རྒྱལ་སྤྱིའི་རྩ་འཛུགས་ཀྱིས་ཕཱ་ཁི་སི་ཐན་གྱི་ཆུ་ལོག་གནོད་ཐེབས་ས་ཁུལ་དུ་བྲེལ་མྱུར་རོགས་སྐྱོར་བྱས་པ།

        2011-09-15

མཉམ་འབྲེལ་རྒྱལ་ཚོགས་མི་ཆོས་རིང་ལུགས་ལས་དོན་མཐུན་སྦྱོར་གཞུང་སྒྲུབ་ཁང་གིས་ཚེས་བཅུ་གསུམ་ཉིན་རི་ནེ་ཝ་ནས་སྤྱི་སྒྲོག་སྤེལ་ཏེ། ཕཱ་ཁི་སི་ཐན་ལྷོ་ཕྱོགས་ས་ཁུལ་དུ་ཉེ་སྔོན་ཆུ་ལོག་གི་གནོད་འཚེ་ཚབས་ཆེན་ཐེབས་ནས། མི་ས་ཡ་ལྔ་དང་འབུམ་གསུམ་ལ་གནོད་པ་ཐེབས་པས། རྒྱལ་སྤྱིའི་སྤྱི་ཚོགས་ཀྱིས་ཕཱ་ཁི་སི་ཐན་སྲིད་གཞུང་གི་རེ་འདོད་ལྟར་དུ་གནོད་ཐེབས་ས་ཁུལ་དུ་བྲེལ་མྱུར་སྐྱོར་བྱས་ཟེར།

མཉམ་འབྲེལ་རྒྱལ་ཚོགས་མི་ཆོས་རིང་ལུགས་ལས་དོན་མཐུན་སྦྱོར་གཞུང་སྒྲུབ་ཁང་གིས་བཤད་རྒྱུར། ཕཱ་ཁི་སི་ཐན་དུ་ཆུ་ལོག་གི་གནོད་འཚེ་བྱུང་བ་ལས་མི་ས་ཡ་ལྔ་དང་འབུམ་གསུམ་ལ་གནོད་པ་ཐེབས་པ་དང་། མི་ཉིས་བརྒྱ་ཆུ་ལོག་གི་འཇིགས་པ་ལས་རྐྱེན་ལམ་དུ་ཤོར། ཧ་ལམ་མི་འབུམ་གཉིས་དང་ཁྲི་བརྒྱད་གནས་སྐབས་སུ་སློབ་གྲྭ་དང་སྲིད་གཞུང་ལས་ཁུངས་ཀྱི་ཁང་བའི་ནང་བཀོད་སྒྲིག་བྱས་ཡོད། དེའི་ནང་ཞིན་ཏི་ཞིང་ཆེན་དུ་གནོད་འཚེ་ཐེབས་པ་ཆེས་ཚབས་ཆེན་ཡིན་ཞིང་། མི་ས་ཡ་ལྔ་ལ་གནོད་པ་ཐེབས། ཆུ་ལོག་གིས་ད་རུང་རྒྱལ་ཁབ་དེའི་ཁང་ཤར་ས་ཡ་གཅིག་ཙམ་ལ་གཏོར་བརླག་ཐེབས་པ་དང་། ཧ་ལམ་ལོ་ཏོག་ཀུང་ཆིང་ས་ཡ་གཅིག་དང་འབུམ་བདུན་ཆུ་ལོག་གིས་བསྣུབས་ནས་བསྡུ་རྒྱུ་མེད་པར་གྱུར་ཡོད།

མཉམ་འབྲེལ་རྒྱལ་ཚོགས་བྱིས་པའི་ཐེབས་རྩ་ཚོགས་པ་དང་འཛམ་གླིང་འཕྲོད་བསྟེན་རྩ་འཛུགས་སོགས་ལས་ཁུངས་ཀྱིས་གཟའ་འཁོར་སྔོན་མ་ནས་བཟུང་གནོད་ཐེབས་ས་ཁུལ་ནས་ས་དེའི་བྱིས་པར་སིབ་སོགས་ཀྱི་འགོག་སྨན་བརྒྱབ་པ་དང་། རྒྱལ་སྤྱིའི་གནས་སྤོར་སྡོད་དམངས་རྩ་འཛུགས་དང་མཉམ་འབྲེལ་རྒྱལ་ཚོགས་ཡུལ་གྱར་ཧྲུའུ་ཡིས་ཀྱང་ཞིན་ཏི་ཞིང་ཆེན་དུ་རས་གུར་ཁྲི་གཉིས་ཙམ་བྱིན། མཉམ་འབྲེལ་རྒྱལ་ཚོགས་འབྲུ་རིགས་འཆར་འགོད་ཧྲུའུ་ཡིས་ཕཱ་ཁི་སི་ཐན་གནོད་ཐེབས་ས་ཁུལ་དུ་འབྲུ་རིགས་ཏུན་སྟོང་དྲུག་འདོན་སྤྲོད་བྱེད་རྩིས་ཡོད་པ་དང་། དེས་གནོད་ཐེབས་མང་ཚོགས་འབུམ་ལྔའི་ཟླ་ངོ་གཅིག་གི་བཟའ་བཏུང་ལ་ཁག་ཐེག་བྱེད་ཐུབ།

  • ལེ་ཚན་སྔོན་མ།:ཨ་མེ་རི་ཁ་དང་རོ་མཱ་ནི་ཡཱ་རྒྱལ་ཁབ་གཉིས་ཀྱིས་ཏའོ་ཏན་འགོག་སྲུང་མ་ལག་བཀོད་སྒྲིག་བྱེད་པའི་གྲོས་མཐུན་བཀོད་
  • ལེ་ཚན་རྗེས་མ།:ཨེ་ཤ་ཡཱ་དང་ཞི་བདེ་རྒྱ་མཚོ་ཆེན་མོའི་དཔལ་འབྱོར་མཉམ་ལས་རྩ་འཛུགས་ཀྱི་མཐོ་རིམ་དཔོན་པོའི་གྲོས་ཚོགས་ཅིག་ཅིན
  • དོ་སྣང་ཆེ་བའི་རྩོམ།