ཀྲུང་གོའི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་འགན་ལེན་ལས་དོན་ལ་འཛམ་གླིངགི་ཁས་ལེན་ཐོབ་བཞིན་ཡོད།

2016-10-14

ཞིན་ཧྭ་གསར་འགྱུར་ཁང་ཁྲུང་ཆིང་ནས་ཟླ་བ9པའི་ཚེས28ཉིན་འབྱོར་བའི་གཏམ་གསར། ཚེས28ཉིན“2016·ཀྲུང་གོ་དང་ཡོ་རོབ་ཀྱི་འགྲོ་བ་མིའི་ཐོབ་ཐང་བགྲོ་གླེང་ཚོགས་འདུ”ཁྲུང་ཆིང་དུ་ཚོགས་པ་དང་ད་ཐེངས་ཀྱི་ཚོགས་འདུའི་དོ་གནད་དེ་གྲངས་ཉུང་མི་རིགས་ཀྱི་ཁེ་དབང་འགན་ལེན་ཐད་གཙོ་བོར་དམིགས་ཡོད། ཚོགས་ཞུགས་ཀྲུང་གོ་དང་ཕྱི་རྒྱལ་གྱི་རིགས་གཅིག་མཁས་ཅན་གྱིས་གཅིག་གྱུར་གྱི་མི་རིགས་མང་བའི་རྒྱལ་ཁབ་ཅིག་ཡིན་པའི་ངོས་ནས་ཀྲུང་གོས་འགྲོ་བ་མིའི་ཐོབ་ཐང་འཕེལ་རྒྱས་ལ་མཐོང་ཆེན་དང་ལྷག་པར་དུ་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་འགན་ལེན་ཐད་མངོན་གསལ་དོད་པའི་ཡར་རྒྱས་བྱུང་ཡོད་ཅེས་བཤད་པ་རེད།
ཤེས་རྟོགས་བྱུང་བར་གཞིགས་ན། ཀྲུང་གོས1954ལོར་མི་རིགས་ས་ཁོངས་རང་སྐྱོང་ལམ་ལུགས་རྩ་ཁྲིམས་ནང་བཅུག་པ་དང་ལོ་མང་རིང་ཀྲུང་གོ་སྲིད་གཞུང་གིས་རྩ་ཁྲིམས་དང་། བཅའ་ཁྲིམས། ལམ་ལུགས་སོགས་རིམ་པ་མང་པོའི་ཐོག་ནས་མི་རིགས་ཁག་ཚང་མ་འདྲ་མཉམ་དང་ཐུན་མོང་ཐོག་རྒྱལ་ཁབ་ཀྱི་ལས་དོན་དོ་དམ་བྱེད་པའི་རྩ་དོན་གཏན་འཁེལ་བྱས་ཡོད། དེ་དང་ཆབས་ཅིག་མི་རིགས་ས་ཁུལ་དང་མི་འབོར་ཅུང་ཉུང་བའི་མི་རིགས་ཀྱི་འཕེལ་རྒྱས་ལ་སྐུལ་འདེད་གཏོང་རྒྱུ་དེ་གཙོ་གནད་ཆེད་དོན་འཆར་འགོད20ཡི་ནང་བཅུག་ནས་གྲངས་ཉུང་མི་རིགས་དང་མི་རིགས་ས་ཁུལ་ལ་ཆེད་དོན་རོགས་སྐྱོར་བྱེད་ཤུགས་རྒྱུན་མཐུད་ངང་ཆེ་རུ་བཏང་ཡོད། 2015ལོར་ཀྲུང་གོའི་ནང་སོག་དང་། ཀོང་ཤིས། བོད་ལྗོངས། ཉིང་ཞ། ཤིན་ཅང་བཅས་རང་སྐྱོང་ལྗོངས་ལྔ་དང་ཀུའེ་ཀྲོའུ་དང་། ཡུན་ནན། མཚོ་སྔོན་བཅས་ཞིང་ཆེན་གསུམ་གྱི་མི་འབོར་དབུལ་པོ2012ལོའི་ཁྲི3121ནས་ཁྲི1813བར་ཉུང་དུ་ཕྱིན་ཡོད་པ་རེད།
ཐེན་ཅིན་ནན་ཁའེ་སློབ་ཆེན་གྱི་འགྲོ་བ་མིའི་ཐོབ་ཐང་ལྟེ་གནས་ཀྱི་རྒྱུན་ལས་ཀྲུའུ་རེན་གཞོན་པ་ཁྲང་ཅན་གྱིས་ཞིན་ཧྭ་གསར་འགྱུར་ཁང་གི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས་ཡོ་རོབ་རྒྱལ་ཁབ་ཀྱིས་གྲངས་ཉུང་མི་རིགས་ཀྱི་ཁེ་དབང་འགན་ལེན་ཐད་ནན་བཤད་བྱས་པའི་སྤྱི་དམངས་ཀྱི་ཁེ་དབང་དང་ཆབ་སྲིད་ཁེ་དབང་འདྲ་མཉམ་ཡིན་པ་ཕུད། ཀྲུང་གོའི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་འགན་ལེན་གྱིས་གྲངས་ཉུང་མི་རིགས་ས་ཁུལ་གྱི་དཔལ་འབྱོར་འཕེལ་རྒྱས་འགྲོ་རྒྱུར་རྒྱབ་སྐྱོར་བྱེད་པའི་ནང་དོན་མང་དུ་བཏང་ཡོད་ཅེས་བཤད་པ་རེད།
