བོད་རང་སྐྱོང་ལྗོངས་མི་དམངས་སྲིད་གཞུང་ལ།
བོད་ཞི་བས་བཅིངས་འགྲོལ་བཏང་ནས་ལོ60འཁོར་བར་རྟེན་འབྲེལ་ཞུ་བའི་དུས་དེར་ངས་ལྗོངས་ཡོངས་ཀྱི་མི་རིགས་ཁག་གི་མི་དམངས་ལ་དུས་ཆེན་གྱི་རྟེན་འབྲེལ་དང་སྨོན་འདུན་བཟང་པོ་ཞུ་རྒྱུ་ཡིན།
བོད་ཞི་བས་བཅིངས་འགྲོལ་བཏང་བ་དེ་ཐོག་ནས་ཏང་ཀྲུང་དབྱང་གིས་བོད་མི་དམངས་ལ་ཐུགས་འཁུར་ཆེན་པོ་གནང་ལུགས་དང་།རྒྱལ་ཡོངས་མི་དམངས་དང་བོད་ཀྱི་མི་རིགས་ཁག་གི་མི་དམངས་དབར་གྱི་ཤ་ཁྲག་ལྟ་བུའི་བརྩེ་དུང་།བོད་འདི་ཉིད་ནི་མེས་རྒྱལ་ཁྱིམ་ཚང་ཆེ་མོའི་ནང་གི་ཁ་འབྲལ་དུ་མི་རུང་བའི་ཆ་ཤས་ཡིན་པ་བཅས་མཚོན་ཡོད།
བོད་ཞི་བས་བཅིངས་འགྲོལ་བཏང་ནས་ལོ་ངོ60ཡི་རིང་ཀྲུང་གོ་གུང་ཁྲན་ཏང་གི་ཡང་དག་གི་འགོ་ཁྲིད་འོག་དཔལ་འབྱོར་དང་སྤྱི་ཚོགས་ཐད་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བ་དང་སྐྱེ་བོ་ཀུན་གྱིས་དོ་སྣང་བྱེད་པའི་རླབས་ཆེན་གྲུབ་འབྲས་ཐོབ་ཡོད།དེང་དུས་ཀྱི་བོད་དུ་སྤྱི་ཚོགས་མཐུན་སྦྱོར་དང་བརྟན་རླིང་ལྡན་པ་དང་།མི་དམངས་བདེ་སྡོད་ལས་བརྩོན།ཏང་གི་མི་རིགས་ཆོས་ལུགས་སྲིད་ཇུས་སེམས་ལ་ཟབ་མོ་ཟུག་ནས་ཆོས་དད་རང་མོས་ལ་བརྩི་འཇོག་གང་ལེགས་ཐོབ་ཡོད།ལག་ལེན་ལས་ཀྲུང་གོ་གུང་ཁྲན་ཏང་གི་འགོ་ཁྲིད་འོག་མེས་རྒྱལ་ཁྱིམ་ཚང་ཆེ་མོའི་པང་དུ་ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་འཕེལ་རྒྱས་ཀྱི་ལམ་བུའི་ཐོག་བསྐྱོད་ཚེ་བོད་འདི་ཉིད་ལ་གཞི་ནས་དར་རྒྱས་ཡར་ཐོན་གྱི་དེང་དུས་དང་སྔར་བས་མཛེས་སྡུག་ལྡན་པའི་འབྱུང་འགྱུར་ཡོང་སྲིད་པ་ར་སྤྲོད་བྱུང་ཡོད།  དར་རྒྱས་ཆེ་བའི་དུས་དེར་བོད་བརྒྱུད་ནང་བསྟན་སྐྱོན་བྲལ་ངང་འཕེལ་རྒྱས་འགྲོ་བར་མདུན་ལམ་བཟང་པོ་ལྡན་ཡོད།རྒྱ་ཆེའི་བོད་བརྒྱུད་ནང་བསྟན་ལས་རིགས་ཀྱི་མི་སྣས་ཀྲུང་གོ་གུང་ཁྲན་ཏང་གི་འགོ་ཁྲིད་ལ་བརྩི་སྲུང་ཞུ་བ་དང་རྒྱལ་གཅེས་ཀྱི་བརྩེ་དུང་ཟབ་མོ་བཅངས་ནས་མི་རིགས་མཐུན་སྒྲིལ་སྲུང་སྐྱོང་དང་ཁ་ཕྲལ་རིང་ལུགས་ལ་ངོ་རྒོལ་བྱས་ཏེ་ཀྲུང་ཧྭ་མི་རིགས་སྟོབས་འབྱོར་མངའ་ཐང་ལྡན་པ་ཞིག་ཡོང་ཕྱིར་ལྷག་བསམ་ཟོལ་མེད་ངང་སྨོན་ལམ་འདེབས་དགོས།སེམས་ཁམས་དྭངས་གཙང་ཡོང་བ་བྱེད་པ་དང་སྐྱེ་བོ་ཀུན་ལ་བྱམས་སྙིང་རྗེ་བཅངས་པའི་འདུ་ཤེས་ཀྱི་ཐོག་ནས་རང་ཉིད་ཀྱི་ཤེས་རྒྱ་ཆེ་རུ་གཏོང་བ་དང་འབད་བརྩོན་ཆེན་པོས་སྤྱི་ཚོགས་ལ་ཞབས་འདེབས་ཞུ་བ་དང་མི་དམངས་ལ་བདེ་བ་སྐྲུན་དགོས།དགེ་བ་ཕུན་སུམ་ཚོགས་པར་བྱེད་པའི་ཆོས་ཀྱི་སྙིང་པོ་རྒྱས་བཤད་གཏིང་ཟབ་བྱེད་པ་དང་བོད་བརྒྱུད་ནང་བསྟན་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམས་པ་བྱ་རྒྱུར་སྐུལ་འདེད་བཏང་སྟེ་རྒྱ་ཆེའི་ཆོས་དད་མང་ཚོགས་ལ་མཐུན་སྒྲིལ་གྱིས་བདེ་སྐྱིད་ལྡན་པའི་ཁྱིམ་གཞིར་ཧུར་ཐག་བསྐྲུན་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་ཕྱིར་ལེགས་སྐྱེས་ཧུར་ཐག་འབུལ་དགོས།
རླབས་ཆེན་མེས་རྒྱལ་སྟོབས་འབྱོར་མངའ་ཐང་ལྡན་པའི་སྨོན་འདུན་ཞུ།
བོད་ཀྱི་མི་རིགས་ཁག་གི་མི་དམངས་བཀྲ་ཤིས་བདེ་སྐྱིད་ཡོང་བའི་སྨོན་འདུན་ཞུ།
བཀྲ་ཤིས་བདེ་ལེགས།