མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཕན་ཅི་བུན་གྱིས་ཚེས་བཅོ་ལྔ་ཉིན་ཁོའི་མགྲིན་ཚབ་པ་བརྒྱུད་དེ་གསལ་སྒྲོག་སྤེལ་ནས། ཉེ་སྔོན་ཕཱ་ཁི་སི་ཐན་དུ་ཆུ་ལོག་གི་གནོད་འཚེ་བྱུང་བར་དོ་སྣང་བྱེད་པའི་བསམ་ཚུལ་བསྟན།

གསལ་སྒྲོག་ལས་བཤད་རྒྱུར། ཕན་ཅི་བུན་གྱིས་ཕཱ་ཁི་སི་ཐན་ལྷོ་ཕྱོགས་ཀྱི་ཞིན་ཏི་ཞིང་ཆེན་གྱི་གནོད་ཐེབས་མང་ཚོགས་ལ་ཟས་རིགས་དང་། རས་གུར། བདེ་འཇགས་འཐུང་ཆུ། སྨན་བཅོས་ཞབས་ཞུ་བཅས་ཀྱི་མཁོ་གལ་ཆེ་བའི་གནས་ཚུལ་ལ་སེམས་ཁུར་བྱེད་པ་དང་། ཁོས་ད་རུང་ཕཱ་ཁི་སི་ཐན་སྲིད་གཞུང་གིས་གནོད་འཚེ་ཐག་གཅོད་བཟང་བོ་བྱས་པར་གཟེངས་བསྟོད་བྱས་པར་མ་ཟད། མཉམ་འབྲེལ་རྒྱལ་ཚོགས་ཀྱིས་མུ་མཐུད་དུ་ཕཱ་ཁི་སི་ཐན་སྲིད་གཞུང་ལ་རོགས་རམ་བྱས་ཏེ་མང་ཚོགས་ཀྱི་ད་ལྟའི་དགོས་མཁོ་ཐག་གཅོད་བྱེད་པར་འབད་བརྩོན་བྱེད་རྒྱུའི་བསམ་ཚུལ་བསྐྱར་སྒྲོག་བྱས།

གསལ་སྒྲོག་ལས་བཤད་རྒྱུར། ན་ནིང་རྒྱལ་སྤྱིའི་སྤྱི་ཚོགས་ཀྱིས་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོའི་འབོད་སྐུལ་དང་དུ་བླངས་ཏེ། ཕཱ་ཁི་སི་ཐན་གྱི་ཆུ་ལོག་གི་གནོད་འཚེ་ཐད་རོགས་རམ་བྱས་པ་དང་། ད་ལྟ་ཕན་ཅི་བུན་གྱིས་ཡང་བསྐྱར་རྒྱལ་སྤྱིའི་སྤྱི་ཚོགས་ཀྱིས་མུ་མཐུད་དུ་ལག་གདང་མཉམ་སྦྲེལ་གྱིས་ཕཱ་ཁི་སི་ཐན་གྱི་གནོད་འགོག་དང་གནོད་འཚེ་ཡི་འཇིགས་ཉེན་ཇེ་ཆུང་དུ་གཏོང་བར་རྒྱབ་སྐྱོར་བྱེད་དགོས་པའི་འབོད་སྐུལ་བཏང་ཡོད་ཟེར།