“ང་ཚོས་གནད་དོན་གྱི་འབྱུང་རྩའི་རང་བཞིན་ལ་དེ་བས་སྣང་ཆེན་བྱེད་པ་དང་ཁྲོམ་རའི་ལྟ་ཕྱོགས་ནས་གྲངས་ཉུང་མི་རིགས་ཀྱི་ཁེ་དབང་འགན་ལེན་གནད་དོན་ཐག་གཅོད་བྱེད་པ་དེ་ནི་ང་ཚོའི་ལེགས་ཆ་ཡིན། ཁོང་ཚོའི་དཔལ་འབྱོར་ནུས་པ་ཆེ་རུ་བཏང་ཚེ་ཁོང་ཚོའི་ཁེ་དབང་དེ་དག་ལ་གཞི་ནས་དོན་སྙིང་དངོས་ལྡན་ཐུབ”།
གཞན་ཡང་ནུབ་ཕྱོགས་སྤྱི་ཚོགས་སུ་ཡོངས་ཁྱབ་ངང་གནས་པའི་གྲངས་ཉུང་མི་རིགས་ཀྱི་རིག་གནས་དང་སྐད་ཡིག་སྲུང་སྐྱོབ་དང་སློབ་གསོ་སོགས་ཀྱི་གནད་དོན་ཐད་ཀྲུང་གོ་འདི་ཉིད་རྒྱལ་སྤྱིའི་སྤྱི་ཚོགས་ཀྱི་མདུན་གྲལ་དུ་སླེབས་ཡོད་ཅིང་། ཀྲུང་གོས་སྲིད་གཞུང་གི་རིམ་པའི་ཐོག་ནས་སྐད་གཉིས་སློབ་གསོར་སྐུལ་འདེད་བཏང་བ་དཔེར་ན། གྲངས་ཉུང་མི་རིགས་འདུས་སྡོད་ཁུལ་ཁག་གཅིག་ཏུ་སྐད་གཉིས་སློབ་ཚན་བཀོད་སྒྲིག་བྱས་ཏེ་གྲངས་ཉུང་མི་རིགས་ཀྱི་སློབ་མས་རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་ཡི་གེ་གཞི་རྩའི་ཐོག་ཁོང་དུ་ཆུད་པ་དང་བེད་སྤྱོད་ཐུབ་པ་བྱས་ནས་གྲངས་ཉུང་མི་རིགས་ཀྱི་སྐད་ཡིག་དང་རྒྱ་ཡིག་གཉིས་ཀ་ཤེས་པའི་གཞི་རྩའི་དམིགས་ཚད་མངོན་འགྱུར་ཐུབ་པའི་འགན་ལེན་བྱས་ཡོད། “དེ་ལྟར་བྱས་ན་མི་རིགས་ཁག་གི་སྤེལ་རེས་ཐད་ཕན་ཐོགས་ཡོད་ལ་མི་རིགས་ཁག་གི་སྐད་ཡིག་དང་རིག་གནས་སྲུང་སྐྱོབ་དང་རྒྱུན་འཛིན་བྱ་རྒྱུར་ཡང་ཕན་ཐོགས་ཡོད”ཅེས་ཀྲུང་གོ་འགྲོ་བ་མིའི་ཐོབ་ཐང་ཞིབ་འཇུག་ལྷན་ཚོགས་ཀྱི་བློ་འདྲི་བ་ལིའུ་ཧའེ་ཉན་གྱིས་བཤད་པ་རེད།
གྲངས་གཞི་ལས་མངོན་པར2015ལོའི་ལོ་མཇུག་བར་ཀྲུང་གོར་གྲངས་ཉུང་མི་རིགས54ཡིས་གྲངས་ཉུང་མི་རིགས་ཀྱི་སྐད་ཡིག་རིགས80ལྷག་ཙམ་སྤྱོད་པ་དང་གྲངས་ཉུང་མི་རིགས21གིས་མི་རིགས་དེ་གའི་སྐད་ཡིག་རིགས་29སྤྱོད་ཀྱི་ཡོད་པ་རེད།
“2010ལོར་ཀྲུང་གོའི་གྲངས་ཉུང་མི་རིགས་ཀྱི་མི་འབོར་གྱིས་སྤྱིའི་མི་འབོར་གྱི་བརྒྱ་ཆ8.49བཟུང་ཡོད། 1953ལོར་བསྡུར་ཚད་དེ་བརྒྱ་ཆ6.06ལས་ཟིན་གྱི་མེད”གྲངས་ཉུང་མི་རིགས་ཀྱི་མི་འབོར་གྱི་བསྡུར་ཚད་འཕར་མགྱོགས་པ་དང་འཕར་ཚད་ཐ་ན་ཚད་ངེས་ཅན་ཞིག་གི་ཐོག་ནས་རྒྱ་རིགས་ལས་བརྒལ་བ་དེ་ཐོག་ནས་ཀྲུང་གོའི་གྲངས་ཉུང་མི་རིགས་ཀྱི་སྲིད་ཇུས་ནང་གྲངས་ཉུང་མི་རིགས་རང་ངོས་ཀྱི་ཐོབ་ཐང་ངོས་འཛིན་བསྣན་པ་དང་གྲངས་ཉུང་མི་རིགས་ཀྱི་ཁེ་དབང་འགན་ལེན་ཐད་ཁས་ལེན་ཐོབ་པ་མཚོན་ཡོད་ཅེས་ཀྲུང་གོ་སྤྱི་ཚོགས་ཚན་རིག་ཁང་མི་རིགས་རིག་པ་དང་མིའི་རིགས་རིག་པའི་ཞིབ་འཇུག་སུའོ་ཡི་སུའོ་ཀྲང་ཝང་ཡན་ཀྲུང་གིས་བཤད་པ་རེད།།

ཀྲུང་གོའི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་འགན་ལེན་ལས་དོན་ལ་འཛམ་གླིངགི་ཁས་ལེན་ཐོབ་བཞིན་ཡོད།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10