ནོར་ཝེ་དང་ཏེམ་མག ཧྥུན་ལན། སུའེ་ཙེར་སོགས་རྒྱལ་ཁབ་ཀྱིས་ཚེས་ཉེར་ལྔ་ཉིན་རྒྱལ་ཡོངས་སུ་སྐར་མ་གཅིག་གི་རིང་མྱ་ངན་ཞུ་བའི་བྱ་འགུལ་སྤེལ་ཏེ། ཚེས་ཉེར་གཉིས་ཉིན་ནོར་ཝེ་རྒྱལ་ཁབ་ཀྱི་ཨོ་སི་ལུའུ་གྲོང་ཁྱེར་གྱི་འགས་གཏོར་དོན་རྐྱེན་དང་ཡུས་ཐི་གླིང་ཕྲན་གྱི་མེ་མདས་བརྒྱབ་པའི་དོན་རྐྱེན་ཁྲོད་ཀྱི་ཤི་བོར་མྱ་ངན་ཞུས།
 ཚེས་ཉེར་ལྔ་ཉིན་གྱི་དུས་ཚོད་བཅུ་གཉིས་སྟེང་། ནོར་ཝེ་རྒྱལ་ཁབ་ཀྱི་དབུ་བཞུགས་བློན་ཆེན་སི་ཐོ་ཨར་ཐིན་པེ་ཀི་ཡིས་ཨོ་སི་ལུའུ་གྲོང་ཁྱེར་ལྟེ་གནས་ཀྱི་སློབ་ཆེན་ཐང་ཆེན་ནས་མྱ་ངན་ཞུ་བའི་བྱ་འགུལ་དངོས་སུ་མགོ་བརྩམས་པ་ཁྱབ་སྒྲོག་བྱས། ཐང་ཆེན་དུ་འདུས་ཡོད་པའི་མྱ་ངན་ཞུ་མཁན་དང་ནོར་ཝེའི་སྡོད་དམངས་སྟོང་ཕྲག་འགས་སྐར་མ་གཅིག་གི་རིང་མྱ་ངན་ཞུས་པ་དང་། རྒྱལ་ཡོངས་ཀྱི་མེ་འཁོར་དང་རླངས་འཁོར་ཡོད་ཚད་བགྲོད་མཚམས་བཞག་སྟེ་མྱ་ངན་ཞུས།
 ཏེམ་མག་གི་དབུ་བཞུགས་བློན་ཆེན་ལཱ་སི་མུའུ་སིན་གྱི་རེ་བ་ལྟར། ཏེམ་མག་རྒྱལ་ཡོངས་སྤྱི་དམངས་ཀྱིས་ཚེས་ཉེར་ལྔ་ཉིན་གྱི་དུས་ཚོད་བཅུ་གཉིས་སྟེང་སྐར་མ་གཅིག་གི་རིང་ལ་དོན་རྐྱེན་ཁྲོད་ཀྱི་ཤི་བོར་མྱ་ངན་ཞུས། ལཱ་སི་མུའུ་སིན་གྱིས་ཚེས་ཉེར་བཞི་ཉིན་བཤད་རྒྱུར། ནོར་ཝེ་རྒྱལ་ཁབ་ནས་བྱུང་བའི་ཡ་ང་བའི་འཇབ་རྒོལ་དོན་རྐྱེན་དེ་ལས་ཉེས་མེད་མི་དམངས་ལ་འཇབ་རྒོལ་ཐེབས་པར་མ་ཟད། ང་ཚོའི་རྒྱལ་ཁབ་ཀྱི་རིན་ཐང་ལྟ་བར་ཡང་འཇིགས་ཉེན་ཐེབས་པས། ང་ཚོ་མི་ཚང་མར་གནོད་པ་བཏང་བ་རེད། སྐྱོ་སྡུག་གི་སྐབས་འདིར་ང་ཚོ་ཏེམ་མག་མི་དམངས་ནོར་ཝེའི་མི་དམངས་དང་མཉམ་དུ་གནས་སྲིད་ཟེར།
 ཚེས་ཉེར་ལྔ་ཉིན་གྱི་དུས་ཚོད་གཅིག་གི་སྟེང་། ཧྥུན་ལན་རྒྱལ་ཡོངས་ཀྱིས་ནོར་ཝེའི་འགས་གཏོར་དང་མེ་མདས་བརྒྱབ་པའི་དོན་རྐྱེན་ཁྲོད་ཀྱི་ཤི་བོར་སྐར་མ་གཅིག་གི་རིང་མྱ་ངན་ཞུས། ཚེས་ཉེར་བཞི་ཉིན། ཧྥུན་ལན་སྲིད་གཞུང་ལས་ཁུངས་དང་ཀུང་ཟིའི་ཁེ་ལས། སྡོད་དམངས་འདུས་སྡོད་བྱེད་ས་བཅས་ཀྱི་དར་ཆ་ཕྱེད་ཙམ་མར་ཕབ་སྟེ་ཤི་བོར་མྱ་ངན་ཞུས།
 སུའེ་ཏེན་རྒྱལ་ཡོངས་ཀྱིས་ཀྱང་སྐར་མ་གཅིག་གི་རིང་མྱ་ངན་ཞུ་བའི་བྱ་འགུལ་སྤེལ།