ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨུ་རུ་སིའི་ཙུང་ལི་གཞོན་པ་ཐི་ལུའུ་ཐི་ནེ་ཧྥུའུ་ཡིས་ཚེས་ཉེར་བདུན་ཉིན་སྲིད་གཞུང་གི་གྲོས་ཚོགས་སྟེང་བཤད་རྒྱུར།ཨུ་རུ་སིའི་དཔོན་རིགས་ཀྱིས་ད་ལོའི་འཛམ་གླིང་དཔལ་འབྱོར་གླེང་སྟེགས་ཏཱ་བོ་སིའི་ལོ་ཚོགས་སྐབས་སུ་འཛམ་གླིང་གི་རྡོ་སྣུམ་ཕྱིར་གཏོང་རྒྱལ་ཁབ་གཙོ་བོ་དང་མཉམ་དུ་རྡོ་སྣུམ་ཕྱིར་གཏོང་ལ་མཐུན་སྦྱོར་བྱེད་པའི་གནད་དོན་ལ་གྲོས་བསྡུར་བྱས་ཟེར།ཁོས་བཤད་རྒྱུར།གྲོས་ཚོགས་ལ་ཞུགས་པའི་རྡོ་སྣུམ་ཕྱིར་གཏོང་རྒྱལ་ཁབ་ཀྱི་སྲིད་གཞུང་དཔོན་རིགས་དང་ཀུང་ཟིའི་འཐུས་མིས་རྡོ་སྣུམ་རིན་གོང་ཇེ་དམའ་རུ་སོང་བ་ལས་རྡོ་སྣུམ་གྱི་སྔོག་འདོན་དངུལ་གཏོང་ལ་ཤུགས་རྐྱེན་ཆེན་པོ་ཐེབས་ཡོད་པས།མཐུན་སྦྱོར་འགུལ་སྐྱོད་སྤེལ་ཏེ་རྡོ་སྣུམ་རིན་གོང་ལ་ཚོད་འཛིན་བྱེད་དགོས་པའི་བསམ་བློ་བཅངས་ཡོད་ཟེར། །