ཨུ་རུ་སིའི་ཙུང་ཐུང་མེ་ཏི་ཝེ་ཅེ་ཧྥུའུ་ཡིས་ཚེས་ཉེར་བརྒྱད་ཉིན་ཨ་ཧྥེ་རི་ཁ་ལྷོ་མ་རྒྱལ་ཁབ་ཀྱི་ཙུང་ཐུང་ཙུའུ་མ་ལ་ཁ་པར་བཏང་སྟེ་ལི་པི་ཡའི་གནད་དོན་སྐོར་གླེང་བ་དང་། ཕྱོགས་གཉིས་ཀྱིས་ལི་པི་ཡའི་གནས་བབ་ཇི་ལྟར་ཐག་གཅོད་པའི་ཐད་ནས་བསམ་ཚུལ་བརྗེ་རེས་བྱས།
 ཨུ་རུ་སིའི་ཙུང་ཐུང་གསར་འགྱུར་ཁང་གིས་ཉིན་དེར་བསྒྲགས་པ་ལྟར་ན། མེ་ཏི་ཝེ་ཅེ་ཧྥུའུ་ཡིས་ཁ་པར་གཏོང་སྐབས། ཨུ་རུ་སིས་ཨ་ཧྥེ་རི་ཁའི་རྒྱལ་ཁབ་ཀྱིས་ལི་པི་ཡའི་དྲག་ཤུགས་དོན་རྐྱེན་མྱུར་དུ་མཚམས་འཇོག་པ་དང་། ལི་པི་ཡའི་མི་དམངས་ཀྱིས་ཕྱི་ཕྱོགས་ཀྱི་ཐེ་གཏོགས་དང་བྲལ་ནས་རང་གི་གནད་དོན་ཐག་གཅོད་པར་འབད་བརྩོན་བྱེད་པར་རྒྱབ་སྐྱོར་བྱེད་པ་ཡིན་ཞེས་བཤད་ཟེར།
 ཙུའུ་མ་ཡིས་ཨུ་རུ་སིས་ལི་པི་ཡ་ལ་ཨུ་རུ་སིའི་ཙུང་ཐུང་གི་ཆེད་མངགས་ཕོ་ཉ་མར་ཀི་ལོ་ཧྥུའུ་མངགས་པར་གདེང་འཇོག་མཐོན་པོ་བྱས་པར་མ་ཟད། ཨ་ཧྥེ་རི་ཁ་མནམ་འབྲེལ་གྱིས་ཨུ་རུ་སི་ལ་མཉམ་ལས་བྱེད་འདོད་ཡོད་ཅེས་བཤད་ཟེར།