རྟེན་གཞི་རྩ་འཛུགས་ཨ་རབ་ཕྱེད་གླིང་ཡན་ལག་རྩ་འཛུགས་ཀྱིས་ཚེས་ཉེར་བརྒྱད་ཉིན་གསལ་སྒྲོག་སྤེལ་ནས། རྩ་འཛུགས་དེས་ཡེ་མིན་ལྷོ་ཕྱོགས་ཀྱི་ཨ་པིས་དབྱང་ཞིང་ཆེན་ཆགས་སའི་གྲོང་ཁྱེར་ཅིན་ཅི་པར་བཙན་བཟུང་བྱས་པ་ཡིན་ཞེས་བཤད་པར་མ་ཟད། གྲོང་ཁྱེར་དེ་ནི་རྟེན་གཞི་རྩ་འཛུགས་ཀྱིས་ཡེ་མིན་ལྷོ་ཕྱོགས་ནས་དབྱི་སི་ལན་ཚོ་དཔོན་རྒྱལ་ཁབ་འཛུགས་པའི་རྒྱལ་ས་ཡིན་ཞེས་བསྒྲགས།
 རྟེན་གཞི་རྩ་འཛུགས་ཨ་རབ་ཕྱེད་གླིང་ཡན་ལག་རྩ་འཛུགས་ཀྱི་དྲག་ཆས་མི་སྣས་ཚེས་ཉེར་བརྒྱད་ཉིན་ཨ་པིས་དབྱང་ཞིང་ཆེན་ནས་ས་དེའི་སྡོད་དམངས་རྣམས་ལ་གསལ་སྒྲོག་དེ་བསྒྲགས།
 བསྒྲགས་པའི་གནས་ཚུལ་ལྟར་ན། རྟེན་གཞི་རྩ་འཛུགས་ཀྱིས་ཅིན་ཅི་པར་གྲོང་ཁྱེར་བཟུང་རྗེས། ཕལ་ཆེར་ཨ་པིས་དབྱང་ཞིང་ཆེན་གྱི་ས་ཆ་ཚང་མ་རྟེན་གཞི་རྩ་འཛུགས་ཀྱིས་བཙན་བཟུང་བྱས་ཟེར།
 ཨ་པིས་དབྱང་ཞིང་ཆེན་གྱི་སྲིད་གཞུང་གི་དཔོན་རིགས་ཤིག་གིས་ཞིན་ཧྭ་གསར་འགྱུར་ཁང་གི་གསར་འགོད་པར་བཤད་རྒྱུར། རྟེན་གཞི་རྩ་འཛུགས་ཨ་རབ་ཕྱེད་གླིང་ཡན་ལག་རྩ་འཛུགས་ཀྱི་དྲག་ཆས་མི་སྣས་ཚེས་ཉེར་བདུན་ཉིན་ཅིན་ཅི་པར་གྲོང་ཁྱེར་གྱི་ས་ཁུལ་ཚང་མ་བཙན་བཟུང་བྱས་ཟེར།
 རྟེན་གཞི་རྩ་འཛུགས་ཨ་རབ་ཕྱེད་གླིང་ཡན་ལ་རྩ་འཛུགས་ནི་ཉིས་སྟོང་དགུ་ལོའི་ལོ་མགོར་རྟེན་གཞི་རྩ་འཛུགས་སོ་ཏི་ཨ་རབ་ཡན་ལག་རྩ་འཛུགས་དང་ཡེ་མིན་ཡན་ལག་རྩ་འཛུགས་གཉིས་མཉམ་བསྲེས་བྱས་ནས་བཙུགས་པ་ཡིན་ལ། དེའི་རྗེས་སུ་ཉིས་སྟོང་དགུ་ལོའི་ཨ་མེ་རི་ཁའི་ཡེ་ཤུའི་འཁྲུངས་སྐར་གྱི་སྐབས་སུ་གནམ་གྲུ་འགས་གཏོར་གཏོང་རྩིས་བྱས་ནས་ལེགས་འགྲུབ་མ་བྱུང་བའི་དོན་རྐྱེན་དང་ཉིས་སྟོང་བཅུ་ལོའི་ཨ་མེ་རི་ཁར་འགྲོ་བའི་གནམ་གྲུའི་སྟེང་དུ་འགད་རྫས་ཡོད་པའི་རས་ཐུམས་བཞག་པ་སོགས་འཇིགས་སྐུལ་འཇབ་རྒོལ་དོན་རྐྱེན་རབ་དང་རིམ་པ་བཟོས། ཨ་པིས་དབྱང་ཞིང་ཆེན་ནི་རྟེན་གཞི་རྩ་འཛུགས་ཨ་རབ་ཕྱེད་གླིང་ཡན་ལག་རྩ་འཛུགས་ཀྱི་ས་གནས་གཙོ་བོ་ཞིག་རེད།