ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གོ་དང་ཨ་ཧྥེ་རི་ཁའི་རྒྱལ་ཁབ20ཙམ་གྱི་སྲིད་གཞུང་མིན་པའི་རྩ་འཛུགས100ལྷག་གི་འཐུས་མི200ལྷག་ཚེས29ཉིན་ཁེན་ཉི་ཡའི་རྒྱལ་ས་ནེ་རོ་པིར་མཉམ་འཛོམས་ཀྱིས་དེ་གར་གཉེར་བའི་ཀྲུང་གོ་དང་ཨ་ཧྥེ་རི་ཁའི་དམངས་ཁྲོད་གླེང་སྟེགས་སྐབས་དང་པོར་ཞུགས་པ་རེད།

ཀྲུང་གོ་དང་ཨ་ཧྥེ་རི་ཁའི་དམངས་ཁྲོད་གླེང་སྟེགས་དེ་ཀྲུང་གོའི་དམངས་ཁྲོད་རྩ་འཛུགས་རྒྱལ་སྤྱིའི་སྤེལ་རེས་ཡར་སྐུལ་ཚོགས་པ་དང་ཁེན་ཉི་ཡའི་སྲིད་གཞུང་མིན་པའི་རྩ་འཛུགས་མཐུན་སྦྱོར་ཨུ་ལྷན་གྱིས་ཐུན་མོང་ཐོག་གྲོས་འགོ་བཏོན་ནས་གཙོ་གཉེར་བྱས་པ་ཞིག་ཡིན་པ་དང་བརྗོད་བྱ་གཙོ་བོ་ནི“རོགས་ཟླའི་འབྲེལ་བ་འཕེལ་རྒྱས་བཏང་སྟེ་ཀྲུང་གོ་དང་ཨ་ཧྥེ་རི་ཁའི་མཛའ་གྲོགས་ལ་ཐུན་མོང་ཐོག་སྐུལ་འདེད་གཏོང་དགོས”ཞེས་པ་དེ་རེད། ཀྲུང་གོའི་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཝང་ཀྲི་ཀྲེན་གྱིས་ཤིས་ཚིག་གསུངས་སྐབས་ཀྲུང་གོ་དང་ཨ་ཧྥེ་རི་ཁའི་དམངས་ཁྲོད་གླེང་སྟེགས་གཉེར་བ་ནི་ཀྲུང་གོ་དང་ཨ་ཧྥེ་རི་ཁའི་འབྲེལ་བའི་ལོ་རྒྱུས་ཐོག་གི་གསར་གཏོད་ཅིག་ཡིན་པ་དེར་དོན་སྙིང་གལ་ཆེ་གཏིང་ཟབ་ལྡན་ཡོད། ཀྲུང་གོ་དང་ཨ་ཧྥེ་རི་ཁའི་རྒྱལ་ཁབ་ཁག་གི་དམངས་ཁྲོད་རྩ་འཛུགས་དེ་ཀྲུང་གོ་དང་ཨ་ཧྥེ་རི་ཁའི་དབར་དམངས་ཁྲོད་འགྲོ་འོང་ལ་སྐུལ་མ་གཏོང་བ་དང་། ཀྲུང་གོ་དང་ཨ་ཧྥེ་རི་ཁའི་མཐུན་ལམ་རྒྱུན་འཛིན་བྱེད་པའི་ཕོ་ཉ་ཞིག་ཏུ་གྱུར་ཡོད། ཀྲུང་གོ་དང་ཨ་ཧྥེ་རི་ཁའི་དམངས་ཁྲོད་རྩ་འཛུགས་ཀྱིས་མཉམ་ལས་ཀྱི་འདུ་ཤེས་གསར་གཏོད་བྱེད་པ་དང་མཉམ་ལས་ཀྱི་ནང་དོན་ཕུན་སུམ་ཚོགས་སུ་བཏང་སྟེ་ཀྲུང་གོ་དང་ཨ་ཧྥེ་རི་ཁའི་དམངས་ཁྲོད་ཀྱི་མཛའ་གྲོགས་དེ་དུས་སྐབས་གསར་པའི་རིང་གོང་འཕེལ་འགྲོ་བཞིན་པའི་རྒྱལ་ཁབ་ཀྱི་མི་དམངས་ཚོས་མཐུན་སྒྲིལ་རོགས་ལས་བྱེད་པ་དང་གཉིས་ཁེ་གཉིས་ཕན་གྱི་འོད་སྟོང་འཕྲོ་བའི་དཔེ་མཚོན་ཞིག་ཏུ་འགྱུར་རྒྱུའི་རེ་བ་བྱེད་ཀྱི་ཡོད་ཅེས་བསྟན་གནང་ཡོད་པ་རེད།  །