ཨ་མེ་རི་ཁའི་རྒྱལ་ཚོགས་དམངས་གྲོས་ཁང་གིས་ཚེས་བཅུ་གཉིས་ཉིན་ཨ་མེ་རི་ཁས་ཧན་གོ་དང་ཁོ་ལོམ་པུ་ཡཱ།པཱ་ནཱ་མཱ་བཅས་ཀྱི་བར་བཀོད་པའི་རང་དབང་ཉོ་ཚོང་གི་གྲོས་ཆོད་གསུམ་ལ་ཆོག་མཆན་བཀོད།ཨ་མེ་རི་ཁའི་གྲོས་ཞུགས་ཁང་གིས་ཚེས་བཅུ་གཉིས་ཉིན་གྱི་དགོང་མོར་རང་དབང་ཉོ་ཚོང་གྲོས་ཆོད་དེ་གསུམ་ལ་འདེམ་ཤོག་འཕངས།ཨ་མེ་རི་ཁའི་ཕོ་བྲང་དཀར་པོས་ཚེས་གསུམ་ཉིན་ཧན་གོ་དང་། ཁོ་ལོམ་པུ་ཡཱ།པཱ་ནཱ་མཱ་བཅས་ཀྱི་བར་བཀོད་པའི་རང་དབང་ཉོ་ཚོང་གྲོས་ཆོད་གསུམ་པོ་རྒྱལ་ཚོགས་ལ་གྲོས་ཞིབ་བྱེད་པར་སྤྲད། ཕོ་བྲང་དཀར་པོའི་མགྲིན་ཚབ་པ་ཁཱ་ནེ་ཡིས་ཚེས་བཅུ་གཉིས་ཉིན་བསྟན་དོན། རང་དབང་ཉོ་ཚོང་གྲོས་ཆོད་གསུམ་པོ་དེ་ཨ་མེ་རི་ཁའི་དཔལ་འབྱོར་འཕེལ་རྒྱས་དང་ལས་ཞུགས་ལས་གནས་གསར་གཏོད་བྱེད་པར་ཕན་ཐོགས་ཆེན་པོ་ཡོད་པ་དང་།ཨོ་པཱ་མཱ་སྲིད་གཞུང་གིས་རང་དབང་ཉོ་ཚོང་གྲོས་ཆོད་གསུམ་པོ་དེར་ཆོག་མཆན་འགོད་པར་རྒྱབ་སྐྱོར་བྱེད་བཞིན་ཡོད་ཟེར།ཨ་མེ་རི་ཁའི་ཙུང་ཐུང་ཨོ་པཱ་མཱ་ཡིས་བསྟན་དོན།རང་དབང་ཉོ་ཚོང་གྲོས་ཆོད་ཀྱིས་ཨ་མེ་རི་ཁའི་ཁེ་ལས་ཀྱིས་ཕྱི་རྒྱལ་ནས་ཐོན་རྫས་ཕྱིར་འཚོང་བྱེད་པར་སྟབས་བདེ་ཡོང་སྲིད་པ་དང་།ལོ་རེར་ཨ་མེ་རི་ཁའི་སྒོར་མོ་དུང་ཕྱུར་བརྒྱ་དང་སུམ་ཅུའི་ཕྱིར་གཏོང་ཇེ་མང་དུ་གཏོང་ཐུབ་པར་མ་ཟད།ལས་ཞུགས་ལས་གནས་མང་བོ་གསར་སྐྲུན་བྱེད་ཐུབ་ཟེར།ཨ་མེ་རི་ཁའི་སྐབས་སྔོན་མའི་སྲིད་གཞུང་གིས་ཧན་གོ་དང་།པཱ་ནཱ་མཱ།ཁོ་ལོམ་པུ་ཡཱ་བཅས་ཀྱི་བར་རང་དབང་ཉོ་ཚོང་གྲོས་ཆོད་བཀོད་ཡོད་ཀྱང་།སྐབས་དེར་དམངས་གཙོ་ཏང་གིས་ཚོད་འཛིན་བྱེད་པའི་རྒྱལ་ཚོགས་ཀྱིས་རྒྱུ་མཚན་སྣ་ཚོགས་ལ་ཁ་གཡར་ནས་གྲོས་ཆོད་དེར་བརྡས་ཐག་མ་བཅད།ཨོ་པཱ་མཱ་ཡིས་ཙུང་ཐུང་གི་འགན་འཁུར་རྗེས།ཨ་མེ་རི་ཁའི་སྲིད་གཞུང་གིས་རྒྱལ་ཁབ་དེ་གསུམ་བར་རང་དབང་ཉོ་ཚོང་གྲོས་ཆོད་ཀྱི་ནང་དོན་ཐད་ནས་ཡང་བསྐྱར་གྲོས་མོལ་བྱས་པ་དང་།སྔ་གཞུག་ཏུ་ན་ནིང་ལོ་མཇུག་དང་ད་ལོའི་ལོ་མགོར་གྲོས་མཐུན་བཀོད།