ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་གྱིས་ཚེས་ཉེར་བརྒྱད་ཉིན་ཧེ་ནན་ཞིང་ཆེན་པའོ་ཨོ་རྒྱལ་མགྲོན་ཁང་ནས་ཨ་མེ་རི་ཁའི་ཀའེ་ཚི་ཐེབས་རྩ་ཚོགས་པའི་ཀྲུའུ་ཞི་པིས་ཨར· ཀའེ་ཚི་ལ་མཇལ་འཕྲད་གནང་། ཕྱོགས་གཉིས་ཀས་སྤྱི་བའི་འཕྲོད་བསྟེན་བྱ་བར་ཤུགས་སྣོན་པ་དང་མི་དམངས་ཀྱི་ལུས་ཕུངས་བདེ་ཐང་ཆུ་ཚད་མཐོར་འདེགས་བྱེད་པ། དབུལ་ཕོངས་མི་གྲངས་ཇེ་ཉུང་དུ་གཏོང་བའི་གནད་དོན་ཐད་ནས་ལྟ་ཚུལ་བརྗེ་རེས་མཛད།

ཞི་ཅིན་ཕེན་གྱིས་གསུང་དོན། སྤྱི་བའི་རིམས་ནད་འགོག་བཅོས་དང་ཚོད་འཛིན་བྱེད་རྒྱུ་ནི་རྒྱལ་སྤྱིའི་སྤྱི་ཚོགས་ཀྱི་མདུན་དུ་ལྷགས་པའི་ཐུན་མོང་གི་འགྲན་རྩོད་ཡིན་པས། རྒྱལ་སྤྱིའི་མཉམ་ལས་ལ་ཤུགས་བསྣན་ནས། མཉམ་དུ་བཅོས་སྐྱོང་བྱེད་དགོས། སྤྱི་བའི་འཕྲོད་བསྟེན་བྱ་བར་ཤུགས་སྣོནཔ་དང་། མི་དམངས་ཀྱི་ལུས་ཕུངས་བདེ་ཐང་ལ་འགན་སྲུང་བྱེད་རྒྱུ་ནི་ཀྲུང་གོ་སྲིད་གཞུང་གི་ལས་འགན་གཙོ་བོ་ཡིན་པས། ང་ཚོས་ཧ་ཅང་མཐོང་ཆེན་བྱས་ནས། ཀའེ་ཚི་ཐེབས་རྩ་ཚོགས་པ་དང་མཉམ་དུ་མུ་མཐུད་དུ་མཉམ་ལས་བྱེད་རྒྱུ་ཡིན་ཟེར། ཞི་ཅིན་ཕེན་གྱིས་ནན་གྱིས་གསུང་དོན། ཀྲུང་གོས་དབུལ་ཕོངས་མི་གྲངས་ཇེ་ཉུང་དུ་གཏོང་བ་དང་དབུལ་སྐྱོར་བྱ་བར་ཧ་ཅང་མཐོང་ཆེན་བྱས་ནས། གྲུབ་འབྲས་གལ་ཆེན་བླངས་ཡོད་ན་ཡང་། 2020ལོར་འབྱོར་འབྲིང་སྤྱི་ཚོགས་ཁྱོན་ཡོངས་ནས་ལེགས་འགྲུབ་བྱེད་དགོས་ན། ང་ཚོས་ད་དུང་སྟོབས་ཤུགས་ཆེན་པོ་བཏོན་ནས་དབུལ་སྐྱོར་གསར་སྤེལ་བྱ་བ་སྤེལ་དགོས་བ་མ་ཟད། དེའི་ཐད་འབད་བརྩོན་ལྷོད་མེད་བྱེད་བཞིན་པའི་སྒང་ཡིན་ལ། ཀྲུང་གོ་ཧུར་ཐག་གིས་མཉམ་འབྲེལ་རྒྱལ་ཚོགས་ཀྱི2015ལོའི་འཕེལ་རྒྱས་གྲོས་རིམ་ཁྲོད་ཞུགས་པ་དང་། རྒྱལ་སྤྱིའི་སྤྱི་ཚོགས་དང་མཉམ་དུ་རྒྱལ་སྤྱིའི་དབུལ་ཕོངས་མི་གྲངས་ཇེ་ཉུང་དུ་གཏོང་བའི་བྱ་བར་སྐུལ་འདེད་་བྱས་ཏེ། མུ་མཐུད་དུ་གྲུབ་འབྲས་གསར་བ་ལེན་འདོད་ཡོད་ཟེར།

པིས་ཨར· ཀའེ་ཚི་ཡིས་བསྟན་དོན། ཀྲུང་གོས་རྒྱལ་སྤྱིའི་སྤྱི་ཚོགས་དང་མཉམ་དུ་ཨེ་པའོ་ལཱ་རིམས་ནད་ལ་ཁ་གཏད་འཇལ་བའི་ཐད་ནས་ཐོན་ཁུངས་འབོར་ཆེན་འདོན་སྤྲོད་བྱས་པ་དང་། ཨེ་ཙིའི་ནད་ལ་ཚོད་འཛིན་བྱེད་པའི་ཐད་ནས་གྲུབ་འབྲས་ལྡན་པའི་བྱ་བ་མང་པོ་བསྒྲུབས་ལ། དབུལ་ཕོངས་མི་གྲངས་ཇེ་ཉུང་དུ་གཏོང་བའི་ཐད་ནས་ཀྱང་འཛམ་གླིང་གི་མདུན་གྲས་སུ་ཚུད་དེ། མིག་དཔེ་བཟང་བོ་བཙུགས་ཡོད་པས། བསྔགས་བརྗོད་བྱེད་འོས་ཟེར། ཀའེ་ཙི་ཐེབས་རྩ་ཚོགས་པས་ཀྲུང་གོའི་བར་གྱི་སྤྱི་བའི་འཕྲོད་བསྟེན་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་འདོད་ཡོད་ཟེར།  །