རྒྱ་གར་གསར་འགྱུར་ལས་རིགས་ཀྱིས་བསྒྲགས་པའི་གནས་ཚུལ་ལྟར་ན། རྒྱ་གར་གྱི་བྷང་ག་ལཱ་ནུབ་མ་པང་ནས་ཟླ་བདུན་པའི་ཚེས་སོ་གཅིག་ཉིན་གྱི་དགོང་མོའི་དུས་ཚོད་བདུན་ཡས་མས་སུ་མེ་འཁོར་གཉིས་ཐོ་བརྒྱབ་སྟེ་ལྕགས་ལམ་ལས་བརྒལ་བའི་དོན་རྐྱེན་བྱུང་སྟེ། མི་གཅིག་རྐྱེན་ལམ་དུ་ཤོར་བ་དང་། ཧ་ལམ་མི་ལྔ་བཅུ་ལ་རྨས་ཕོག་ཟེར། 
ཀའོ་ཧཱ་ཏིས་ནས་པན་ཅཱ་ལོ་ཨར་དུ་བགྲོད་པའི་མེ་འཁོར་ཞིག་བྷང་ག་ལཱ་ནུབ་མ་པང་ས་ཁུལ་བརྒྱུད་སྐབས་ལྕགས་ལམ་ལས་བརྒལ་བ་དང་། དེ་ནས་ལྕགས་ལམ་གཞན་པའི་སྟེང་གི་མེ་འཁོར་དང་ཐོ་བརྒྱབ་སྟེ། པན་ཅཱ་ལོ་ཨར་དུ་འགྲོ་བའི་མེ་འཁོར་གྱི་འཁོར་སྒམ་གསུམ་དང་དངོས་སྐྱེལ་མེ་འཁོར་གྱི་འཁོར་སྒམ་གསུམ་ལྕགས་ལམ་ནས་བརྒལ། དོན་རྐྱེན་བྱུང་ས་དེ་བྷང་ག་ལཱ་ནུབ་མ་པང་གི་ལྟེ་གནས་གྲོང་ཁྱེར་ནས་ཅཱ་ཨར་ཀི་ཏཱ་བྱང་ངོས་ཀྱི་སྤྱི་ལེ་སུམ་བརྒྱ་དང་ལྔ་བཅུའི་མཚམས་རེད། 

ས་དེའི་ལྕགས་ལམ་ཉེན་རྟོག་པས་བཤད་རྒྱུར། བུད་མེད་རྒན་པ་ཞིག་དོན་རྐྱེན་ཁྲོད་རྐྱེན་ལམ་དུ་ཤོར་བ་དང་། ཧ་ལམ་མི་ལྔ་བཅུ་ལ་རྨས་ཕོག ཡིན་ན་ཡང་རྒྱ་གར་ལྕགས་ལམ་པུའུ་ཡི་པུའུ་ཀྲང་ཐི་ལི་ཝེ་ཏིས་ཀྱིས་མི་སྣ་ཤི་རྨས་བྱུང་བའི་གནས་ཚུལ་ཁས་ལེན་མ་བྱས་ལ། ལྕགས་ལམ་ལས་བརྒལ་བའི་མེ་འཁོར་གྱི་ཉེ་འདབས་ནས་རྙེད་པའི་བུད་མེད་རྒན་པ་དེ་དོན་རྐྱེན་དེའི་ཁྲོད་རྐྱེན་ལམ་དུ་ཤོར་བ་མ་རེད་ཟེར།