ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།དབྱི་སི་རལ་གྱི་དམག་དཔུང་གིས་ཚེས21ཉིན་ཅོར་ཏན་ཆུ་བོའི་ནུབ་འགྲམ་གྱི་གྲོང་ཁྱེར་ཞི་པོ་ལུན་དང་པོ་ལེ་ཧིན་ནས་ཕ་ལེ་སི་ཐན་གྱི་མི60ལྷག་བཟུང་བ་དང་། དེའི་ནང་གི་མང་ཆེ་ཤོས་ནི་ཕ་ལེ་སི་ཐན་དབྱི་སི་ལན་འགོག་རྒོལ་ལས་འགུལ་ཧ་མ་སིའི་ཁོངས་མི་རེད།

འདི་ནི2003ལོའི་ཚུན་ལ་དབྱི་སི་རལ་དམག་དཔུང་གིས་སྤེལ་བའི་གཞི་ཁྱོན་ཆེས་ཆེ་བའི་འཛིན་བཟུང་འགུལ་སྐྱོད་རེད།

གནས་ཚུལ་མཐོང་མཁན་གྱིས་བཤད་རྒྱུར། འཛིན་བཟུང་འགུལ་སྐྱོད་དེ་ནམ་གུང་མགོ་བརྩམས་པ་དང་། དམག་དཔུང་གི་རླངས་འཁོར50ལྷག་ལ་བསྡད་ཡོད་པའི་དབྱི་སི་རལ་གྱི་དམག་མི་རྣམས་ལམ་སོ་སོ་ནས་ཞི་པོ་ལུན་གྲོང་ཁྱེར་ལ་ཡོང་སྟེ་འཛིན་བཟུང་བྱས། འཛིན་བཟུང་བྱས་པའི་ནང་དུ་ཕ་ལེ་སི་ཐན་ཁྲིམས་འཛུགས་ཨུ་ཡོན་ལྷན་ཁང་གི་ཧ་མ་སིའི་ཁོངས་མི་མུའུ་ཧན་མོ་ཏི་ཀུའུ་ཞི་ཧྲ་དང་ས་གནས་ཨུ་ཡོན་ལྷན་ཁང་གི་ཧ་མ་སིའི་ཁོངས་མི་བཅུ་ཕྲག་འགའ་ཡོད་ཟེར།

པོ་ལེ་ཧིན་ནས། དབྱི་སི་རལ་གྱི་དམག་མི་ས་དེའི་ཡུལ་གྱར་བའི་སྒར་ས་ཞིག་ལ་སོང་སྟེ་མི་སྣ་འཛིན་བཟུང་བྱས་པར་མ་ཟད་ས་དེའི་ཕ་ལེ་སི་ཐན་པའི་བར་དུ་འཐབ་འཁྲུག་བྱུང་ནས། ཕ་ལེ་སི་ཐན་གྱི་མི2རྨས།

འཛིན་བཟུང་འགུལ་སྐྱོད་མ་སྤེལ་གོང་། ཧ་མ་སི་ཡིས་དབྱི་སི་རལ་གྱི་ནུབ་ཕྱོགས་ལ་མེ་ཤུགས་འཕུར་མདའ་བཞིའི་འཇབ་རྒོལ་ཐེབས་པའི་དོན་རྐྱེན་དེ་ནི་ཁོ་ཚོས་བཟོས་པ་ཡིན་ཞེས་བསྒྲགས།

དབྱི་སི་རལ་གྱི་ལྷོ་ཕྱོགས་ས་ཁུལ་ལ་ཚེས18ཉིན་བསྟུད་མར་འཇབ་རྒོལ་ཐེབས་ཏེ། ཉུང་མཐར་ཡང་དབྱི་སི་རལ་གྱི་མི8རྐྱེན་ལམ་དུ་ཤོར། ཅ་ཧྲ་ས་ཁུལ་ཚོད་འཛིན་བྱས་ཡོད་པའི་ཧ་མ་སི་རྩ་འཛུགས་ཀྱིས་ཁོ་ཚོ་འཇབ་རྒོལ་དེ་དང་འབྲེལ་བ་མེད་ཅེས་བསྒྲགས་ནའང་། དབྱི་སི་རལ་གྱི་དམག་དཔུང་གིས་ཚེས18ཉིན་ནས་བཟུང་བསྟུད་མར་ཅ་ཧྲ་ས་ཁུལ་ལ་བར་སྣང་ནས་འཇབ་རྒོལ་བྱས་པ་དང་། ད་བར་དུ་འཇབ་རྒོལ་ཁྲོད་ནས་ཕ་ལེ་སི་ཐན་གྱི་མི་བཅོ་ལྔ་རྐྱེན་ལམ་དུ་ཤོར། །