དབྱི་ལིང་གི་ཙུང་ཐུང་ནེ་ཅཱ་ཏི་ཡིས་ཚེས་ཉི་ཤུ་ཉིན་གྲོས་ཁང་ལ་སྤྱི་གྲངས་ཨ་མེ་རི་ཁའི་སྒོར་མོ་དུང་ཕྱུར་སྟོང་གཅིག་དང་བརྒྱད་བརྒྱ་ཡིན་པའི་ལོ་རྗེས་མའི་སྔོན་རྩིས་འགྲོ་སོང་སྙན་ཞུ་སྤྲད།
  ནེ་ཅཱ་ཏི་ཡིས་གྲོས་ཁང་ནས་གཏམ་བཤད་སྤེལ་སྐབས། ཁོའི་སྲིད་གཞུང་གིས་མུ་མཐུད་དུ་ཁ་གསབ་རོགས་དངུལ་མེད་པར་གཏོང་བ་དང་བཅས་པའི་དཔལ་འབྱོར་བཅོས་བསྒྱུར་འཆར་གཞི་ལག་བསྟར་བྱས་ཏེ་སྤྱི་ཚོགས་ཀྱི་འདྲ་མཉམ་མིན་པའི་སྣང་ཚུལ་ཇེ་ཉུང་དུ་གཏོང་རྒྱུ་མ་ཟད། རྡོ་སྣུམ་གྱི་ཡོང་སྒོར་བརྟེན་ཚད་ཇེ་ཆུང་དུ་བཏང་ནས་དབུལ་ཕྱུག་གི་ཁྱད་པར་མེད་པར་གཏོང་རྒྱུ་ཡིན་ཟེར། ཁོས་སྔོན་རྩིས་འགྲོ་སོང་གསར་བ་དེ་མངོན་གསལ་དང་ཆ་ཚང་། སྟབས་བདེ་ཡིན་པར་བཤད་པ་དང་། གྲོས་ཁང་གིས་གང་མགྱོགས་ཀྱིས་སྔོན་རྩིས་འགྲོ་སོང་དེར་ཆོག་མཆན་འགོད་དགོས་པའི་རེ་བ་བཏོན།
  རྒྱུན་སྲོལ་ལྟར་ན་དབྱི་ལིང་གི་ཙུང་ཐུང་གིས་ལོ་རེའི་ཟླ་བཅུ་གཉིས་པའི་ཟླ་མགོར་གྲོས་ཁང་ལ་ལོ་རྗེས་མའི་སྔོན་རྩིས་འགྲོ་སོང་སྙན་ཞུ་སྤྲོད་དགོས་པ་རེད། ད་ལོར་ནེ་ཅཱ་ཏི་ཡིས་གྲོས་ཁང་ལ་སྔོན་རྩིས་འགྲོ་སོང་སྙན་ཞུ་སྤྲོད་པའི་དུས་ཚོད་ཟླ་ངོ་གཉིས་ལྷག་གིས་ཕྱིར་འགྱངས་བྱས་པ་དང་། དབྱི་ལིང་ས་གནས་གསར་འགྱུར་ལས་རིགས་ཀྱིས་བལྟས་ན། བྱ་སྤྱོད་དེ་ལས་སྔོན་རྩིས་འགྲོ་སོང་སྙན་ཞུ་དེ་གྲོས་ཁང་ནས་འགོར་འགྱངས་བྱེད་པའི་དུས་ཚོད་ཇེ་ཐུང་དུ་བཏང་བ་དང་། གྲོས་ཁང་གིས་སྔོན་རྩིས་འགྲོ་སོང་དེར་དཔྱད་ཞིབ་ནན་མོ་བྱེད་ཐབས་མེད་པར་འདོད།