ཨ་མེ་རི་ཁའི་ཙུང་ཐུང་ཨོ་པཱ་མཱ་ཡིས་ཚེས་བཅུ་དགུ་ཉིན་ཧྥོ་ཅི་ནེ་ཡཱ་བྱང་མ་ཀྲིག་གི་སྡོད་ཁུལ་སློབ་གླིང་ནས་གཏམ་བཤད་སྤེལ་སྐབས་ཨ་མེ་རི་ཁའི་ལས་རིགས་སོ་སོས་ནོར་སྲིད་འགྲོ་སོང་ཇེ་ཉུང་དུ་གཏོང་བའི་ཐད་མཉམ་དུ་འགན་ཁུར་དགོས་པའི་འབོད་སྐུལ་བཏང་།
 ཨོ་པཱ་མཱ་ཡིས་བཤད་རྒྱུར། ཕོ་བྲང་དཀར་པོས་གཟའ་འཁོར་སྔོན་མར་ཁྱབ་སྒྲོག་བྱས་པའི་འགྲོ་སོང་ཇེ་ཉུང་དུ་གཏོང་བའི་རྒྱང་རིང་འཆར་གཞི་དེ་འགྲོ་སོང་ཇེ་ཉུང་དུ་གཏོང་བ་དང་ཨ་མེ་རི་ཁའི་དཔལ་འབྱོར་དར་རྒྱས་འབྱུང་བར་ཕན་པ་ཡོད་ཟེར། ཁོས་ཨ་མེ་རི་ཁའི་ལས་རིགས་སོ་སོས་འགྲོ་སོང་ཇེ་ཉུང་དུ་གཏོང་བའི་ཐད་མཉམ་དུ་འགན་ཁུར་དགོས་ལ། ཕྱུག་པོ་རྣམས་ཀྱིས་ཀྱང་དོན་དེའི་ཐད་བྱས་རྗེས་འཇོག་དགོས་ཟེར།
 ཨོ་པཱ་མཱ་ཡིས་ད་རུང་ནན་གྱིས་བསྟན་དོན། ཨ་མེ་རི་ཁ་རྒྱལ་ཁབ་ཀྱིས་ངེས་པར་དུ་རྨང་གཞིའི་སྒྲིག་ཆས་དང་དག་གཙང་ནུས་ཁུངས། ཁྱབ་ཁོངས་གཞན་པར་ཕན་ནུས་ལྡན་པའི་སྒོ་ནས་མ་དངུལ་བཏང་སྟེ་རྒྱལ་ཁབ་ཀྱི་འགྲན་རྩོད་ནུས་པ་ཇེ་ཆེར་གཏོང་དགོས་ཟེར།
 ཨོ་པཱ་མཱ་ཡིས་ཚེས་བཅུ་གསུམ་ཉིན་ཨ་མེ་རི་ཁའི་སྲིད་གཞུང་གི་མ་འོངས་པའི་ལོ་ངོ་བཅུ་གཉིས་རིང་ཨ་མེ་རི་ཁའི་སྒོར་མོ་དུང་ཕྱུར་ཁྲི་བཞིའི་འགྲོ་སོང་ཇེ་ཉུང་དུ་གཏོང་བའི་རྒྱང་རིང་དམིགས་འབེན་བཏོན་པར་མ་ཟད། ཕྱོགས་བཞི་ནས་འགུལ་སྐྱོད་སྤེལ་ཏེ་རྒྱལ་སྲུང་སྔོན་རྩིས་འགྲོ་སོང་གྲོན་ཆུང་བྱེད་པ་དང་། སྨན་བཅོས་འགྲོ་སོང་ཆུད་ཟོས་སུ་མི་གཏོང་བ། རྒྱལ་ནང་གི་འགྲོ་སོང་ལ་ཚོད་འཛིན་བྱེད་པ། རྒྱལ་ཕྲན་མཉམ་འབྲེལ་གྱི་ཁྲལ་བསྡུའི་གྲུབ་ཚུལ་བཅོས་བསྒྱུར་བྱེད་པ་སོགས་ནོར་སྲིད་དོ་མཉམ་པ་མངོན་འགྱུར་བྱེད་རྒྱུའི་ཚུལ་བསྟན།