ཀྲུང་གུང་ཀྲུང་དབྱང་དང་རྒྱལ་ཡོངས་དམངས་ཆེན་རྒྱུན་ཨུ།རྒྱལ་སྲིད་སྤྱི་ཁྱབ་ཁང་།རྒྱལ་ཡོངས་སྲིད་གྲོས།ཀྲུང་དབྱང་དམག་ཨུ་བཅས་ཀྱིས་རྟེན་འབྲེལ་ཞུ་བའི་གློག་འཕྲིན་བཏང་།
ཧུའུ་ཅི་ཐའོ་ཡིས་བོད་ཞི་བས་བཅིངས་འགྲོལ་བཏང་ནས་ལོ60འཁོར་བར་རྟེན་འབྲེལ་ཞུ་བའི་ཐེམ་བྱང་ཐོག་ཕྱག་བྲིས་གནང་།
ཞི་ཅིན་ཕིང་ཚོགས་ཆེན་ནང་ཞུགས་ནས་བོད་རང་སྐྱོང་ལྗོངས་ལ་རྟེན་འབྲེལ་ཞུ་བའི་ཐེམ་བྱང་ཕུལ་ཞིང་གསུང་བཤད་གལ་ཆེན་གནང་།
ཞིན་ཧྭ་གསར་འགྱུར་ཁང་ལྷ་ས་ནས་ཟླ་བ7པའི་ཚེས19ཉིན་འབྱོར་བའི་གཏམ་གསར།ཚེས19ཉིན་གྱི་སྔ་དྲོར།བོད་ལྗོངས་མི་རིགས་ཁག་དང་ལས་རིགས་ཁག་གི་ལས་བྱེད་པ་དང་མང་ཚོགས་ཁྲི2ལྷག་ཙམ་ཕོ་བྲངཔོ་ཏ་ལའི་ཐང་ཆེན་དུ་དགའ་འཛོམས་བྱས་ནས་བོད་ཞི་བས་བཅིངས་འགྲོལ་བཏང་ནས་ལོ60འཁོར་བར་དགའ་སྟོན་རྟེན་འབྲེལ་ཞུས་པ་རེད།ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི།རྒྱལ་ཁབ་ཀྱི་ཀྲུའུ་ཞི།ཀྲུང་དབྱང་དམག་ཨུའི་ཀྲུའུ་ཞི་ཧུའུ་ཅིན་ཐའོ་ཡིས་བོད་ཞི་བས་བཅིངས་འགྲོལ་བཏང་ནས་ལོ60འཁོར་བར་རྟེན་འབྲེལ་ཞུ་བའི་བྱང་བུའི་ཐོག་ཕྱག་བྲིས་གནང་བ།ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ།རྒྱལ་ཁབ་ཀྱི་ཀྲུའུ་ཞི་གཞོན་པ།ཀྲུང་དབྱང་དམག་ཨུའི་ཀྲུའུ་ཞི་གཞོན་པ།ཀྲུང་དབྱང་འཐུས་ཚབ་ཚོགས་པའི་ཚོགས་དཔོན་ཞི་ཅིན་ཕིང་རྟེན་འབྲེལ་ཚོགས་ཆེན་ནང་ཞུགས་ནས་གསུང་བཤད་གལ་ཆེན་གནང་བ་རེད།
སྔ་དྲོའི་ཆུ10ཡི་ཐོག་བོད་རང་སྐྱོང་ལྗོངས་ཀྱི་ཏང་ཨུའི་ཧྲུའུ་ཅི་གཞོན་པ།རང་སྐྱོང་ལྗོངས་མི་དམངས་སྲིད་གཞུང་གི་ཀྲུའུ་ཞི་པད་མ་ཚུལ་ཁྲིམས་ཀྱིས་ཚོགས་ཆེན་འགོ་ཚུགས་པའི་ཁྱབ་བསྒྲགས་གནང་བ་རེད།རྔམ་བརྗིད་ལྡན་པའི་རྒྱལ་གླུའི་ཁྲོད་དུ།ཚོན་མདོག་རྣམ་པར་བཀྲ་བའི་སྐར་ལྔའི་དར་དམར་ཕོ་བྲང་པོ་ཏ་ལའི་ཐང་ཆེན་དུ་ལྷབ་ལྷུང་གཡོག་བ།གྲུ་ཤ་དོན་ཞིང་དགའ་གཅེས་འོས་པའི་ལོ་ཆུང་གཞོན་ནུ་ཚོས་ཀྲུའུ་ཞི་སྟེགས་བུའི་ཐོག་བཞུགས་ཡོད་པའི་འགོ་ཁྲིད་ལ་མེ་ཏོག་ཕུལ་ནས་བོད་ལྗོངས་མི་རིགས་ཁག་གི་མི་དམངས་གྱིས་ལྷག་བསམ་རྣམ་དག་གི་གུས་འདུད་ཞུས་པ་མཚོན་པ་བྱས།
ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན།རྒྱལ་སྲིད་སྤྱི་ཁབ་ཁང་གི་ཙུང་ལི་གཞོན་པ།ཀྲུང་དབྱང་འཐུས་ཚབ་ཚོགས་པའི་ཚོགས་དཔོན་གཞོན་པ་ཧུའེ་ལིའང་ཡུས་ཀྱིས་ཚོགས་ཆེན་ཐོག་ཀྲུངགུང་ཀྲུང་དབྱང་དང་།རྒྱལ་ཡོངས་དམངས་ཆེན་རྒྱུན་ཨུ།རྒྱལ་སྲིད་སྤྱི་ཁྱབ་ཁང་།རྒྱལ་ཡོངས་སྲིད་གྲོས།ཀྲུང་དབྱང་དམག་ཨུ་བཅས་ཀྱི་བོད་ཞི་བས་བཅིངས་འགྲོལ་བཏང་ནས་ལོ60འཁོར་བར་རྟེན་འབྲེལ་ཞུ་བའི་སྐོར་གྱི་གློག་འཕྲིན་སྒྲོག་སྦྱང་གནང་བ་རེད།
ཞི་ཅིན་ཕིང་གིས་བོད་རང་སྐྱོང་ལྗོངས་ལ་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡིས་ཕྱག་བྲིས་གནང་ཡོད་པའི་བོད་ཞི་བས་བཅིངས་བཅིངས་འགྲོལ་བཏང་ནས་ལོ60འཁོར་བར་རྟེན་འབྲེལ་གྱི་བྱང་བུ་ཕུལ་བ་རེད།བོད་རང་སྐྱོང་ལྗོངས་ཀྱི་ཏང་ཨུའི་ཧྲུའུ་ཅི་ཀྲང་ཆིང་ལི་དང་རང་སྐྱོང་ལྗོངས་ཀྱི་ཏང་ཨུའི་ཧྲུའུ་ཅི་གཞོན་པ།རང་སྐྱོང་ལྗོངས་དམངས་ཆེན་རྒྱུན་ཨུའི་ཀྲུའུ་རེན་བྱམས་པ་ཕུན་ཚོགས་རྣམ་གཉིས་ཀྱིས་རྟེན་འབྲེལ་ཞུ་བྱང་བུ་བླངས་པ་རེད།
སྤྲོ་སེམས་འཁོལ་བའི་ཐལ་མོ་རྡེབ་སྒྲའི་ཁྲོད་དུ།ཞི་ཅིན་ཕིང་གིས་ཐུགས་དགྱེས་པའི་ངང་ནས་གསུང་བཤད་གནང་བ་རེད།ཁོང་གིས་དང་ཐོག་ཀྲུང་གུང་ཀྲུང་དབྱང་དང་།རྒྱལ་ཡོངས་དམངས་ཆེན་རྒྱུན་ཨུ།རྒྱལ་སྲིད་སྤྱི་ཁྱབ་ཁང་།ཀྲུང་དབྱང་དམག་ཨུ་བཅས་ཀྱི་ཚབ་མཛད་ནས་བོད་ལྗོངས་ཀྱི་མི་རིགས་ཁག་གི་བཟོ་པ་དང་།ཞིང་འབྲོག་པ།ཤེས་ཡོན་ཅན།ལས་བྱེད་པ་དང་ལས་རིགས་ཁག་གི་མི་སྣ།མི་དམངས་བཅིངས་འགྲོལ་དམག་བོད་དུ་བཅའ་སྡོད་དམག་དཔུང་གི་བཀོད་འདོམས་པ།དྲག་ཆས་ཉེན་རྟོག་བོད་ལྗོངས་ཀྱི་དམག་དཔུང་གི་དཔོན་དམག་དང་སྤྱི་བདེ་ལས་བྱེད་ཉེན་རྟོག་པ་བཅས་ལ་སྤྲོ་སེམས་འཁོལ་བའི་ངང་ནས་རྟེན་འབྲེལ་ཞུས་པ་དང་བྱམས་བརྩེའི་འཚམས་འདྲི་ཞུས།བོད་ཞི་བས་བཅིངས་འགྲོལ་བཏང་བ་དང་བཅོས་བསྒྱུར་འཕེལ་རྒྱས་ལ་བྱས་རྗེས་བཞག་མཁན་བློ་མཐུན་དང་།གྲོགས་པོ་ལ་བླ་ན་མེད་པའི་གུས་འདུད་ཞུས་པ་དང་།བོད་ཀྱི་འཕེལ་རྒྱས་དང་ཡར་ཐོན་ཡོང་བར་སེམས་ཁུར་དང་རྒྱབ་སྐྱོར་བྱེད་མཁན་ཀང་ཨོ་སྤུན་ཟླ་དང་།ཐའེ་ཝན་སྤུན་ཟླ།ཕྱིར་སྡོད་རང་མི།རྒྱལ་སྤྱིའི་མཛའ་གྲོགས་མཐའ་དག་ལ་སེམས་གཏིང་ནས་ཐུགས་རྗེ་ཆེ་ཞུས་པ་རེད།