ཨ་མེ་རི་ཁའི་ཙུང་ཐུང་ཨོ་པཱ་མཱ་ཡིས་ཟླ་བརྒྱད་པའི་ཚེས་སོ་གཅིག་ཉིན་རྒྱལ་ཚོགས་ཀྱིས་རྒྱལ་ཕྲན་མཉམ་འབྲེལ་གྱི་མྱུར་བགྲོད་གཞུང་ལམ་གི་བཅའ་ཁྲིམས་འཆར་ཟིན་ལག་བསྟར་ཡུན་ཚད་ཇེ་རིང་དུ་བཏང་སྟེ། ལས་ཞུགས་ལས་གནས་ལ་སྲུང་སྐྱོབ་དང་དཔལ་འབྱོར་སླར་གསོ་ལ་ཡར་སྐུལ་བྱེད་དགོས་པའི་སྐུལ་མ་བཏང་།

ཨོ་པཱ་མཱ་ཡིས་ཉིན་དེར་ཕོ་བྲང་དཀར་པོའི་རྒྱ་སེ་མེ་ཏོག་ར་བ་ནས་གཏམ་བཤད་སྤེལ་སྐབས་བཤད་རྒྱུར། བཅའ་ཁྲིམས་འཆར་ཟིན་དེས་མི་ས་ཡ་མང་བོའི་བྱ་བའི་ལས་གནས་ལ་སྲུང་སྐྱོབ་བྱེད་ཐུབ་པས། ཆབ་སྲིད་ཀྱི་རྒྱུ་རྐྱེན་དབང་གིས་འཆར་ཟིན་དེའི་ལག་བསྟར་ཡུན་ཚན་ཇེ་རིང་དུ་མི་གཏོང་བ་ནི་དང་ལེན་དང་བཟོད་སྒོམ་བྱེད་ཐུབ་མེད་པ་ཞིག་རེད་ཟེར། ཨ་མེ་རི་ཁའི་སྐྱེལ་འདྲེན་པུའུ་ཀྲང་ལཱ་ཧུའུ་ཏི་དང་ཨ་མེ་རི་ཁའི་ཚོང་ཚོགས། ཨ་མེ་རི་ཁའི་ངལ་རྩོལ་བཟོ་བའི་མཉམ་འབྲེལ་ལྷན་ཚོགས། ཐོན་ལས་བཟོ་ཚོགས་མཉམ་འབྲེལ་ལྷན་ཚོགས། འཛུགས་སྐྲུན་ལས་རིགས་ཀྱི་འགན་ཁུར་བ་རེ་འགའ་བཅས་ཨོ་པཱ་མཱ་ཡི་གཏམ་བཤད་མཛད་སྒོར་ཞུགས། ཨོ་པཱ་མཱ་ཡིས་བཤད་རྒྱུར། གལ་ཏེ་བཅའ་ཁྲིམས་འཆར་ཟིན་དེའི་ལག་བསྟར་ཡུན་ཚད་ཇེ་རིང་དུ་མ་བཏང་ན། བཟོ་བ་སྟོང་བཞིའི་ལས་ཀ་ཤོར་སྲིད་པ་དང་། གལ་ཏེ་འཆར་ཟིན་དེའི་ལག་བསྟར་ཡུན་ཚད་ཇེ་རིང་དུ་གཏོང་བར་འགོར་འགྱངས་ཆེན་པོ་བྱས་ན། སང་ལོར་མི་ས་ཡ་ལྷག་གི་ལས་ཀ་ཤོར་ངེས་རེད་ཟེར།