ཧྥ་རན་སི་རྒྱལ་ཁབ་ལ་ནམ་རྒྱུན་རིམ་པ་གཉིས་པའི་མེ་འཁོར་འདུག་སྟེགས་ཀྱི་འཛིན་བྱང་བཟུང་ནས་རིམ་པ་རྩེ་གྲས་ཀྱི་མེ་འཁོར་འདུག་སྟེགས་ལ་འདུག་པའི་རྒྱལ་ཁབ་ཅིག་ཏུ་ངོས་འཛིན་བྱེད་ཀྱིན་ཡོད། དེའི་རྒྱུ་མཚན་ནི་ཧྥ་རན་སིས་རྒྱུན་པར་རྒྱལ་སྤྱིའི་ཐོག“རང་གི་ནུས་སྟོབས་ལས་བརྒལ་བའི་སྟོབས་ཤུགས་འདོན་སྤེལ”བྱེད་བཞིན་པ་དང་། སྐབས་སྐབས་སུ་ད་དུང“ཚད་ལས་བརྒལ་བ”དང་། “མི་རྣམས་ཧ་ལས་དགོས་པའི”བྱ་སྤྱོད་རེ་གཉིས་སྤེལ་བཞིན་ཡོད།
   སྔོན་ཆད་ཨེ་ལེ་ཧྲིག་ཕོ་བྲང་ནས་ཁ་ཀྲ་ཧྥེས་འཚམས་འདྲིར་ཡོང་བར་དགའ་བསུ་གཟབ་རྒྱས་བྱས་པ་ནས། དེང་གི་ཆ་ལ་གདོང་ལ་བུད་དེ་ལི་པི་ཡ་རྒྱལ་ཁབ་ཀྱི་ངོ་རྒོལ་ཕྱོགས་ཁག་ཁས་བླངས་བའི་མི་ཚད་ད་དུང་ལི་པི་ཡ་ལ་བར་སྣང་ནས་ཆམ་ཕབ་སྟེར་མཁན་གྱི་རྒྱལ་ཁབ་ཐོག་མར་གྱུར་པས། ཧྥ་རན་སི་རྒྱལ་ཁབ་ཀྱི་བྱ་སྤྱོད་ལ་དངོས་གནས“མི་རྣམས་ཧ་ལས་དགོས་པ”ཞིག་རེད། ཤུགས་གང་ཡོད་ཀྱིས་རྒྱལ་སྤྱིའི་སྤྱི་ཚོགས་ཀྱི་སྟོབས་ཤུགས་སྒུལ་ནས་ཐེ་གཏོགས་བྱེད་པ་དང་། མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ལ་གྲོས་ཆོད་ཨང1973ལ་གྲོས་འཆམས་འབྱུང་བར་ཡར་སྐུལ་གཏོང་བ། རྒྱལ་ས་པ་ལི་ནས་ལི་པི་ཡ་རྒྱལ་ཁབ་ལ་ལག་འགུལ་ལམ་མི་འགུལ་དང་། ལག་འགུལ་ན་ཇི་ལྟར་འགུལ་བའི་སྐོར་ལ་ཐག་གཅོད་པ་སོགས་ཀྱིས། ལི་པི་ཡ་རྒྱལ་ཁབ་ཀྱི་ཆག་འཇིགས་ཤིག་གིས་ཧྥ་རན་སི་རྒྱལ་ཁབ་སྐད་ཅིག་ཉིད་ལ་འཛམ་གླིང་གར་སྟེགས་ཐོག་གི་འཁྲབ་སྟོན་པ་གཙོ་བོ་ཞིག་ལ་འགྱུར་དུ་བཅུག