ཨོ་བྷ་མས་ས་ག་ཟླ་བའི་དུས་ཆེན་སྐབས་ནང་པ་ཡོངས་ལ་འཚམས་འདྲི་གནང་།

2016-05-19

ཀྲུང་གོའི་ནང་བསྟན་དྲ་བའི་ཐོག་གནས་ཚུལ་སྤེལ་བར་གཞིགས་ན། ཉེ་ཆར་ཨ་རིའི་སྲིད་འཛིན་ཨོ་བྷ་མས་ས་ག་ཟླ་བའི་དུས་ཆེན་སྐབས་ནང་པ་ཡོངས་ལ་འཚམས་འདྲི་གནང་བ་རེད།འདི་ནི་ཨ་རིའི་ལོ་རྒྱུས་ཐོག་སྲིད་འཛིན་ཞིག་གིས་ནང་པ་དང་ནང་པའི་དུས་ཆེན་ལ་ཆེ་མཐོང་བྱེད་ཆེད་འཚམས་འདྲིའི་འཕྲིན་ཡིག་བསྩལ་བ་ཐེངས་དང་པོ་ཡིན་པ་རེད། ཨོ་བྷ་མས་ས་ཟླའི་དུས་ཆེན་བརྩི་སྲུང་ཞུ་མཁན་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ། རྒྱ་ཆེ་བའི་ནང་པའི་དད་ལྡན་རྣམས་ཀྱི་ངོས་ནས་བརྗོད་ན་ས་ཟླའི་དུས་ཆེན་ནི་སྟོན་པ་བཅོམ་ལྡན་འདས་སྐུ་བལྟམས་པ་དང་སངས་རྒྱས་པ་དང་མྱ་ངན་ལས་འདས་པའི་མཛད་པ་ཁག་ལ་རྗེས་དྲན་བྱེད་པའི་དམིགས་བསལ་གྱི་དུས་ཚིགས་ཤིག་རེད། དུས་འདིར་འཛམ་གླིང་ས་ཕྱོགས་གང་ས་ན་ཡོད་པའི་ནང་པའི་རྗེས་འཇུག་རྣམས་ཀྱིས་ཞི་དུལ་བག་ཡོད་ཀྱི་སྒོ་ནས་ཤེས་རབ་དང་། སྙིང་སྟོབས་དང་། བྱམས་བརྩེ་བཅས་ཀྱི་ཡོན་ཏན་མངོན་པར་བྱེད་པའི་བྱེད་སྒོ་སྣ་ཚོགས་སྤེལ་བཞིན་ཡོད། བྱེད་སྒོ་འདིར་ཞུགས་པའི་ནང་བསྟན་བརྒྱུད་འཛིན་མཁན་གྱི་སྐྱེས་པ་དང་། སྐྱེས་མ་དང་། ན་ཆུང་རྣམས་ནི་འཛམ་གླིང་ཐོག་གི་སྣ་མང་ཕུན་སུམ་ཚོགས་པའི་ཆོས་ལུགས་རིགས་གཞུང་ཐོག་ལེགས་སྐྱེས་འབུལ་མཁན་ཤ་སྟག་ཡིན། འདི་ལྟ་བུའི་ཆོས་ལུགས་རིགས་གཞུང་གིས་འགྲོ་བ་མིའི་རིགས་ཀྱི་བསམ་སྤྱོད་ལེགས་ལམ་དུ་འཁྲིད་བཞིན་ཡོད། ཚང་མས་དད་གུས་སྤྲོ་གསུམ་ངང་ས་ག་ཟླ་བའི་དུས་ཆེན་ལ་སྲུང་བརྩི་ཞུ་བའི་སྐབས་འདིར། ངས་ཀྱང་ཁྱེད་རྣམ་པར་ལེགས་ཚོགས་འཕེལ་བའི་སྨོན་འདུན་ཞུས་པ་ཡིན་ཞེས་གསུངས་པ་རེད།

ཨོ་བྷ་མས་ས་ག་ཟླ་བའི་དུས་ཆེན་སྐབས་ནང་པ་ཡོངས་ལ་འཚམས་འདྲི་གནང་།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10