ཀྲུང་གོ་བོད་ཀྱི་དྲ་བའི་འཕྲིན། གསར་འགོད་པས་ཟླ་ལྔ་བའི་ཚེས་ཉེར་དགུ་ཉིན་མཚོ་སྔོན་ཞིང་ཆེན་ལུས་རྩལ་ཅུའུ་ནས་རྒྱུས་ལོན་བྱུང་བ་ལྟར་ན། ཉིན་དེར་སི་ཕན་རྒྱལ་ཁབ་ཀྱི་ལཱ་ཁི་ལུའུ་ཉི་ཡ་ནས་བསྡུས་པའི་རྒྱལ་སྤྱིའི་འདུར་རྒྱུག་འགྲན་སྡུར་ཁྲོད་དུ། མཚོ་སྔོན་གྱི་བོད་རིགས་ཕུལ་བྱུང་ལུས་རྩལ་པ་ཆོས་དབྱིངས་སྐྱིད་ཀྱིས་སྤྱི་ལེ་ཉི་ཤུ་ཅན་གྱི་བུད་མེད་འདུར་རྒྱུག་འགྲན་སྡུར་ཁྲོད་དུ། རྒྱུག་ཡུན་དུས་ཚོད་གཅིག་དང་སྐར་མ་ཉེར་བརྒྱད་སྐར་ཆ་སུམ་ཅུའི་ནང་དམིགས་སར་ཐོན་ནས། མཐར་ཐེངས་འདིའི་འདུར་རྒྱུག་འགྲན་སྡུར་གྱི་བྱ་དགའ་ཨང་གཉིས་པ་བླངས།

རྒྱུས་ལོན་བྱུང་བ་ལྟར་ན། ལཱ་ཁི་ལུའུ་ཉི་ཡ་ནས་བསྡུས་པའི་འདུར་རྒྱུག་འགྲན་སྡུར་དེ་གཅིག་དགུ་གྱ་བདུན་ལོར་དངོས་སུ་སྤེལ་མགོ་ཚུགས་པ་ནས། ད་ལྟའི་བར་ཁྱོན་བསྡོམས་འགྲན་སྡུར་སྐབས་སུམ་ཅུ་བསྡུས་ཤིང་། ཉིན་དེའི་འགྲན་སྡུར་དངོས་ཀྱི་སྐབས་སུ་ཆར་བ་བབས་ནས་ལམ་ནང་ནས་ཤུད་ཉེན་ཆེ་ནའང་། རང་རྒྱལ་གྱི་ལུས་རྩལ་པ་ཆོས་དབྱིངས་སྐྱིད་དང་ལིག་ཧུང་གཉིས་ཀྱིས་འགྲན་སྡུར་མགོ་བརྩམས་མ་ཐག་ནས་བཟུང་མདུན་གྲས་ཀྱི་གོ་གནས་ཟིན་ཡོད་ཅིང་། མཇུག་མཐར་ལིག་ཧུང་རྒྱུག་ཡུན་དུས་ཚོད་གཅིག་དང་སྐར་མ་ཉེར་བདུན་སྐར་ཆ་ཞེ་གསུམ་གྱི་རིང་དམིགས་སར་ཐོན་ནས། ཐེངས་འདིའི་འགྲན་ཁུལ་གྱི་བྱ་དགའ་ཨང་དང་པོ་བླངས་པ་དང་། ཆོས་དབྱིངས་སྐྱིད་ལིག་ཧུང་ལས་སྐར་ཆ་ཞེ་བདུན་གྱིས་རྗེས་སུ་ལུས་ནས་ཐེངས་འདིའི་འགྲན་ཁུལ་གྱི་བྱ་དགའ་ཨང་གཉིས་པ་བླངས།།