དབྱིན་ཇིའི་ཕྱི་འབྲེལ་བློན་ཆེན་ཧེ་ཀི་ཡིས་ཚེས་ལྔ་ཉིན་བཤད་རྒྱུར། དབྱིན་ཇི་རྒྱལ་ཁབ་ཀྱིས་ལི་པུ་ཡཱའི་རྒྱལ་ས་ཏི་ལེ་པོ་ལི་རུ་ཡང་བསྐྱར་ཕྱི་འབྲེལ་གཞུང་ཚབ་ཚོགས་པ་མངག་གཏོང་བྱས་པ་དང་། ཕྱི་འབྲེལ་གཞུང་ཚབ་ཚོགས་པ་དེ་ཉིན་དེར་ཏི་ལེ་པོ་ལི་རུ་འབྱོར་ཟེར།ཧེ་ཀི་ཡིས་བཤད་རྒྱུར། ཕྱི་འབྲེལ་གཞུང་ཚབ་ཚོགས་པ་དེར་དབྱིན་ཇིའི་དམིགས་བསལ་འཐུས་མི་ཚབ་མ་ཨ་སི་ཁོས་སི་ཡིས་མགོ་ཁྲིད་ཡོད་པ་དང་། དབྱིན་ཇིའི་རྒྱལ་རྒྱུད་མཁའ་དམག་གི་གནམ་གྲུར་བསྡད་དེ་ཉིན་དེར་ལི་པུ་ཡཱའི་རྒྱལ་ས་ཏི་ལེ་པོ་ལི་རུ་འབྱོར་ཟེར།ཧེ་ཀི་ཡིས་བཤད་རྒྱུར། ཕྱི་འབྲེལ་གཞུང་ཚབ་ཚོགས་པས་རྒྱལ་ཡོངས་བར་བརྒལ་ཨུ་ཡོན་ལྷན་ཁང་བར་གྱི་འབྲེལ་བར་ཤུགས་སྣོན་བྱེད་པར་རོགས་རམ་བྱེད་རྒྱུ་མ་ཟད། ཨུ་ཡོན་ལྷན་ཁང་དེས་ལི་པུ་ཡཱ་བསྐྱར་འཛུགས་བྱེད་པར་རོགས་འདེགས་བྱེད་རྒྱུ་ཡིན་ལ། ཞོར་དུ་རྒྱལ་སྤྱིའི་ལས་ཁུངས་བར་འབྲེལ་འདྲིས་བྱས་ཏེ་ཏི་ལེ་པོ་ལི་དང་དེ་ཉེ་འདབས་ས་ཁུལ་གྱི་མི་ཆོས་རིང་ལུགས་ཀྱི་དགོས་མཁོ་ཐག་གཅོད་བྱེད་པར་རོགས་རམ་བྱེད་རྒྱུ་རེད།ཉིན་དེར་དབྱིན་ཇིའི་དབུ་བཞུགས་བློན་ཆེན་ཁཱ་མེ་ལུང་གིས་ཀྱང་གྲོས་ཚོགས་སྟེང་གསལ་སྒྲོག་སྤེལ་ཏེ། དབྱིན་ཇི་རྒྱལ་ཁབ་ཀྱིས་བདེ་འཇགས་གནས་ཚུལ་ལེགས་བཅོས་བྱེད་པ་དང་། མི་ཆོས་རིང་ལུགས་ཀྱི་རོགས་སྐྱོར་འདོན་སྤྲོད་བྱེད་པ། འཐབ་འཁྲུག་རྗེས་ཀྱི་བསྐྱར་འཛུགས། ཆབ་སྲིད་བར་བརྒལ་སོགས་ཀྱི་ཐད་ནས་ལི་པུ་ཡཱ་རྒྱལ་ཁབ་ལ་རོགས་རམ་བྱེད་རྒྱུ་ཡིན་ཟེར།