ཙེམ་པབ་ཝེ་སྲིད་གཞུང་གིས་ཚེས་སུམ་ཅུ་ཉིན་ལི་པུ་ཡཱའི་ངོ་རྒོལ་ཕྱོགས་ཁག་གི་རྒྱལ་ཡོངས་བར་བརྒལ་ཨུ་ཡོན་ལྷན་ཁང་ལ་རྒྱབ་སྐྱོར་བྱེད་པའི་ཙེམ་པབ་ཝེ་རུ་སྡོད་པའི་ལི་པུ་ཡཱའི་གཞུང་ཚབ་པ་ཐཱ་ཧི་ཨར་ཨེ་ཨར་མཱ་ཀི་ལཱ་དབྱེ་ལ་ཆེས་མཇུག་མཐའི་བརྡ་ཐོ་བཏང་སྟེ། ཁོ་རང་ཉིན་ཞག་གསུམ་གྱི་དུས་ཚོད་ནང་ཙེམ་པབ་ཝེ་རྒྱལ་ཁབ་ཀྱི་མངའ་ཁོངས་དང་འབྲལ་དགོས་པའི་རེ་བ་བཏོན། དེའི་ཞོར་ལ་ཙེམ་པབ་ཝེ་སྲིད་གཞུང་གིས་ལི་པུ་ཡཱ་རུ་ཡོད་པའི་རྒྱལ་ཁབ་རང་གི་ཕྱི་འབྲེལ་གཞུང་ཚབ་པ་ཕྱིར་བོས་པ་རེད།

ཙེམ་པབ་ཝེ་ཡི་ཕྱི་འབྲེལ་བློན་ཆེན་མིན་པིན་ཀའི་ཀོས་ཀྱིས་ཉིན་དེར་རྒྱལ་ས་ཧཱ་ལཱ་ལོས་ཀྱི་གསར་འགོད་པའི་སྣེ་ལེན་ཚོགས་འདུ་ཞིག་གི་སྟེང་སྲིད་གཞུང་གི་ཆོད་དོན་དེ་ཁྱབ་སྒྲོག་བྱས་པ་རེད། ཁོས་བཤད་རྒྱུར། ཐཱ་ཧི་ཨར་ཨེ་ཨར་མཱ་ཀི་ལཱ་དབྱེ་ཡིས་ལི་པུ་ཡཱའི་ངོ་རྒོལ་ཕྱོགས་ཁག་རྒྱལ་ཡོངས་བར་བརྒལ་ཨུ་ཡོན་ལྷན་ཁང་ལ་མགོ་སྒུར་བ་ནས་བཟུང་ཁོའི་ཕྱི་འབྲེལ་ཐོབ་ཐང་མཇུག་སྒྲིལ་བ་རེད་ཟེར།

ཐཱ་ཧི་ཨར་ཨེ་ཨར་མཱ་ཀི་ལཱ་དབྱེ་དང་གཞུང་ཚབ་ཁང་གི་དཔོན་རིགས་གཞན་པས་ཧཱ་ལཱ་ལོས་གྲོང་ཁྱེར་ལྟེ་གནས་སུ་ཡོད་པའི་ལི་པུ་ཡཱའི་གཞུང་ཚབ་ཁང་ནས་ཨ་རབ་ཆེན་མོ་ལི་པུ་ཡཱའི་མི་དམངས་སྤྱི་ཚོགས་རིང་ལུགས་མང་ཚོགས་རྒྱལ་ཁབ་ཀྱི་རྒྱལ་དར་བླངས་ནས་མེར་བསྲེག་པ་དང་། ངོ་རྒོལ་ཕྱོགས་ཁག་རྒྱལ་ཡོངས་བར་བརྒལ་ཨུ་ཡོན་ལྷན་ཁང་གི་དར་ཆ་བསྒྲེངས་པ་རེད།