ཀྲུང་གོའི་ཕྱི་འབྲེལ་པུའུ་ཀྲང་དབྱང་ཅེ་ཁྲི་ཡིས་ཚེས་བཅུ་གསུམ་ཉིན་པེ་ཅིན་ནས་ཧྥ་རན་སིའི་རྒྱལ་སྲིད་བློན་ཆེན་དང་ཕྱི་འབྲེལ་དང་ཡོ་རོབ་གླིང་ལས་དོན་གྱི་པུའུ་ཀྲང་གི་འགན་གཅིག་ལྕོགས་སུ་ཁུར་བའི་ཀྲུའུ་ཕེ་དང་གྲོས་མོལ་བྱས། ཕྱོགས་གཉིས་ཀྱིས་ཕན་ཚུན་བར་གྱི་འབྲེལ་བ་དང་ཐུན་མོང་གིས་སེམས་ཁུར་བྱེད་པའི་གནད་དོན་གཞན་པའི་ཐད་ནས་བསམ་འཆར་བརྗེ་རེས་བྱས།

དབྱང་ཅེ་ཁྲི་ཡིས་བཤད་རྒྱུར། དེང་སྐབས་འཛམ་གླིང་ཡོངས་ལ་རྙོག་འཛིང་གི་འགྱུར་ལྡོག་ཆེན་འབྱུང་བཞིན་ཡོད་ཅིང་། རིགས་སྣ་ཚོགས་ཀྱི་འཛམ་གླིང་རང་བཞིན་གྱི་འགྲན་རྩོད་ཉིན་རེ་བཞིན་འབུར་ཐོན་དུ་འགྲོ་བཞིན་ཡོད། མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་རྒྱུན་ལས་ལས་འཛིན་རྒྱལ་ཁབ་དང་རྒྱལ་ཁབ་ཉི་ཤུའི་སྡེ་ཚོགས་ཀྱི་ཁོངས་གཏོགས་རྒྱལ་ཁབ་ཡིན་པའི་ཆ་ནས། ཀྲུང་གོ་དང་ཧྥ་རན་སི་རྒྱལ་ཁབ་གཉིས་ཀྱིས་མཉམ་ལས་ལ་མཐུན་སྦྱོར་བྱས་ཏེ། མཉམ་དུ་འགྲན་རྩོད་ཐག་གཅོད་བྱེད་པ་དེ་འཛམ་གླིང་གི་ཞི་བདེ་དང་བརྟན་འཇགས། དར་རྒྱས་བཅས་ལ་དོན་སྙིང་གལ་ཆེན་ལྡན་ཟེར།

ཀྲུའུ་ཕེ་ཀྲུང་གོའི་མགྱོགས་ཤིང་མྱུར་བའི་འཕེལ་རྒྱས་ཀྱི་གྲུབ་འབྲས་ལ་བག་ཆགས་ཟབ་མོ་ཡོད་ཅིང་། ཀྲུང་གོའི་ཞི་བདེ་འཕེལ་རྒྱས་དེ་ཧྥ་རན་སི་ལ་མཚོན་ན་གོ་སྐབས་ཤིག་ཡིན་པ་ལས་འཇིགས་ཉེན་མ་ཡིན། ཧྥ་རན་སི་ཕྱོགས་ཀྱིས་ཀྲུང་གོའི་རྒྱལ་སྤྱིའི་ལས་དོན་ཁྲོད་ཀྱི་ནུས་པར་མཐོང་ཆེན་བྱེད་ལ། ཀྲུང་གོས་རྒྱལ་ཁབ་ཉི་ཤུའི་སྡེ་ཚོགས་ཀྱི་མཉམ་ལས་ལ་ཡར་སྐུལ་བྱེད་པའི་ཐད་ནུས་པ་གལ་ཆེན་བཏོན་པར་གཟེངས་བསྟོད་བྱེད་བཞིན་ཡོད་ཟེར། ཧྥ་རན་སི་ཕྱོགས་ཀྱིས་ཀྲུང་གོ་དང་མཉམ་དུ་མཐོ་རིམ་བར་གྱི་འགྲོ་འོང་ཇེ་ཟབ་ཏུ་གཏོང་བ་དང་། གཙོ་བོ་ཉིང་རྡུལ་ནུས་པ་སོགས་ཁྱབ་ཁོངས་ཀྱི་དངོས་གཉེར་མཉམ་ལས་རྒྱ་བསྐྱེད་དེ། རྒྱལ་ཁབ་གཉིས་ཀྱི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་སྔར་ལས་འཕེལ་རྒྱས་སུ་འགྲོ་བར་ཡར་སྐུལ་བྱེད་འདོད་ཡོད་ཟེར།

ཕྱོགས་གཉིས་ཀྱིས་ད་རུང་ཐུན་མོང་གིས་སེམས་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནས་བབ་དང་གནད་དོན་གལ་ཆེན་ཐད་ནས་བསམ་འཆར་བརྗེ་རེས་བྱས། ལི་པུ་ཡཱའི་གནས་བབ་ཐད་ནས་ཕྱོགས་གཉིས་ཀྱིས་ལི་པུ་ཡཱའི་མི་དམངས་ཀྱི་གདམ་གསེས་ལ་བརྩི་འཇོག་བྱེད་རྒྱུ་ཡིན་པ་དང་། མཉམ་འབྲེལ་རྒྱལ་ཚོགས་ཀྱིས་ལི་པུ་ཡཱའི་བསྐྱར་འཛུགས་འཕེལ་རིམ་ཁྲོད་གཙོ་ཁྲིད་ཀྱི་ནུས་པ་འདོན་དགོས་ཟེར།