ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། དབྱི་སི་རལ་ནས་ཚེས3ཉིན་གྱི་དགོང་མོར་རྒྱལ་ཡོངས་རང་བཞིན་གྱི་གཞི་རྒྱ་ཆེ་བའི་ཁྲོམ་སྐོར་བྱ་འགུལ་བྱུང་བ་དང་། མི་འབུམ4ལྷག་སྲང་ལམ་དུ་སོང་ནས་ཁང་བ་དང་དངོས་རྫས་ཀྱི་རིན་གོང་ཇེ་མཐོར་སོང་བར་ངོ་རྒོལ་བྱས་ཏེ། སྲིད་གཞུང་གིས་ཕན་ནུས་ལྡན་པའི་བྱེད་ཐབས་སྤྱད་དེ་དངུལ་ལོར་ཚད་བརྒལ་འགྲེམ་པའི་སྣང་ཚུལ་ལ་ཚོད་འཛིན་བྱེད་དགོས་པའི་རེ་བ་བཏོན།

ཁྲོམ་སྐོར་བྱ་འགུལ་དེ་ཉིན་དེའི་དགོང་མོར་དབྱི་སི་རལ་གྱི་གྲོང་ཁྱེར་གཙོ་བོ་མང་བོ་ནས་མཉམ་དུ་བྱུང་བ་རེད། དབྱི་སི་རལ་གྱི་གསར་འགྱུར་ལས་རིགས་ཀྱིས་བསྡོམས་རྩིས་བྱས་པ་ལྟར་ན། ཉིན་དེའི་དགོང་མོར་ཧ་ལམ་མི་འབུམ་གཉིས་དང་ཁྲི་ལྔ་ཙམ་མཚོ་འགྲམ་གྲོང་ཁྱེར་ཐི་ལཱ་ཝེ་ཧྥུའུ་ནས་ཁྲོམ་སྐོར་ལ་ཞུགས་པ་དང་། གཞན་ཡང་མི་ཁྲི་བཞི་ཙམ་གྱིས་ཡེ་ལུའུ་སཱ་ལེམ་གྱི་ཙུང་ལིའི་བཞུགས་ཤག་གི་ཉེ་འདབས་ནས་ཁྲོམ་སྐོར་བྱས། ཧེ་ཧྥ་དང་ཨེ་ལཱ་ཐི། ཧི་ཨར་ཚི་ལེ་ཡཱ་སོགས་གྲོང་ཁྱེར་ནས་ཀྱང་སོ་སོར་མི་ཁྲི་ཕྲག་འགའ་སྲང་ལམ་དུ་སོང་ནས་ཁྲོམ་སྐོར་བྱས།རྒྱལ་ཡོངས་སུ་ཁྱབ་པའི་ཁྲོམ་སྐོར་བྱ་འགུལ་དེ་ཟླ7པའི་ཟླ་དཀྱིལ་ནས་བྱུང་བ་དང་། ཁྲོམ་སྐོར་བྱེད་མཁན་གྱིས་དེའི་སྐབས་སུ་རྒྱལ་ཡོངས་རང་བཞིན་གྱི་ཁྲོམ་སྐོར་ཐེངས་མང་བྱས་ལ། ད་ཐེངས་ཀྱི་ཁྲོམ་སྐོར་ནི་མི་གྲངས་ཆེས་མང་བའི་ཐེངས་ཤིག་རེད། །