དབྱི་སི་རལ་དང་ཐུར་ཁེ་རྒྱལ་ཁབ་གཉིས་ཀྱི་ཕྱི་འབྲེལ་ཉམས་ཉེན་ཉེ་སྔོན་བསྟུད་མར་ཛ་དྲག་ཏུ་གྱུར། དབྱི་སི་རལ་གྱི་ཙུང་ལི་ནེ་ཐཱ་ནི་ཡཱ་ཧུའུ་ཡིས་ཚེས་བཞི་ཉིན་བཤད་རྒྱུར། ན་ནིང་ཐུར་ཁེ་རྒྱལ་ཁབ་ཀྱི་ཅཱ་ཧྲ་ལ་རོགས་སྐྱོར་བྱེད་པའི་གྲུ་གཟིངས་ལ་འཇབ་རྒོལ་བྱས་པའི་དོན་རྐྱེན་ཐད་ནས་ཐུར་ཁེ་ཕྱོགས་ལ་དགོངས་དག་ཞུ་མི་སྲིད་ཀྱང་། ཐབས་བརྒྱ་ཇུས་སྟོང་གིས་དབྱི་སི་རལ་དང་ཐུར་ཁེ་ཕྱོགས་གཉིས་ཀྱི་གནད་དོན་དེའི་ཐད་ཀྱི་རྩོད་གླེང་ཐག་གཅོད་བྱེད་པར་རེ་བས་ཁེངས་ཡོད་ཟེར།ནེ་ཐཱ་ནི་ཡཱ་ཧུའུ་ཡིས་ཉིན་དེར་བསྡུས་པའི་ནེ་ཀིའི་གྲོས་ཚོགས་སྟེང་ཡང་བསྐྱར་ནན་བཤད་བྱས་དོན། དབྱི་སི་རལ་ལ་རང་ཉིད་སྲུང་སྐྱོབ་བྱེད་པའི་དབང་ཆ་ཡོད་པས། ང་ཚོས་མི་དམངས་དང་རྒྱལ་ཁབ་ལ་སྲུང་སྐྱོབ་བྱས་པར་དགོངས་དག་ཞུ་མི་སྲིད་ཟེར།ཉིས་སྟོང་བཅུ་ལོའི་ཟླ་ལྔ་བར། དབྱི་སི་རལ་གྱི་མཚོ་དམག་གིས་སྤྱི་ལ་དབང་བའི་རྒྱ་མཚོའི་སྟེང་ཅཱ་ཧྲ་ས་ཁུལ་དུ་རྒྱལ་སྤྱིའི་མི་ཆོས་རིང་ལུགས་ཀྱི་རྒུད་སྐྱོབ་དངོས་རྫས་སྐྱེལ་བའི་གྲུ་གཟིངས་རུ་ཁག་ཅིག་ལ་འཇབ་རྒོལ་བྱས་ཏེ། གྲུ་ཐོག་གི་ཐུར་ཁེ་རྒྱལ་ཁབ་ཀྱི་སྤྱི་དམངས་བརྒྱད་དང་ཕ་ཡུལ་ཨ་མེ་རི་ཁ་ཡིན་པའི་ཐུར་ཁེ་བ་ཞིག་རྐྱེན་ལམ་དུ་ཤོར་བ་དང་། གཞན་ཡང་མི་བཅུ་ཕྲག་འགའ་ལ་རྨས་ཕོག དོན་རྐྱེན་དེ་ལ་རྒྱལ་སྤྱིའི་སྤྱི་ཚོགས་ཀྱིས་རྒོལ་གཏམ་དྲག་པོ་བཏང་བ་དང་། ཐུར་ཁེ་རྒྱལ་ཁབ་ཀྱིས་ནམ་རྒྱུན་དབྱི་སི་རལ་གྱིས་ངེས་པར་དུ་དངོས་སུ་དགོངས་དག་ཞུས་ཏེ་སྐྱིན་ཚབ་སྤྲོད་དགོས་པའི་བསམ་ཚུལ་རྒྱུན་འཁྱོངས་བྱེད་བཞིན་ཡོད་ཀྱང་། དབྱི་སི་རལ་ཕྱོགས་ཀྱིས་དགོངས་དག་ཞུ་བར་ཁས་ལེན་བྱེད་ཀྱིན་མེད།