སི་ལོ་ཝུན་ནེ་ཡཱའི་ཙུང་ལི་ཕཱ་ཧའོ་ཨར་གྱིས་ཚེས་སུམ་ཅུ་ཉིན་ལུའུ་པུའུ་ཨར་ཡཱ་ནཱ་ནས་འཇར་མན་གྱི་ཙུང་ཐུང་མའོ་ཁི་ཨར་ལ་ཐུག་འཕྲད་བྱས། ཕྱོགས་གཉིས་ཀྱིས་རྒྱལ་ཁབ་གཉིས་ཀྱི་མཛའ་མཐུན་མཉམ་ལས་འབྲེལ་བར་སྐུལ་འདེད་གཏོང་བ་དང་། ཡོ་རོབ་གླིང་གི་སྒོར་མོ་བཀོལ་བའི་ས་ཁུལ་གྱི་དངུལ་བུན་ཉམས་ཉེན་ཁྱད་སེལ་བྱེད་པ་སོགས་གནད་དོན་ཐད་ནས་བསམ་འཆར་བརྗེ་རེས་བྱས།གྲོས་མོལ་བྱས་རྗེས་བསྡུས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་མའོ་ཁི་ཨར་གྱིས་སྔར་ལས་བློ་གཏད་ཆོག་པའི་ཡོ་རོབ་གླིང་ཞིག་འཛུགས་སྐྲུན་བྱེད་དགོས་པ་ནན་བཤད་བྱས། ཁོས་སི་ལོ་ཝུན་ནེ་ཡཱ་སྲིད་གཞུང་གིས་བཅོས་བསྒྱུར་སྣ་ཚོགས་ལག་བསྟར་བྱས་ཏེ། སྤྱི་ཚོགས་ཀྱི་འགྲན་རྩོད་ནུས་པ་ཇེ་མཐོར་བཏང་བར་གཟེངས་བསྟོད་བྱས་པར་མ་ཟད། སི་ལོ་ཝུན་ནེ་ཡཱ་རྒྱལ་ཁབ་ནི་བློ་གཏད་ཆོག་པའི་ཡོ་རོབ་གླིང་གི་གྲོགས་པོ་ཡིན་ཟེར།

ཕཱ་ཧའོ་ཨར་གྱིས་ལོ་མང་བོའི་རིང་གི་སི་ལོ་ཝུན་ནེ་ཡཱ་དང་འཇར་མན་བར་གྱི་མཛའ་མཐུན་མཉམ་ལས་འབྲེལ་བར་གདེང་འཇོག་ཆེན་པོ་བྱས་པ་དང་། འབྲེལ་བ་དེ་ཆབ་སྲིད་དང་དཔལ་འབྱོར། ཚན་རྩལ་སོགས་ཁྱབ་ཁོངས་མང་བོར་འབྲེལ་བའི་དམིགས་བསལ་འབྲེལ་བར་འགྱུར་བར་རེ་བ་བྱས་ཡོད་ཟེར།

དབྱེ་ཞིབ་མི་སྣས་བལྟས་ན། མའོ་ཁི་ཨར་གྱིས་ཐེངས་འདིར་སི་ལོ་ཝུན་ནེ་ཡཱ་རྒྱལ་ཁབ་ཏུ་འཚམས་འདྲི་བྱས་པའི་དམིགས་ཡུལ་གཙོ་བོ་ནི། ཡོ་རོབ་གླིང་གི་དངུལ་བུན་ཉམས་ཉེན་ཐག་གཅོད་བྱེད་པའི་གནད་དོན་ལ་གྲོས་བསྡུར་བྱེད་པའི་ཞོར་ལ། པཱ་ཨར་ཀན་ས་ཁུལ་གྱི་རྒྱལ་ཁབ་དག་གི་གནད་དོན་ཐད་ཀྱི་ལངས་ཕྱོགས་མཐུན་སྦྱོར་བྱེད་པའི་ཆེད་དུ་རེད་ཟེར།