས་ཁུལ་དུ་ཐན་པའི་གནོད་པ་འབྱུང་ཉེན་ཆེ་བ་དང་། ཙན་པུ་ཞི་གཙང་བོ་དང་སེ་ནེ་ཀལ་གཙང་བོའི་བཞུར་ཡུལ་གྱི་སྡོད་དམངས་ལ་ཆུ་ལོག་གི་འཇིགས་ཉེན་ཐེབས་སྲིད་ཟེར། ཁོས་བཤད་རྒྱུར། གནོད་འཚེ་དེ་དག་སྔོན་འགོག་བྱེད་ཐུབ་ཀྱང་དབུལ་ཕོངས་ཀྱི་དབང་གིས་སྡོད་དམངས་ཚང་མས་གནོད་འཚེ་ལས་བྱུང་བའི་དཀའ་སྡུག་སྣ་ཚོགས་མི་མྱོང་ཐབས་མེད་རེད་ཟེར།པཱ་སཱ་ཝེ་ཡིས་བསྟན་དོན། མཉམ་འབྲེལ་རྒྱལ་ཚོགས་གནོད་སེལ་ཧྲུའུ་ཡིས་ཨ་ཧྥེ་རི་ཁའི་རྒྱལ་ཁབ་ཀྱི་སྲིད་གཞུང་བར་མཉམ་ལས་བྱས་ཤིང་། མཉམ་དུ་བྱེད་ཐབས་སྤྱད་དེ་གནོད་འཚེ་ཡི་ཉེན་ཁ་ཇེ་ཆུང་དུ་གཏོང་བར་འབད་བརྩོན་བྱེད་བཞིན་ཡོད་ཟེར།