2011-09-15
ཚོགས་ཡུན་ཉིན་གཉིས་ཡིན་པའི་ཀྲུང་གོ་དང་དབྱིན་ཇིའི་ན་གཞོན་ཆབ་སྲིད་པའི་གླེང་སྟེགས་སྐབས་ལྔ་བ་ཚེས་བཅུ་གསུམ་ཉིན་དབྱིན་ཇིའི་ཏིས་ཆེ་ལེ་ནས་གྲོལ། ཚོགས་ཞུགས་འཐུས་མི་ཚོས་ནན་གྱིས་བསྟན་དོན། ཀྲུང་གོ་དང་དབྱིན་ཇི་ཕྱོགས་གཉིས་ཀྱིས་སྔར་ལས་ལྷག་པར་རྒྱུས་ལོན་ཇེ་ཟབ་ཏུ་གཏོང་བ་དང་། དངོས་གཉེར་མཉམ་ལས་གཏིང་ཟབ་ཏུ་སྤེལ་བ། ཏང་ཁག་བར་གྱི་བརྗེ་རེས་ལ་ཤུགས་སྣོན་བྱས་ཏེ། རྒྱལ་ཁབ་གཉིས་ཀྱི་འབྲེལ་བ་དེ་ཆུ་ཚད་གསར་བ་ཞིག་ཏུ་སྐུལ་འདེད་གཏོང་རྒྱུ་ཡིན་ཟེར།
སྐབས་འདིའི་གླེང་སྟེགས་ཀྱི་བརྗོད་སྙིང་ནི་ཀྲུང་གོ་དང་དབྱིན་ཇིའི་མཉམ་དུ་དཔལ་འབྱོར་འཕར་སྣོན་ལ་ཡར་སྐུལ་བྱེད་པའི་གྲོགས་པོའི་འབྲེལ་བ་གཏིང་ཟབ་ཏུ་འཕེལ་རྒྱས་སུ་འགྲོ་བར་སྐུལ་འདེད་གཏོང་དགོས་ཞེས་པ་དེ་ཡིན། གྲོས་ཚོགས་ཀྱི་སྐབས་སུ་ཀྲུང་གོག་དང་དབྱིན་ཇི་ཕྱོགས་གཉིས་ཀྱི་ན་གཞོན་ཆབ་སྲིད་པ་སུམ་ཅུ་ལྷག་གིས་རྒྱལ་ཁབ་གཉིས་ཀྱི་དཔལ་འབྱོར་ཉོ་ཚོང་མཉམ་ལས་དང་། ཐུན་མོང་གི་དཔལ་འབྱོར་འཕར་སྣོན། སྤྱི་ཚོགས་བཅོས་བསྒྱུར། སྲིད་ཏང་འཕེལ་རྒྱས། དེ་མིན་ཕྱོགས་གཉིས་ཀྱི་འབྲེལ་བའི་སྐོར་གྱི་གོ་སྐབས་དང་འགྲན་རྩོད་བཅས་ཀྱི་ཐད་ནས་གྲོས་བསྡུར་བྱས།
ཚོགས་ཞུགས་འཐུས་མིས་ད་རུང་རང་རང་སྲིད་ཏང་གི་འདུ་ཤེས་དང་སྲིད་ཇུས་གསར་གཏོད་ཀྱི་བྱེད་ཐབས་གསར་བ་མཚམས་སྦྱོར་བྱས་པ་དང་། སྲིད་འཛིན་ཏང་གིས་ཇི་ལྟར་སྲིད་འཛིན་གོ་གནས་སྲུང་འཛིན་བྱེད་པའི་ཐད་ནས་ལྷག་བསམ་རྣམ་དག་གིས་བརྗེ་རེས་བྱས།
སྐབས་འདིའི་གླེང་སྟེགས་སྟེང་། ཕྱོགས་གཉིས་ཀྱིས་ད་རུང་འགྲོ་མིའི་ཐོབ་ཐང་དང་། ཁྲའོ་ཞན་གྱི་ཉིང་རྡུལ་ནུས་པའི་གནད་དོན། ཀྲུང་གོ་དང་ཡོ་རོབ་གླིང་གི་འབྲེལ་བ་སོགས་ཀྱི་ཐད་ནས་བསམ་འཆར་བརྗེ་རེས་བྱས།
དོ་སྣང་ཆེ་བའི་རྩོམ།
རྩོམ་གསར། 10