ཁི་ལོ་ཏི་ཡཱའི་ཙུང་ཐུང་ཡོ་ཞི་པོ་ཝེ་ཆི་ཡིས་ཚེས་དགུ་ཉིན་བཤད་རྒྱུར། ཁི་ལོ་ཏི་ཡཱ་རྒྱལ་ཁབ་ཉིས་སྟོང་བཅུ་གསུམ་ལོའི་ཟླ་དང་པོའི་ཚེས་གཅིག་ཉིན་དངོས་སུ་ཡོ་རོབ་གླིང་མནའ་འབྲེལ་ནང་ཞུགས་པའི་རེ་བ་ཡོད་པ་དང་། དམིགས་འབེན་དེ་ལ་འགྲན་རྩོད་རང་བཞིན་ཡོད་ཀྱང་དེ་མངོན་འགྱུར་བྱས་ཆོག་པའི་དམིགས་འབེན་ཞིག་རེད་ཟེར།
 ཡོ་རོབ་གླིང་མནའ་འབྲེལ་ནང་ཞུགས་པ་ནི་ཁི་ལོ་ཏི་ཡཱ་སྲིད་གཞུང་གི་ཉེ་བའི་ལོ་འགའི་རིང་གི་དོན་ཆེན་ཞིག་ཡིན་པ་དང་། ཁི་ལོ་ཏི་ཡཱའི་འཕྲིན་གཏོང་ཁང་གིས་བསྒྲགས་པའི་གནས་ཚུལ་ལྟར་ན། ཡོ་ཞི་པོ་ཝེ་ཆི་ཡིས་ཉིན་དེར་རྒྱལ་ས་སཱ་ཀི་ལེ་པུའུ་ནས་འགྲེམ་སྟོན་ཞིག་ལ་བལྟས་རྗེས་བཅར་འདྲི་དང་ལེན་བྱེད་སྐབས་བཤད་རྒྱུར། ཁི་ལོ་ཏི་ཡཱ་ཡོ་རོབ་གླིང་མནའ་འབྲེལ་ནང་ཞུགས་པའི་གྲོས་མོལ་དེ་མིག་སྔར་མཇུག་སྒྲིལ་ལ་ཉེ་བ་དང་། གྲོས་མོལ་མཇུག་རྫོགས་རྗེས་ཟླ་ངོ་འགའི་རིང་འབྲེལ་ཡོད་ཆིངས་ཡིག་འགོད་པར་གྲ་སྒྲིག་བྱེད་དགོས་ཟེར། རྒྱལ་ཁབ་རེ་འགའི་གྲོས་ཁང་གི་མཆན་བཀོད་སྒྲིག་རིམ་རྙོག་འཛིང་ཆེ་བའི་དབང་གིས་ཁི་ལོ་ཏི་ཡཱ་རྒྱལ་ཁབ་ཡོ་རོབ་གླིང་མནའ་འབྲེལ་ནང་དངོས་སུ་ཞུགས་པར་མཆན་བཀོད་སྒྲིག་རིམ་ངེས་ཅན་ཞིག་བརྒྱུད་དགོས་པ་རེད་ཟེར།