ཟླ་ལྔ་བའི་ཚེས་སུམ་ཅུ་ཉིན། ཁྲའོ་ཞན་རྒྱལ་སྲུང་ཨུ་ཡོན་ལྷན་ཁང་གིས་ཁྲའོ་ཞན་དང་ཧན་གོའི་ཤར་ཕྱོགས་ས་ཁུལ་གྱི་དམག་དོན་འཕྲིན་གཏོང་ལམ་ཐིག་མེད་པར་བཟོ་རྒྱུ་དང་། ཅིན་ཀང་རི་བོ་ས་ཁུལ་གྱི་འཕྲིན་གཏོང་འབྲེལ་གཏུག་ཁང་གི་སྒོ་བརྒྱག་རྒྱུ་ཁྱབ་སྒྲོག་བྱས། འདི་ནི་ཧན་གོའི་དམག་མི་ཞིག(གཡས)དང་ཁྲའོ་ཞན་གྱི་དམག་མི་ཞིག་གིས་པན་མིན་མགྲོན་ཁང་ཁྲའོ་ཞན་ཕྱེད་གླིང་གི་དམག་དོན་རྒྱལ་མཚམས་ཀྱི་ཕྱོགས་གཉིས་སུ་ལས་འགན་ལག་བསྟར་བྱེད་པའི་རྒྱུ་ཆའི་པར་རིས་རེད།

 ཁྲའོ་ཞན་རྒྱལ་སྲུང་ཨུ་ཡོན་ལྷན་ཁང་གི་མགྲིན་ཚབ་པས་ཟླ་ལྔ་བའི་ཚེས་སུམ་ཅུ་ཉིན་གསལ་སྒྲོག་སྤེལ་ཏེ། ཧན་གོའི་སྲིད་གཞུང་གི་ཁྲའོ་ཞན་ལ་ངོ་རྒོལ་བྱེད་པའི་བྱ་འགུལ་ཉིན་རེ་བཞིན་ཛ་དྲག་ཏུ་གྱུར་བར་དམིགས་ཏེ། ཁྲའོ་ཞན་དམག་དཔུང་དང་མི་དམངས་ཀྱིས་ལིས་མེན་པའོ་སྲིད་གཞུང་བར་འབྲེལ་འདྲིས་བྱེད་རྒྱུ་མིན་པར་མ་ཟད། ཁྲའོ་ཞན་དང་ཧན་གོའི་ཤར་ཕྱོགས་ས་ཁུལ་གྱི་དམག་དོན་འཕྲིན་གཏོང་ལམ་ཐིག་མེད་པར་བཟོ་རྒྱུ་དང་། ཅིན་ཀང་རི་བོ་ས་ཁུལ་གྱི་འཕྲིན་གཏོང་འབྲེལ་གཏུག་ཁང་གི་སྒོ་བརྒྱག་རྒྱུ་ཡིན་ཟེར།
 མགྲིན་ཚབ་པ་དེས་གསལ་སྒྲོག་ནང་བཤད་རྒྱུར། ལིས་མེན་པའོ་སྲིད་གཞུང་གི་ཁྲའོ་ཞན་ལ་ངོ་རྒོལ་བྱེད་པའི་བྱ་འགུལ་ཉིན་རེ་བཞིན་ཛ་དྲག་ཏུ་འགྲོ་བཞིན་ཡོད། ལིས་མེན་པའོ་ཡིས་ཉེ་སྔོན་འཇར་པན་དུ་སོང་ནས་ཉིང་རྡུལ་ནུས་པའི་གནད་དོན་ལ་དམིགས་ཏེ་ཁྲའོ་ཞན་ལ་རྒོལ་གཏམ་བཏང་བ་དང་། ཧན་གོའི་དམག་དཔུང་གིས་ཟླ་ལྔ་བའི་ཚེས་ཉེར་གསུམ་ཉིན་ནས་བཟུང་ཁྲའོ་ཞན་དང་ཧན་གོའི་མཐའ་མཚམས་ས་ཁུལ་གྱི་ཅིན་ཅི་ཏའོ་ས་ཁུལ་དུ་དམག་དོན་སྦྱོང་བརྡར་བྱས། ཧན་གོའི་ཁྲའོ་ཞན་ལ་ངོ་རྒོལ་བྱེད་པའི་བག་འཁུམ་སྟོབས་ཤུགས་ཀྱིས་ད་རུང་རྒྱལ་སྤྱིའི་སྤྱི་ཚོགས་སྟེང་ནས་ཧན་གོའི་ཙུང་ཐུང་ཆོན་ཏིག་ཧོན་གྱི་སྐབས་སུ་བྱུང་བའི་ཟླ་ལྔ་བའི་ཚེས་བཅོ་བརྒྱད་ཀྱི་ཀོང་ཀྲིག་དོན་རྐྱེན་དེ་ཁྲའོ་ཞན་དམིགས་བསལ་དམག་དཔུང་གིས་བསླངས་པར་འུར་སྒྲོག་བྱེད་བཞིན་ཡོད་ཟེར།