ཧྥ་རན་སི་རྒྱལ་ཁབ་ཀྱིས་དེ་ལ་སྒྲུབ་བྱེད་ཀྱི་རྒྱུ་མཚན་བཀོད་པ་ནི། ལི་པི་ཡ་རྒྱལ་ཁབ་ལ་ད་ལྟ“མི་ཆོས་རིང་ལུགས་ཀྱི་ཆག་འཇིགས”ཆེན་པོ་ཞིག་འབྱུང་བཞིན་པའམ་ཡང་ན་ཅང་མི་འགོར་བར་འབྱུང་སྲིད་པས། རྒྱལ་སྤྱིའི་སྤྱི་ཚོགས་ལ་དེ་འགོག་རྒོལ་བྱེད་པའི་འགན་འཁུར་ཡོད་ཅེས་པ་དེ་རེད། 
   ཡིན་ནའང་། དེའི་རྒྱུ་རྐྱེན་དངོས་ནི“མི་ཆོས་རིང་ལུགས་ཀྱི་ཐེ་གཏོགས་ཟེར་བ”ལས་ཀྱང་རྙོག་འཛིང་ལྷག་ཏུ་ཆེ། ཨ་མེ་རི་ཁའི་དབྱེ་ཞིབ་པས་བལྟས་ན། ཧྥ་རན་སི་རྒྱལ་ཁབ་ཀྱིས་དེ་ལྟར“སྣ་ཁྲིད”བྱེད་དོན་ནི། ཕྱོགས་གཅིག་ནས་ལི་པི་ཡ་རྒྱལ་ཁབ་དེ་ནུས་ཁུངས་ཕྱིར་གཏོང་རྒྱལ་ཁབ་དང་མཚོན་ཆ་འཛད་སྤྱོད་ཆེས་ཆེ་བའི་རྒྱལ་ཁབ་ཅིག་ཡིན་པའི་རྐྱེན་དང་། ཕྱོགས་གཞན་གཅིག་ནས་རྒྱལ་ཁབ་དེའི་རྒྱལ་ནང་གི་ཆབ་སྲིད་དང་ཡོ་རུབ་མནའ་འབྲེལ་ནང་ཁུལ་གྱི་ཁེ་ཕན་རང་སྲུང་བྱེད་པར་འབྲེལ་བ་ཆེན་པོ་ཡོད། ཧྥ་རན་སི་རྒྱལ་ཁབ་ཀྱི་རྒྱལ་ནང་གི་ཆབ་སྲིད་ལ་བལྟས་ན་ཀུན་སློང་ཆེན་པོ་སྣ་གཉིས་ཡོད་དེ། གཅིག་ནི་དང་ཐོག་ནོར་འཁྲུལ་གྱི་སྒོ་ནས་ཨ་རབ་འཇིག་རྟེན་དུ་དམངས་གཙོའི་རྦ་རླབས་འཕྱུར་བཞིན་པར་ཁ་གཏད་འཇལ་བའི་ཁ་གསབ་བྱས་པ་དེ་རེད། གཉིས་ནི་ཧྥ་རན་སིའི་ཙུང་ཐུང་སཱ་ཁི་ཆིས་ཀྱིས་རྫིག་ཉམས་ཆེ་མདོག་གི་ཕྱི་འབྲེལ་བྱ་སྤྱོད་ལ་ཁ་གཡར་ནས་དེའི་རྒྱལ་ནང་གི་རོགས་སྐྱོར་ཐོབ་ཐུབ་པའམ་ཡང་ན་རོགས་སྐྱོར་ཐོབ་ཚད་སྲུང་འཛིན་བྱེད་ཐུབ་པའི་རེ་བ་བཅངས་ཡོད་ཅིང་། ཡོ་རུབ་མནའ་འབྲེལ་ནང་ཁུལ་དུ། ཧྥ་རན་སི་རྒྱལ་ཁབ་ཀྱིས་རྒྱལ་སྤྱིའི་དངུལ་རྩའི་ཉམས་ཉེན་བྱུང་བ་དང་། ལྷག་པར་དུ་ཡོ་རུབ་དངུལ་དོམ་ཉམས་ཉེན་བྱུང་བ་ནས་བཟུང་། འཇར་མན་གྱིས་ཡོ་རུབ་མནའ་འབྲེལ་ནང་ཁུལ་ནས་རང་ཚུགས་ཆེ་བའི་རྣམ་པ་ཞིག་བཟུང་བ་དེ་བསྒྱུར་བ་དང་། སྐབས་གླགས་འདིར་བརྟེན་ནས་ཡོ་རུབ་གླིང་དང་ཁྱད་པར་དུ་འཇར་མན་ལ་ཧྥ་རན་སི་རྒྱལ་ཁབ་ཀྱིས་སྔར་བཞིན་དུ་ཡོ་རུབ་གླིང་སྐམ་སའི་ཕྱི་འབྲེལ་དང་དམག་དོན་བྱ་བཞག་རྣམས་ལ་གཙོ་འགན་འཁུར་བཞིན་ཡོད་ལ། གལ་ཏེ་ཡོ་རུབ་གླིང་གིས་རང་ཉིད་སྟོབས་ལྡན་དངོས་ཕུང་ཞིག་གི་ངོས་ནས་འཛམ་གླིང་ཡོངས་ཀྱིས་ལྟ་སྟངས་ནན་པོ་འཛིན་ཡུལ་དུ་བྱེད་འདོད་ན། དེ་ལ་ཧྥ་རན་སི་རྒྱལ་ཁབ་ཀྱི་དམག་ཤུགས་ཀྱི་རོགས་སྐྱོར་ཡོད་དགོས་པའི་བསམ་ཚུལ་གསལ་བོར་སྟོན་འདོད་པ་དེ་རེད། 
 1956ལོར། ཧྥ་རན་སི་དང་དབྱིན་ཇི་རྒྱལ་ཁབ་གཉིས་ཀྱིས་མཉམ་དུ་ཤུགས་རྐྱེན་ཐེབས་ཚད་ཆེ་བའི་སུའུ་དབྱིས་ཧྲི་མཚོ་ལམ་དམག་འཁྲུག་བསླངས་མོད། འོན་ཀྱང་ཕམ་ཁ་ཉོས་པའི་དམག་འཁྲུག་དེས་ཧྥ་རན་སི་རྒྱལ་ཁབ་ཀྱི་སྐད་སྒྲ་ཇེ་ཆུང་དུ་བཏང་བ་ཚབས་ཆེ་བས། ཧྥ་རན་སི་རྒྱལ་ཁབ་ཀྱིས་རྒྱལ་སྤྱིའི་གར་སྟེགས་ཐོག་གི་ཤུགས་རྐྱེན་ཐེབས་ཚད་ཡང་བསྐྱར་སླར་གསོ་བྱེད་བསམས་པ་དེ་དུས་སྐབས་སོ་སོའི་སྲིད་གཞུང་གི་ལས་འགན་གལ་ཆེན་ཞིག་ཏུ་གྱུར་ཡོད། ཏེ་གོ་ལི་ཡིས་སྔོན་ཆད་གསོང་པོའི་ཚིག་གིས། ཧྥ་རན་སི་རླབས་ཆེ་བའི་རྒྱལ་ཁབ་ཅིག་ཏུ་མ་གྱུར་ན། ཧྥ་རན་སི་མིན་པའི་རྟགས་རེད་ཅེས་བཤད་མྱོང་། དུས་ད་ལྟའི་བར་ད་དུང་ཧྥ་རན་སི་རྒྱལ་ཁབ་ཀྱི་མི་མང་པོ་ཞིག་གིས་སྐད་ཆ་དེ་ཧྥ་རན་རྒྱལ་ཁབ་ཀྱི་གནས་ཐིག་གཏན་ཁེལ་བྱེད་ས་ཞིག་ཡིན་པར་རློམ་ཡོད། “