དབྱི་ལང་གསར་འགྱུར་བརྙན་འཕྲིན་ཁང་གིས་བསྒྲགས་པ་ལྟར་ན། དབྱི་ལང་གི་ཙུང་ཐུང་ནེ་ཅ་ཏི་ཡིས་ཚེས་བདུན་ཉིན་དབུས་ཕྱོགས་ཀྱི་གྲོང་ཁྱེར་ཨ་ལ་ཁི་ནས་གཏམ་བཤད་སྤེལ་ནས། གལ་ཏེ་ཨ་མེ་རི་ཁ་དང་། དབྱིན་ཇི། ཧྥ་རན་སི། ཨུ་རུ་སི། ཀྲུང་གོ་དང་འཇར་མན་བཅས་རྒྱལ་ཁབ་དྲུག་གིས་ལྷག་བསམ་དཀར་པོས་དབྱི་ལང་གི་འཕྲོག་ཐབས་མེད་པའི་དབང་ཆར་བརྩི་བཀུར་བྱས་ན། དབྱི་ལང་གིས་དེ་དག་ལ་གྲོས་མོལ་བྱེད་འདོད་ཡོད་ཅེས་བཤད་ཟེར།
 ནེ་ཅ་ཏི་ཡིས་ཉིན་དེར་རི་ནེ་ཝ་ནས་གྲོལ་བའི་དབྱི་ལང་གི་ཉིང་རྡུལ་གནད་དོན་གྱི་གྲོས་མོལ་སྐོར་གླེང་སྐབས། དབྱི་ལང་གིས་དྲང་བདེན་དང་ལུགས་མཐུན་གྱི་གྲོས་མོལ་ལ་རྒྱབ་སྐྱོར་བྱེད་པ་དང་། གལ་ཏེ་ཁྱེད་ཚོས་གྲོས་མོལ་བྱེད་སྐབས་ལྷག་བསམ་དཀར་པོ་བཅངས་ཏེ་དབྱི་ལང་གི་འཕྲོག་ཐབས་མེད་པའི་དབང་ཆ་ལ་བརྩི་བཀུར་བྱས་ཏེ། ནོར་འཁྲུལ་གྱི་ཐག་གཅོད་ཐམས་ཅད་དོར་བ་དང་། དབྱི་ལང་ལ་བཀག་སྡོམ་བྱེད་མཚམས་བཞག་ན། གྲོས་མོལ་ལ་འཛུགས་སྐྲུན་རང་བཞིན་གྱི་གྲུབ་འབྲས་ཐོབ་ངེས་ཡིན། དེ་ལས་ལྡོག་སྟེ་གལ་ཏེ་ཁྱེད་ཚོས་མུ་མཐུད་དུ་རྫུན་གཏམ་ལབ་པ་དང་དགྲ་རུ་འཛིན་པའི་བྱེད་ཐབས་སྤྱད་དེ། དབྱི་ལང་གི་དབང་ཆ་ཁས་མ་བླངས་ཚེ། དབྱི་ལང་གིས་སྔར་བཞིན་ཁྱེད་ཚོ་འགྱོད་པ་སྐྱེ་རུ་འཇུག་ངེས་ཡིན་ཟེར།
 དབྱི་ལང་གི་རྒྱལ་ཁབ་དྲུག་གིས་བསྡུས་པའི་དབྱི་ལང་ཉིང་རྡུལ་གནད་དོན་ཐད་ཀྱི་གྲོས་མོལ་ཚེས་བདུན་ཉིན་རི་ནེ་ཝ་ནས་གྲོལ། ཡོ་རོབ་གླིང་གི་ཕྱི་འབྲེལ་དང་བདེ་འཇགས་སྲིད་ཇུས་ཀྱི་འགན་འཁུར་བའི་མཐོ་རིམ་འཐུས་མི་ཨ་ཧྲི་ཏོན་གྱིས་གྲོས་མོལ་གྱི་རྗེས་སུ་བསྒྲགས་རྒྱུར། ཕྱོགས་སོ་སོས་གྲོས་མོལ་ཁྲོད་དུ་དབྱི་ལང་གི་ཉིང་རྡུལ་ལས་གཞི་དང་དབྱི་ལང་གིས་ལག་བསྟར་བྱེད་དགོས་པའི་རྒྱལ་སྤྱིའི་འོས་འགན་ལ་དམིགས་ཏེ་གྲོས་སྡུར་ཞིབ་མོ་བྱས་ཟེར། མོས་བཤད་རྒྱུར། ངས་ཚབ་བྱས་ཡོད་པའི་རྒྱལ་ཁབ་ཀྱི་དབྱི་ལང་གི་ཉིང་རྡུལ་གནད་དོན་ཐད་ཀྱི་ལྟ་ཚུལ་ནི་གཅིག་མཐུན་ཡིན་པ་དང་། གནད་དོན་དེ་ཐག་གཅོད་པ་ནི་གྲོས་མོལ་གྱི་གཞི་གཙོ་བོ་ཡིན་ཟེར།