དབྱི་ལང་གི་དབུ་བཞུགས་ཉིང་རྡུལ་གྲོས་མོལ་འཐུས་མི་ཅ་ལེ་ལེ་ཡིས་ཚེས་བདུན་ཉིན་རི་ནེ་ཝ་ནས་བསྒྲགས་རྒྱུར། ཐེངས་འདིའི་དབྱི་ལང་གི་ཉིང་རྡུལ་གནད་དོན་གྱི་གྲོས་མོལ་བརྒྱུད་དེ། ཕྱོགས་སོ་སོས་ཐེངས་རྗེས་མའི་གྲོས་མོལ་བྱེད་སྐབས་མཉམ་ལས་བྱེད་པར་དམིགས་ཏེ་ཧུར་ཐག་གིས་ཐུན་མོང་གི་ལྟ་ཚུལ་འབྱུང་བར་བརྩོན་ལེན་བྱེད་པར་འཐད་པ་བྱུང་ཟེར།
 ཅ་ལེ་ལེ་ཡིས་དབྱི་ལང་ཉིང་རྡུལ་གནད་དོན་སྐོར་གྱི་གྲོས་མོལ་གྱི་རྗེས་སུ་བསྡུས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་བཤད་རྒྱུར། དབྱི་ལང་གིས་གྲོས་མོལ་བྱེད་པར་གྲ་སྒྲིག་བཟང་པོ་བྱས་ཡོད་པ་དང་། རྒྱལ་སྤྱིའི་སྤྱི་ཚོགས་ཀྱིས་དེ་གོ་སྐབས་ཤིག་ཏུ་བརྩི་དགོས་ཟེར།
 ཐེངས་འདིའི་དབྱི་ལང་གི་ཉིང་རྡུལ་གནད་དོན་གྱི་གྲོས་མོལ་ཚོགས་འདུ་གྲོས་རྗེས། ཅ་ལེ་ལེ་ཡིས་ཡོ་རོབ་གླིང་མནའ་འབྲེལ་གྱི་གྲོས་མོལ་འཐུས་མི་དང་མཉམ་དུ་དབྱི་ལང་གི་ཉིང་རྡུལ་གནད་དོན་སྐོར་གྱི་ཐེངས་རྗེས་མའི་གྲོས་མོལ་ཉིས་སྟོང་བཅུ་གཅིག་ལོའི་ཟླ་དང་པོའི་ཟླ་མཇུག་ཏུ་ཐུར་ཁེ་རྒྱལ་ཁབ་ཀྱི་གྲོང་ཁྱེར་དབྱི་སི་ཐན་པུའུ་ཨར་ནས་བསྡུ་རྒྱུ་ཡིན་ཞེས་བསྒྲགས།
 ཅ་ལེ་ལེ་ཡིས་གསར་འགྱུར་སྒྲོག་སྤེལ་ཚོགས་འདུའི་སྟེང་ནན་གྱིས་བཤད་རྒྱུར། ཉིང་རྡུལ་མཚོན་ཆ་ནི་མིའི་རིགས་ཀྱི་སྤྱི་ཚོགས་ཀྱི་འཇིགས་སྣང་ཧ་ཅང་ཆེན་པོ་ཡིན་པས། རྒྱལ་སྤྱིའི་སྤྱི་ཚོགས་ཀྱིས་གཙོ་བོ་ཉིང་རྡུལ་མཚོན་ཆ་ཇེ་ཉུང་དུ་གཏོང་བ་དང་། ཉིང་རྡུལ་མཚོན་ཆ་ཁྱབ་གདལ་དུ་མི་གཏོང་བ་སོགས་ཀྱི་གནད་དོན་ལ་གྲོས་སྡུར་བྱེད་དགོས་པ་ལས། ཞི་བའི་སྒོ་ནས་ཉིང་རྡུལ་ནུས་པ་བཀོལ་སྤྱོད་བྱེད་པའི་དབང་ཆ་འཕྲོག་མི་རུང་ཟེར།
 ཅ་ལེ་ལེ་ཡིས་གྲོས་མོལ་ནི་མཉམ་ལས་ཀྱི་རྨང་གཞིའི་སྟེང་དུ་སྤེལ་དགོས་ཞེས་ཐེངས་མང་པོར་བསྐྱར་སྒྲོག་བྱས་པ་དང་། ཁོས་རྒྱལ་ཁབ་ཁ་ཤས་ཀྱིས་དབྱི་ལང་ལ་བཙན་ཤུགས་བཀོལ་འདོད་པ་དེར་ངོ་རྒོལ་བྱས་པ་དང་། དབྱི་ལང་གིས་དེར་གཏན་ནས་མགོ་མི་སྒུར་ཞེས་བཤད།
 ཅ་ལེ་ལེ་ཡིས་ད་དུང་རྒྱལ་སྤྱིའི་དཔལ་འབྱོར་གྱི་གནད་དོན་དང་རྒྱལ་ཁབ་ཁ་ཤས་ཀྱིས་དམག་དོན་འགུལ་སྐྱོད་སྤེལ་ཏེ་མི་སེར་ཁྲི་སྟོང་དམར་གསོད་བྱས་པ་སོགས་ཀྱི་གནད་དོན་ཡང་གྲོས་སྡུར་གྱི་ཁོངས་སུ་འཇོག་དགོས་པར་སྙམ་ཞེས་བཤད།
 གསར་འགྱུར་སྒྲོག་སྤེལ་ཚོགས་འདུའི་ཚོགས་ར་ནས། དབྱི་ལང་གིས་ཟླ་བཅུ་གཅིག་པའི་ཚེས་ཉེར་དགུ་ཉིན་འཇབ་རྒོལ་ཐེབས་ཏེ་རྐྱེན་ལམ་དུ་ཤོར་བའི་དབྱི་ལང་གི་ཉིང་རྡུལ་དངོས་ལུགས་རིག་པ་བ་ཧྲ་ཨ་ལེ་ཡ་ལེ་ཡི་པར་བཞག
 ཨ་མེ་རི་ཁ་དང་ཨུ་རུ་སི། ཀྲུང་གོ། དབྱིན་ཇི། ཧྥ་རན་སི། འཇར་མན་བཅས་རྒྱལ་ཁབ་དྲུག་གི་འཐུས་མིས་ཚེས་དྲུག་ཉིན་དང་ཚེས་བདུན་ཉིན་གྱི་སྔ་དྲོར་རི་ནེ་ཝ་ནས་དབྱི་ལང་གི་དབུ་བཞུགས་ཉིང་རྡུལ་གྲོས་མོལ་ཅ་ལེ་ལེ་དང་གསང་བའི་གྲོས་མོལ་བྱས།