ཨེ་ཤ་ཡཱ་དང་ཞི་བདེ་རྒྱ་མཚོ་ཆེན་མོའི་དཔལ་འབྱོར་མཉམ་ལས་རྩ་འཛུགས་ཀྱི་ཉིས་སྟོང་བཅུ་གཅིག་ལོའི་མཐོ་རིམ་དཔོན་པོའི་གྲོས་ཚོགས་ཐེངས་གསུམ་པ་ཚེས་བཅུ་གསུམ་ཉིན་ནས་བཟུང་ཨ་མེ་རི་ཁའི་ཅིག་ཅིན་ཧྲན་ནས་ཚོགས། ཐེངས་འདིའི་གྲོས་ཚོགས་ནི་གཙོ་བོ་ད་ལོའི་ཟླ་བཅུ་གཅིག་པར་ཨ་མེ་རི་ཁའི་ཞཱ་ཝེ་ཡེ་ནས་བསྡུ་རྒྱུ་ཡིན་པའི་ཨེ་ཤ་ཡཱ་དང་ཞི་བདེ་རྒྱ་མཚོ་ཆེན་མོའི་དཔལ་འབྱོར་མཉམ་ལས་རྩ་འཛུགས་ཀྱི་མགོ་ཁྲིད་པའི་གྲོས་ཚོགས་ཐེངས་བཅུ་དགུ་བའི་དངོས་གཞི་མིན་པའི་གྲོས་ཚོགས་ལ་གྲ་སྒྲིག་བྱེད་པའི་ཆེད་དུ་རེད།

ཐེངས་འདིའི་གྲོས་ཚོགས་ནི་ཨེ་ཤ་ཡཱ་དང་ཞི་བདེ་རྒྱ་མཚོ་ཆེན་མོའི་དཔལ་འབྱོར་མཉམ་ལས་རྩ་འཛུགས་ཀྱི་འགྲིམ་འགྲུལ་དང་ནུས་ཁུངས་པུའུ་ཡི་པུའུ་ཀྲང་རིམ་པའི་གྲོས་ཚོགས་དང་། བུད་མེད། དཔལ་འབྱོར་མཐོ་རིམ་གྲོས་ཚོགས། དེ་མིན་གསར་གཏོད་དང་ཉོ་ཚོང་། ལག་རྩལ་བཅས་ཀྱི་གྲོས་ཚོགས་སོགས་གྲོས་ཚོགས་རབ་དང་རིམ་པས་གྲུབ་པ་ཡིན་ལ། ཡང་བསྐྱར་བེད་སྤྱོད་བྱས་ཆོག་པའི་ནུས་ཁུངས་དང་འགྲིམ་འགྲུལ། སྨན་རྫས་འཕྲོད་བསྟེན། བུད་མེད། དཔལ་འབྱོར་ཉོ་ཚོང་སོགས་གྲོས་གཞི་ལ་གྲོས་བསྡུར་བྱེད་རྒྱུ་རེད། ཨེ་ཤ་ཡཱ་དང་ཞི་བདེ་རྒྱ་མཚོ་ཆེན་མོའི་དཔལ་འབྱོར་མཉམ་ལས་རྩ་འཛུགས་ཀྱི་ཁོངས་གཏོགས་རྒྱལ་ཁབ་སོ་སོའི་དཔོན་པོ་དང་སྒེར་གཉེར་ཁེ་ལས་པ། ཆེད་མཁས་པ་བཅས་མི་སྟོང་གསུམ་དང་ལྔ་བརྒྱ་གྲོས་ཚོགས་ལ་ཞུགས།

ཨ་མེ་རི་ཁའི་སྐྱེལ་འདྲེན་པུའུ་ཀྲང་ལཱ་ཧུའུ་ཏི་དང་། ནུས་ཁུངས་པུའུ་ཀྲང་ཀྲུའུ་ལེ་བུན། ཅཱ་ལེ་ཧྥུའུ་ནེ་ཡཱ་ཀྲིག་གི་ཀྲིག་ཀྲང་པུའུ་ལིང་བཅས་ཀྱིས་ཉིན་དེའི་སྔ་དྲོར་བསྡུས་པའི་འགྲིམ་འགྲུལ་དང་ནུས་ཁུངས་པུའུ་ཀྲང་རིམ་པའི་གྲོས་ཚོགས་སྟེང་གཏམ་བཤད་གལ་ཆེན་སྤེལ་ཏེ། ཨ་མེ་རི་ཁ་སྲིད་གཞུང་གིས་སྐྱེལ་འདྲེན་གྱི་ཕན་ནུས་ཇེ་མཐོར་གཏོང་བ་དང་། སྐྱེ་དངོས་ནུས་ཁུངས་ཀྱི་ཆགས་ཞེན་ཇེ་ཆུང་དུ་གཏོང་བ། དྲོད་རླངས་ཕྱིར་གཏོང་ཚད་ཇེ་ཉུང་དུ་གཏོང་བ། ལས་ཞུགས་ཇེ་མང་དུ་གཏོང་བ་བཅས་ཀྱི་ཐད་སྤྱད་པའི་བྱེད་ཐབས་མཚམས་སྦྱོར་བྱས།