ཐེ་གོའི་སྲིད་འཛིན་ཏང་དམངས་གཙོ་ཏང་གི་གཙོ་འཛིན། ལྟ་སྐྱོང་སྲིད་གཞུང་གི་ཙུང་ལི་ཨ་ཕིས་ཧྲི་ཡིས་ཚེས་གསུམ་ཉིན་གྱི་དགོང་མོར་ཉིན་དེར་བསྡུས་པའི་རྒྱལ་ཚོགས་གྲོས་ཁང་ཞོལ་མའི་འདེམ་བསྐོའི་ཁྲོད་ཕམ་ཁ་བྱུང་བ་ཁས་ལེན་བྱས།
 ཨ་ཕིས་ཧྲི་ཡིས་དམངས་གཙོ་ཏང་གི་སྤྱི་ཁྱབ་པུའུ་ནས་གཏམ་བཤད་སྤེལ་ཏེ། ཝེ་ཐེ་ཏང་ལ་རྒྱལ་ཁ་ཐོབ་པར་རྟེན་འབྲེལ་ཞུས་པ་དང་། ཝེ་ཐེ་ཏང་གི་ཙུང་ལིའི་འདེམ་སྒུག་མི་སྣ་ཞི་ནཱ་ཝ་ཐེ་གོའི་ལོ་རྒྱུས་སྟེང་གི་བུད་མེད་ཙུང་ལི་ཐོག་མར་གྱུར་བར་རྟེན་འབྲེལ་ཞུས།
 ཨ་ཕིས་ཧྲི་ཡིས་བཤད་རྒྱུར། ལོ་ངོ་གཉིས་ལྷག་གི་རིང་ལ། ངས་རྒྱལ་ཁབ་ཀྱི་སྣེ་ཁྲིད་དེ་ཉམས་ཉེན་ལས་ཐར་བར་འབད་བརྩོན་བྱས་པ་དང་། མི་དམངས་ཀྱིས་རྒྱབ་སྐྱོར་བྱས་པར་བཀའ་དྲིན་ཆེ་ཞུས་པ་ཡིན། ཕྱིན་ཆད་རྒྱལ་ཁབ་ཀྱི་མཐུན་སྒྲིལ་འགྲིག་མཐུན་ལ་རེ་བ་བྱེད་པ་དང་། སྲིད་གཞུང་གསར་བས་འདེམ་བསྐོའི་འགྲན་རྩོད་སྐབས་མང་ཚོགས་ལ་ཁས་ལེན་བྱས་པའི་དམ་བཅའ་ལག་བསྟར་བྱེད་དགོས། དམངས་གཙོ་ཏང་དེ་ངོ་རྒོལ་ཏང་ཡིན་པའི་ཆ་ནས། རྒྱལ་ཚོགས་ནས་འཛུགས་སྐྲུན་རང་བཞིན་གྱི་ནུས་པ་འདོན་རྒྱུ་ཡིན་ཟེར།
 ཁོས་བཤད་རྒྱུར། དམངས་གཙོ་ཏང་གིས་མུ་མཐུད་དུ་ཝེ་ཐེ་ཏང་གིས་སྔོན་ཆད་ཀྱི་ཙུང་ལི་ཐཱ་ཞིན་ལ་གུ་ཡངས་གཏོང་བར་ངོ་རྒོལ་བྱེད་རྒྱུ་ཡིན་ལ། ཝེ་ཐེ་ཏང་གིས་དམངས་ཀྱི་འཚོ་བ་ལེགས་བཅོས་བྱེད་པར་འབད་བརྩོན་བྱེད་དགོས་པའི་འབོད་སྐུལ་བཏང་།
 ཐེ་གོ་རྒྱལ་ཁབ་ཀྱིས་ཚེས་གསུམ་ཉིན་རྒྱལ་ཚོགས་ཀྱི་གྲོས་ཁང་ཞོལ་མའི་འདེམ་བསྐོ་བྱས་པ་དང་། འདེམ་ཤོག་ཐོ་འགོད་བྱས་པའི་མཇུག་འབྲས་ལྟར་ན། གྲོས་མིའི་ལས་གནས་ལྔ་བརྒྱའི་ཁྲོད། ཝེ་ཐེ་ཏང་ལ་ཉིས་བརྒྱ་དང་ལྔ་བཅུ་ལས་བརྒལ་བའི་ལས་གནས་ཐོབ་ཡོད་པ་རེད།