ཁམ་ཕུ་ཁྲེ་རྒྱལ་ཁབ་ཀྱི་དབུ་བཞུགས་བློན་ཆེན་ཧོང་སིན་གྱིས་ཚེས་བཅུ་གཉིས་ཉིན་ཅིན་པེན་ནས་བསྟན་དོན། ཁོས་ཀྲུང་གོའི་འཚམས་འདྲི་བྱེད་པའི་དམིགས་ཡུལ་ནི་སྔར་ལས་ལྷག་པའི་སྒོ་ནས་ཁམ་ཕུ་ཁྲེ་དང་ཀྲུང་གོའི་ཁྱབ་ཁོངས་སོ་སོའི་མཛའ་མཐུན་མཉམ་ལས་འབྲེལ་བར་ཤུགས་སྣོན་པའི་ཆེད་དུ་ཡིན་ཟེར།
 ཧོང་སིན་ཅིན་པེན་གྲོང་ཁྱེར་ཉེ་འདབས་ཀྱི་ནང་བསྟན་ཆོས་ལུགས་བྱ་འགུལ་ཞིག་ལ་ཞུགས་སྐབས་གོང་གི་སྐད་ཆ་དེ་བཤད་པ་རེད། ཧོང་སིན་གྱིས་བཤད་རྒྱུར། ཀྲུང་གོའི་རྒྱལ་སྲིད་སྤྱི་ཁྱབ་ཁང་གི་ཙུང་ལི་བུན་ཅཱ་པའོ་ཡིས་གདན་དྲངས་པ་ལྟར། ཁོས་ཚེས་བཅུ་གསུམ་ཉིན་ནས་ཚེས་བཅུ་བདུན་ཉིན་བར་ཀྲུང་གོའི་དུས་ཡུན་ཉིན་ལྔའི་དངོས་གཞི་འཚམས་འདྲི་བྱེད་རྒྱུ་ཡིན་པ་དང་། དེའི་དམིགས་ཡུལ་ནི་སྔར་ལས་ལྷག་པའི་སྒོ་ནས་ཁམ་ཕུ་ཁྲེ་དང་ཀྲུང་གོའི་ཁྱབ་ཁོངས་སོ་སོའི་མཛའ་མཐུན་མཉམ་ལས་འབྲེལ་བར་ཤུགས་སྣོན་བྱེད་རྒྱུ་མ་ཟད། ཀྲུང་གོའི་ཉམས་མྱོང་བཟང་བོ་དཔྱད་གཞིར་བཟུང་ནས་སློབ་སྦྱོང་བྱས་ཏེ། ཁམ་ཕུ་ཁྲེ་རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གོམ་སྟབས་ཇེ་མགྱོགས་སུ་གཏོང་རྒྱུའི་ཆེད་དུ་ཡིན་ཟེར།
 ཧོང་སིན་གྱིས་བཤད་རྒྱུར། ཀྲུང་གོར་འཚམས་འདྲི་བྱེད་སྐབས་ཁམ་ཕུ་ཁྲེ་དང་ཀྲུང་གོ་ཕྱོགས་གཉིས་ཀྱིས་དཔལ་འབྱོར་ཉོ་ཚོང་མཉམ་ལས་ཀྱི་ཡིག་ཆ་མང་བོ་འགོད་རྒྱུ་ཡིན་པ་དང་། དེའི་ནང་གཞུང་ལམ་དང་ཟམ་པ། གློག་འདོན་ས་ཚིགས། ཆུ་བེད་ལས་གཞིའི་འཛུགས་སྐྲུན་སོགས་མཉམ་ལས་གྲོས་མཐུན་འདུས་ཡོད་ཟེར། པེ་ཅིན་ལས་གཞན་ཁོས་ད་རུང་ཐེན་ཅིན་དང་ནན་ཅིན། བུའུ་ཞི། སུའུ་ཀྲིག་སོགས་གྲོང་ཁྱེར་ལ་ལྟ་སྐོར་བྱེད་རྒྱུ་རེད།