སི་རི་ཡཱའི་ཕྱི་འབྲེལ་བློན་ཆེན་མུའུ་ཨ་ལེ་མུའུ་ཡིས་ཚེས་ཉེར་དྲུག་ཉིན་ཉིག་ཡོ་གྲོང་ཁྱེར་དུ་ཡོད་པའི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་ནས་ཕྱི་ཕྱོགས་ཀྱི་འབྲེལ་ཡོད་སྟོབས་ཤུགས་ཀྱིས་སི་རི་ཡཱའི་ནང་སྲིད་ལ་ཐེ་གཏོགས་བྱེད་མཚམས་འཇོག་དགོས་པའི་འབོད་སྐུལ་བཏང་བར་མ་ཟད། སི་རི་ཡཱའི་མི་དམངས་ལ་ཕྱི་ཕྱོགས་ཀྱི་ཐེ་གཏོགས་གང་རུང་ལ་ངོ་རྒོལ་བྱེད་པའི་ཆོད་སེམས་ཡོད་ཟེར།མུའུ་ཨ་ལེ་མུའུ་ཡིས་ཉིན་དེར་མཉམ་འབྲེལ་རྒྱལ་ཚོགས་ཚོགས་ཆེན་སྐབས་རེ་དྲུག་པའི་སྤྱིར་བཏང་གི་དཔྱད་གླེང་ཚོགས་འདུའི་སྟེང་བཤད་རྒྱུར། སི་རི་ཡཱའི་མི་དམངས་ལ་རྣམ་པ་གང་རུང་གི་སི་རི་ཡཱའི་ནང་སྲིད་ལ་ཐེ་གཏོགས་བྱེད་པའི་བྱ་བར་ངོ་རྒོལ་བྱེད་པའི་ཆོད་སེམས་ཡོད་པ་དང་། ང་ཚོས་མུ་མཐུད་དུ་བདེ་འཇགས་དང་བརྟན་འཇགས་ལ་ཡར་སྐུལ་བྱེད་རྒྱུ་ཡིན། སི་རི་ཡཱ་རྒྱལ་ཁབ་ཀྱིས་རྒྱལ་ཡོངས་གྲོས་མོལ་ལ་བརྟེན་ནས་ཕྱོགས་སོ་སོར་བཅོས་བསྒྱུར་བྱས་ཏེ། མ་འོངས་པའི་ཟླ་ངོ་འགའི་ནང་སི་རི་ཡཱ་རྒྱལ་ཁབ་དེ་ཆབ་སྲིད་སྣ་མང་ཅན་དང་ཕྱོགས་ཁག་སོ་སོའི་མི་དམངས་ཞི་བདེ་མཉམ་གནས་བྱེད་པའི་རྒྱལ་ཁབ་ཅིག་ཏུ་བསྒྱུར་བར་བརྩོན་ལེན་བྱེད་རྒྱུ་ཡིན་ཟེར།