དབྱི་རག་རྒྱལ་གཉེར་གྱི་ལྷོ་ཕྱོགས་རྡོ་སྣུམ་ཀུང་ཟིའི་དཔོན་པོ་ཞིག་གིས་ཚེས་བརྒྱད་ཉིན་བཤད་རྒྱུར། ལྷོ་ཕྱོགས་ཀྱི་པཱ་ཧྲི་ལཱ་ཞིང་ཆེན་ནས་ཚེས་བདུན་ཉིན་གྱི་དགོང་མོར་སྣུམ་འདྲེན་སྦུག་ལ་འགས་གཏོར་བྱུང་བའི་དོན་རྐྱེན་ཐེངས་གཉིས་བྱུང་སྟེ། དབྱི་རག་གི་ཆེས་ཆེ་བའི་སྣུམ་ཞིང་གི་མ་བཅོས་རྡོ་སྣུམ་ཐོན་སྐྱེད་བྱེད་མཚམས་འཇོག་དགོས་བྱུང་ཟེར།ལྷོ་ཕྱོགས་རྡོ་སྣུམ་ཀུང་ཟིའི་མིང་བཤད་མི་འདོད་པའི་དཔོན་པོ་ཞིག་གིས་གསར་འགོད་པར་བཤད་རྒྱུར། མདང་དགོང་བྱུང་བའི་འགས་གཏོར་དོན་རྐྱེན་ཐེངས་གཉིས་ཀྱི་དབང་གིས་ལུའུ་མེད་ལཱ་སྣུམ་ཞིང་གི་ཐོན་སྐྱེད་མཚམས་འཇོག་དགོས་བྱུང་། ལུའུ་མེད་ལཱ་ནི་དབྱི་རག་གི་ཆེས་ཆེ་བའི་སྣུམ་ཞིང་ཞིག་ཡིན་པ་དང་། པཱ་ཧྲི་ལཱ་ཞིང་ཆེན་དུ་ཡོད་ལ། མིག་སྔར་བརྩད་ཆོད་པའི་རྡོ་སྣུམ་གྱི་གསོག་ཚད་སྣུམ་ཟོ་དུང་ཕྱུར་བརྒྱ་དང་དོན་བདུན་ཡས་མས་ཡོད་ཟེར།དཔོན་པོ་དེས་བཤད་རྒྱུར། འགས་གཏོར་དོན་རྐྱེན་དང་པོ་དེ་པཱ་ཧྲི་ལཱ་ཞིང་ཆེན་ལྷོ་ནུབ་ཕྱོགས་ཀྱི་སཱ་ཧྥུའུ་བན་ས་ཁུལ་ནས་བྱུང་བ་དང་། འགས་གཏོར་ཐེངས་གཉིས་པ་དེ་སཱ་ཧྥུའུ་བན་དང་ཐག་མི་རིང་བའི་ཁི་ལི་ནཱ་ཐི་ས་ཁུལ་ནས་བྱུང་། འགས་་གཏོར་ལས་ལུའུ་མེད་ལཱ་སྣུམ་ཞིང་གི་ཙུའུ་པེད་ཨར་ས་ཁུལ་དུ་འཐེན་པའི་སྣུམ་འདྲེན་སྦུག་ལམ་ལ་གཏོར་བརླག་ཐེབས་པ་རེད་ཟེར།