འཇར་པན་རྒྱལ་ཚོགས་གྲོས་ཞུགས་ཁང་གིས་ཚེས་ཉེར་ལྔ་ཉིན་སྤྱིའི་མ་དངུལ་འཇར་པན་གྱི་སྒོར་མོ་དུང་ཕྱུར་ཁྲི་གཅིག་དང་སྟོང་དགུ་དགུ་བརྒྱ་གྱ་བརྒྱད་ཀྱི་ཉིས་སྟོང་བཅུ་གཅིག་ལོའི་ནོར་སྲིད་ལོའི་སྔོན་རྩིས་ཁ་གསབ་འཆར་ཟིན་གཉིས་པར་གྲོས་འཆམ་བྱུང་། དམངས་གཙོའི་ཁང་གིས་ཚེས་ཉི་ཤུ་ཉིན་བསྒྲགས་པའི་གནས་ཚུལ་ལྟར་ན། སྔོན་རྩིས་ཁ་གསབ་འཆར་ཟིན་དེ་གྲོས་ཞུགས་ཁང་ནས་གྲོས་འཆམ་བྱུང་རྗེས་དེ་མ་ཐག་ལག་བསྟར་བྱས།
 སྔོན་རྩིས་འཆར་ཟིན་དེར་འཇར་པན་གྱི་སྒོར་མོ་དུང་ཕྱུར་སྟོང་བརྒྱད་ཀྱི་གནོད་ཤུལ་བསྐྱར་འཛུགས་ཀྱི་གྲ་སྒྲིག་མ་དངུལ་དང་། འཇར་པན་གྱི་སྒོར་མོ་དུང་ཕྱུར་སྟོང་ལྔ་དང་བཞི་བརྒྱ་ང་ལྔའི་གསར་སྣོན་བྱས་པའི་ས་གནས་ཁྲལ་དངུལ་སྤྲོད་བསྡུ། གནོད་ཐེབས་མང་ཚོགས་ཀྱི་འཚོ་བའི་བསྐྱར་འཛུགས་རོགས་སྐྱོར་གྲོན་དངུལ་འཇར་པན་གྱི་སྒོར་མོ་དུང་ཕྱུར་སྟོང་གསུམ་དང་བདུན་བརྒྱ་དོན་བཞི། དེ་མིན་ཧྥུའུ་ཏའོ་ཉིང་རྡུལ་གློག་འདོན་ས་ཚིགས་དང་པོའི་དོན་རྐྱེན་ཐག་གཅོད་པའི་འབྲེལ་ཡོད་སྐྱིན་ཚབ་སྤྲོད་པ་དང་བདེ་ཐང་རྟོག་ཞིབ་གྲོན་དངུལ་འཇར་པན་གྱི་སྒོར་མོ་དུང་ཕྱུར་སྟོང་གཉིས་དང་བདུན་བརྒྱ་ང་བཞི་བཅས་འདུས། སྔོན་རྩིས་མ་དངུལ་དེ་དག་ཉིས་སྟོང་བཅུ་ལོའི་ནོར་སྲིད་ཀྱི་མ་དངུལ་ལྷག་མའི་ཁྲོད་ནས་གཏོང་རྒྱུ་རེད། འཇར་པན་ནེ་ཀིའི་སྔོན་རྩིས་སྙན་ཞུ་ཞིག་ལས། སྔོན་རྩིས་ཁ་གསབ་འཆར་ཟིན་ཐེངས་གཉིས་པས་ཉིས་སྟོང་བཅུ་གཅིག་ལོའི་རྒྱལ་ནང་གི་སྤྱིའི་ཐོན་རིན་བརྒྱ་ཆའི་ཐིག་གནས་ཐིག་དང་གྲངས་ཆུང་གསུམ་འཕར་སྣོན་འབྱུང་ཐུབ།
 འཇར་པན་རྒྱལ་ཚོགས་ཀྱིས་ཟླ་ལྔ་བའི་ཟླ་མགོར་སྤྱི་འབོར་འཇར་པན་གྱི་སྒོར་མོ་དུང་ཕྱུར་བཞི་དང་ས་ཡ་གསུམ་འབུམ་ལྔ་ཁྲི་བརྒྱད་ཡིན་པའི་ཉིས་སྟོང་བཅུ་གཅིག་ལོའི་སྔོན་རྩིས་ཁ་གསབ་འཆར་ཟིན་ཐོག་མ་བཏོན་ཏེ། གཙོ་བོ་བྲེལ་མྱུར་རྒུད་སྐྱོབ་བྱེད་པའི་ཐད་བཀོལ། འཇར་པན་གསར་འགྱུར་ལས་རིགས་ཀྱིས་བསྒྲགས་པའི་གནས་ཚུལ་ལྟར་ན། འཇར་པན་སྲིད་གཞུང་གིས་ཟླ་དགུ་བར་གནས་སྐབས་ཀྱི་རྒྱལ་ཚོགས་ལ་སྤྱི་འབོར་འཇར་པན་གྱི་སྒོར་མོ་དུང་ཕྱུར་ཁྲི་བཅུ་ཡིན་པའི་སྔོན་རྩིས་ཁ་གསབ་འཆར་ཟིན་ཐེངས་གསུམ་པ་འདོན་རྒྱུའི་འཆར་གཞི་ཡོད་ཟེར།