ཕ་ལེ་སི་ཐན་མི་རིགས་དབང་ཤུགས་ལས་ཁུངས་ཀྱི་ཀྲུའུ་ཞི་ཨ་པ་སི་ཡིས་ཚེས་ཉེར་གཉིས་ཉིན་ཀྲུའུ་ཞིའི་བཀའ་ཁྱབ་སྤེལ་ནས། ད་ལོའི་ཟླ་བཅུ་བའི་ཚེས་ཉེར་གཉིས་ཉིན་བསྡུ་རྒྱུ་ཡིན་པའི་ས་གནས་འདེམ་བསྐོ་དེ་དུས་ངེས་མེད་དུ་རྗེས་ལ་བསྣུར་བ་ཡིན་ཞེས་བསྒྲགས། འདི་ནི་ཉིས་སྟོང་ལྔ་ལོའི་ཚུན་ལ་ཕ་ལེ་སི་ཐན་གྱིས་ཐེངས་གསུམ་པར་རྗེས་ལ་བསྣུར་བའི་ས་གནས་ཨུ་ཡོན་ལྷན་ཁང་གི་འདེམ་བསྐོ་རེད།ཕ་ལེ་སི་ཐན་མི་རིགས་བཅིངས་འགྲོལ་ལས་འགུལ་ཧྥ་ཐ་ཧི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་ཨེ་ཧ་མད་ཏི་ཡིས་ཞིན་ཧྭ་གསར་འགྱུར་ཁང་གི་གསར་འགོད་པར་བཤད་རྒྱུར། ཨ་པ་སི་ཡིས་ས་གནས་འདེམ་བསྐོ་དེ་ནང་ཁུལ་གྱི་འགལ་བ་མཚམས་བཞག་པ་དང་ཞི་བའི་འགྲིག་མཐུན་མངོན་འགྱུར་བྱས་པའི་ཆ་རྐྱེན་འོག་ཅོར་ཏན་ཆུ་བོའི་ནུབ་འགྲམ་དང་ཅ་ཧྲ་ས་ཁུལ་གཉིས་ནས་བསྡུ་དགོས་པ་རྒྱུན་འཁྱོངས་བྱས་པས། འདེམ་བསྐོ་དེ་ཡང་བསྐྱར་རྗེས་ལ་བསྣུར་བ་རེད་ཟེར།ཕ་ལེ་སི་ཐན་གྱི་ས་གནས་འདེམ་བསྐོ་ཐེངས་དང་པོ་ཉིས་སྟོང་བཞི་ལོའི་ལོ་མཇུག་ལ་བསྡུས་པ་དང་། འདེམ་བསྐོ་ཐེངས་གཉིས་པ་ནི་འཆར་གཞི་ལྟར་ན་ཉིས་སྟོང་བཅུ་ལོའི་ཟླ་དྲུག་པར་བསྡུ་དགོས་མོད། ཡིན་ནའང་ཕ་ལེ་སི་ཐན་དབྱི་སི་ལན་འགོག་རྒོལ་ལས་འགུལ་ཧ་མ་སིས་འགོག་རྒོལ་བྱས་པས། འདེམ་བསྐོ་དེ་སོ་སོར་ད་ལོའི་ཟླ་བདུན་པའི་ཚེས་དགུ་ཉིན་དང་ཟླ་བཅུ་བའི་ཚེས་ཉེར་གཉིས་ཉིན་གཉིས་ལ་རྗེས་སུ་བསྣུར། ཧ་མ་སིས་ནང་ཁུལ་གྱི་འགལ་བ་མཚམས་མ་བཞག་གོང་ས་གནས་འདེམ་བསྐོར་མི་ཞུགས་ཞེས་ཡང་དང་བསྐྱར་དུ་བཤད།

ཉིས་སྟོང་བདུན་ལོར། ཧ་མ་སིས་དྲག་ཤུགས་སྤྱད་དེ་ཧྥ་ཐ་ཧི་ཡི་ལག་ནས་ཅ་ཧྲ་ས་ཁུལ་གྱི་ཚོད་འཛིན་དབང་ཆ་འཕྲོག་པས། ཕྱོགས་ཁག་གཉིས་ཕན་ཚུན་ལ་ཁ་གཏད་དུ་ལངས་མགོ་བརྩམས། ད་ལོའི་ཟླ་ལྔ་བར། ཕྱོགས་གཉིས་ཀྱིས་ཨེ་ཅིབ་རྒྱལ་ཁབ་ཀྱི་རྒྱལ་ས་ཁའེ་ལོ་ནས་ཞི་བའི་འགྲིག་མཐུན་གྱི་གྲོས་ཆོད་བཀོད་མོད། ཡིན་ནའང་སྲིད་གཞུང་འཛུགས་པ་སོགས་གནད་དོན་ཐད་ནས་ལྟ་ཚུལ་གཅིག་མཐུན་མ་བྱུང་བས། གྲོས་ཆོད་དེ་ད་དུང་ལག་བསྟར་བྱེད་ཐུབ་མེད།