རླབས་ཆེ་བ”ཞེས་པའི་མིང་དེ་སྲུང་འཛིན་བྱེད་ཆེད། རྒྱལ་སྤྱིའི་བྱ་བཞག་མང་པོ་ཞིག་ཐག་གཅོད་བྱེད་པའི་ཁྲོད། ང་ཚོས་ཁྱད་ཆོས་མངོན་གསལ་ཆེ་བའི“ཧྥ་རན་སི་རྒྱལ་ཁབ་ཀྱི་སྣང་ཚུལ”དེ་གཅིག་མིན་གཉིས་མིན་དུ་མཐོང་ཐུབ། ཁ་སང་དེ་རིང་ཧྥ་རན་སི་རྒྱལ་ཁབ་ལི་པི་ཡ་དང་། ཁི་ཐི་ཏིས་ཝ། ཨ་ཧྥུ་ཧན་བཅས་ཀྱི་དམག་འཁྲུག་གསུམ་གའི་ནང་ཚུད་ཡོད་པ་དེ་ཡང་།“ཧྥ་རན་སི་རྒྱལ་ཁབ་ཀྱི་སྣང་ཚུལ”དེ་ཡང་བསྐྱར་ཐེངས་ཤིག་ལ་གཅིག་བསྡུས་སུ་མཚོན་པ་ཞིག་རེད།
   ཧྥ་རན་སི་རྒྱལ་ཁབ་ཀྱི་ཕྱི་འབྲེལ་དེ་རྒྱུན་པར“སྒེར་ཚུགས་སྒེར་གཅོད”བྱེད་པའི་ཁྱད་རྟགས་མངོན་ཆེ་ཞིང་། ནང་སྒོས་སུ་འཛམ་གླིང་འཁྲུག་ཆེན་གཉིས་པའི་རྗེས་སུ། འཛམ་གླིང་དུ་ཨ་མེ་རི་ཁ་དང་སུའུ་ལེན་རྒྱལ་ཁབ་གཉིས་འགྲན་པའི་དོ་ཟླར་ལངས་པའི་གནས་བབ་བྱུང་བ་དེས། ཧྥ་རན་སི་རྒྱལ་ཁབ་ལ་རྩ་ཆེའི་བྱ་འགུལ་སྤེལ་སའི་ཁོང་གསེང་ཞིག་འདོན་སྤྲོད་བྱས་པ་རེད། འཇམ་འཐབ་མཇུག་སྒྲིལ་རྗེས། ཧྥ་རན་སི་རྒྱལ་ཁབ་ཀྱི་ཕྱི་འབྲེལ་དེ་དུས་སྐབས་ཤིག་ལ་ཉམས་དམའ་བའི་གནས་ཚུལ་བྱུང་། དེ་ནི་ཧྥ་རན་སི་རྒྱལ་ཁབ་ལ“སྒེར་ཐེག་བྱེད་པའི”གོ་སྐབས་འབྱུང་ཚད་སྔོན་ཆད་ལས་ཆེས་ཉུང་དུ་སོང་བས་རེད།  ཧྥ་རན་སི་རྒྱལ་ཁབ་ཀྱིས“སྒེར་གཅོད་སྒེར་སྒྲུབ”བྱེད་པར་མ་རྩ་དགོས་ཤིང་།“ཧྥ་རན་སི་རྒྱལ་ཁབ་ཀྱི་སྣང་ཚུལ”ལ་ཡོ་རུབ་མནའ་འབྲེལ་གྱི་རྒྱབ་རྟེན་དགོས་པའི་ངོས་ཟིན་ཉིན་རེ་ལས་ཉིན་རེར་གསལ་བོ་བྱུང་། དེ་ལྟར། ཧྥ་རན་སི་རྒྱལ་ཁབ་ཀྱིས་རྒྱལ་སྤྱིའི་གར་སྟེགས་ཐོག་རྒྱུན་པར“ངོ་གཉིས་མའི”གདོང་མདོག་སྟོན་གྱིན་ཡོད་ལ། གཅིག་ནི་སྔར་བཞིན་དུ་གོ་སྐབས་ཡོད་ཚད་དམ་འཛིན་བྱས་ཏེ“སྒེར་འཐབ་སྒེར་འཛིང”བྱེད་པའི་ཧྥ་རན་སི་རྒྱལ་ཁབ་ཀྱི་གདོང་མདོག་ཡིན་པ་དང་། ཅིག་ཤོས་ནི་ཤེད་ཤུགས་ཆེན་པོས་ཡོ་རུབ་མནའ་འབྲེལ་གྱིས་འཛུགས་སྐྲུན་བྱེད་པའི་ཧྥ་རན་སི་རྒྱལ་ཁབ་ཀྱི་གདོང་མདོག་རེད། ལོ་ངོ་མང་པོའི་རིང་ལ། ཧྥ་རན་སི་རྒྱལ་ཁབ་ཀྱིས་ཡོ་རུབ་གླིང་གཞི་གཅིག་ཅན་དང་། ནང་སྒོས་སུ“ཆབ་སྲིད་ཡོ་རུབ་གླིང་།”ཞེས་པ་དང་།“འགོག་སྲུང་ཡོ་རུབ་གླིང་།”ཞེས་པའི་འཛུགས་སྐྲུན་ཕྱོགས་ནས་སྤྲོ་སེམས་ཆེན་པོ་མངོན་པ་རེད། 2008ལོར་ཧྥ་རན་སི་རྒྱལ་ཁབ་ཀྱིས་རང་ཉིད་ཡོ་རུབ་མནའ་འབྲེལ་རེས་སྐོར་ཀྲུའུ་ཞི་ཡིན་པའི་ཐོབ་ཐང་ཐོག་ནས་ཨུ་རུ་སི་རྒྱལ་ཁབ་དང་ཀི་ལོའུ་ཅིས་ཡ་རྒྱལ་ཁབ་གཉིས་བར་གདོང་གཏུག་བྱུང་བར་འདུམ་འགྲིག་བྱས་ནས་གཟུ་འགྲིག་ཏུ་བཅུག་པ་ལ། དེ་ཡང་ཚད་ངེས་ཅན་ཞིག་གི་སྟེང་ནས་ཧྥ་རན་སི་རྒྱལ་ཁབ་ཀྱི་རྒྱབ་རྩ་ན་ཡོ་རུབ་མནའ་འབྲེལ་གྱི་ཁོངས་མིའི་རྒྱལ་ཁབ་ཡོངས་རྫོགས་ལངས་ཡོད་པས་རེད། ད་རེབ་ཀྱི་ལི་པི་ཡ་རྒྱལ་ཁབ་ལ་དམག་དོན་ཆམ་ཕབ་གཏོང་བ་ལག་བསྟར་བྱེད་པའི་ཁྲོད། ཧྥ་རན་སི་རྒྱལ་ཁབ་ཀྱིས་དབྱིན་ཇི་རྒྱལ་ཁབ་ལ་ལག་འཐེན་བྱེད་པའི་ཞོར་ནས། ད་དུང་ཨ་མེ་རི་ཁ་ལའང་གསེད་བཀྲོལ་སྣ་ཚོགས་ཀྱིས་འཐད་པ་བྱུང་དུ་བཅུག་སྟེ། ནུབ་ཕྱོགས་ཀྱི་རྒྱལ་ཁབ་མང་པོའི་མནའ་འབྲེལ་བཙུགས་པ་རེད།
  འཛམ་གླིང་ལ་འགྱུར་ལྡོག་ཆེན་པོ་འབྱུང་བཞིན་པས། “ཧྥ་རན་སི་རྒྱལ་ཁབ་ཀྱི་སྣང་ཚུལ”ལའང་འགྱུར་ལྡོག་གསར་བ་བྱུང་བ་རེད། །