སི་རི་ཡཱའི་ཙུང་ཐུང་པཱ་ཧྲ་ཨར་གྱིས་ཚེས་གཅིག་ཉིན་རྒྱལ་ཁབ་ཀྱི་བཀའ་རྒྱ་བཏང་སྟེ། མི་རིགས་གྲོས་མོལ་ཨུ་ཡོན་ལྷན་ཁང་བཙུགས་ནས་མི་རིགས་གྲོས་མོལ་གྱི་རྨང་གཞི་གཏན་འབེབ་བྱེད་པ་དང་། གྲོས་མོལ་བྱ་བའི་ནང་རྐྱེན་དང་དུས་ཚོད་རེའུ་མིག་གཏན་འཁེལ་བྱེད་པའི་འགན་ཁུར་རྒྱུ་ཁྱབ་སྒྲོག་བྱས། དེ་ནི་པཱ་ཧྲ་ཨར་གྱིས་སི་རི་ཡཱའི་གནས་བབ་ཞི་འཇགས་སུ་གཏོང་བའི་ཆེད་དུ་ཟླ་ལྔ་བའི་ཚེས་སོ་གཅིག་ཉིན་སྲོག་ཐར་བཀའ་རྒྱ་བཏང་སྟེ་ཆབ་སྲིད་བཙོན་མ་ཕྱིར་བཏང་བའི་རྗེས་སུ་སྤྱད་པའི་བྱེད་ཐབས་གལ་ཆེན་ཞིག་རེད།
  ཨུ་ཡོན་ལྷན་ཁང་དེ་སི་རི་ཡཱའི་ཙུང་ཐུང་གཞོན་པ་ཧྲ་ལོས་དང་སྲིད་འཛིན་པའི་ཨ་རབ་བསྐྱར་དར་སྤྱི་ཚོགས་ཏང་དང་རྒྱལ་ཡོངས་ཡར་ཐོན་འཐབ་ཕྱོགས་ཀྱི་མཐོ་རིམ་དཔོན་པོ། རྩོམ་པ་པོ། སློབ་ཆེན་གྱི་དགེ་རྒན་ཆེན་མོ་སོགས་མི་དགུས་གྲུབ་ཡོད།
  བསྒྲགས་པའི་གནས་ཚུལ་ལྟར་ན། ཙུང་ཐུང་པཱ་ཧྲ་ཨར་གྱིས་ཉིན་དེར་མི་རིགས་གྲོས་མོལ་ཨུ་ཡོན་ལྷན་ཁང་གི་ཁོངས་མིར་ཐུག་འཕྲད་བྱས་པ་དང་། ཁོ་ཚོ་དང་མཉམ་དུ་དུས་རིམ་རྗེས་མའི་མི་རིགས་གྲོས་མོལ་གྱི་དེང་སྐབས་ཆབ་སྲིད་དང་སྤྱི་ཚོགས་ཟང་ཟིང་གི་རྣམ་པ་བསྒྱུར་བའི་གལ་ཆེན་རང་བཞིན་ལ་གྲོས་བསྡུར་བྱས།