བོད་ལ་འབྲེང་ཟམ་དང་།སྦ་ཟམ་དང་།ལྕགས་ཟམ་དང་།ཤིང་ཟམ་དང་།འགྲུལ་སྒ་སོགས་ཟམ་པ་འཛུགས་པའི་ལག་ཤེས་མང་ཙམ་ཡོད་པ་ལས།བོད་ཀྱི་ཤིང་ཟམ་འཛུགས་ན།ཐོག་མར་ཟམ་པ་འཛུགས་པའི་ས་བརྟག་དགོས་ཏེ།ཟམ་པ་འཛུགས་ཡུལ་ནི།ཆུ་བོའི་རབ་དོགས་པས་ཟམ་ཐག་ཐུང་བ་དང་།ཕྱོགས་གཉིས་མཐོ་བས་དབྱར་གྱི་ཆུ་ཅི་ཙམ་རྒྱས་ཀྱང་ཟམ་པ་ཆུས་ཁྱེར་བའི་འཇིགས་པ་མེད་པ།
ལམ་གྱི་འདུས་མདོར་གྱུར་པས་འགྲུལ་བདེ་བ།ལུང་སྒོ་དང་རི་ཉིལ་བའི་ས་མིན་པས་དབྱར་གྱི་ཆར་སྐབས་སུ་རི་ཉིལ་དང་ཆུ་རུད་སོགས་ཀྱིས་གནོད་པ་མེད་པ་དང་།ཟམ་རྨང་འཛུགས་ས་བྲག་རྡོ་ལས་གྲུབ་པས་སྲ་ཞིང་ཡུན་དུ་གནས་ཐུབ་པའི་ས་བཅས་དགོས་སོ།། དེའང་ལྷག་པར་དུ་གཟབ་དགོས་པ་ཞིག་ནི།ཟམ་པ་རིགས་གང་ཞིག་འཛུགས་
ཀྱང་ཟམ་པ་འཛུགས་པའི་དུས་ཚིགས་ནི་དགུན་ཁའི་ཆུ་ཉུང་དུས་སྟེ།དབྱར་ཆུ་རྒྱས་དུས་ཆུས་ནུབ་ཚན་དང་།སའི་འཁོར་ཕྱོགས་ཀྱི་དབང་གིས་དབྱར་གྱི་ཆུ་ཤུགས་ཆེ་ས་སོགས་ལ་དབྱར་དགུན་ལ་འགྱུར་བ་ཆེན་པོ་ཡོང་སྲིད་བས།དགུན་ཁར་ཟམ་པ་འཛུགས་པ་དེ་འཐུས་པ་ལྟར་སྣང་ཡང་དབྱར་ཆུ་རྒྱས་དུས་ཚུལ་གཞན་ཞིག་ཏུ་འགྱུར་ནས་ཟམ་པ་འཇིག་པ་མང་བས་ན།ཟམ་པའི་ལས་དཔོན་ནམ་འཆར་གཞི་འགོད་མཁན་དེ་ཡུལ་དེའི་ཆུ་དང་ས་ལ་རྒྱུས་ཆེ་བ་དང་།ཡང་ན་ཟམ་པ་མང་པོའི་ལས་དཔོན་བྱེད་མྱོང་བའི་ཉམས་མྱོང་ཕུན་སུམ་ཚོགས་པ་ཡོད་མཁན་ཞིག་གལ་ཆེའོ།།
 ཟམ་པ་དངོས་སུ་འཛུགས་པ་ལ།ཟམ་པ་འཛུགས་ཡུལ་ལེགས་པར་བརྟགས་ཏེ་གཏན་འཁེལ་བྱས་རྗེས།ཟམ་པ་བཟོ་བ་ལ་སྟ་གོན་དུ་ཤིང་དང་རྡོ་གསོག་དགོས་ཏེ།ཤིང་ལའང་མགོ་སྔས་ཞེས་བཅད་ངོས་ཀྱི་སྦོམ་ཕྲ་མཐོ་གང་ཕྱེད་ཡས་མས་དང་།རིང་ཐུང་འདོམ་གང་ཕྱེ་ཙམ་ཡོད་པའི་ཤིང་གི་སྡོང་དུམ་མང་པོ་དང་།སྣ་བུག་ཅེས་བཅས་ངོས་སྦོམ་ཕྲ་སོར་ལྔ་དང་རིང་ཐུང་འདོམ་དོ་ཕྱེད་ཙམ་རེ་ཡོད་པ་མང་པོ་དང་།དེ་ནས་གླང་ཆེན་མཆེ་བ་ཞེས་རིང་ཐུང་རབ་འབྲིང་ཐ་གསུམ་ལ་སྦོམ་ཕྲ་མཐོ་གསུམ་ཙམ་རེ་ཡོད་པ་དྲུག་ཅུ་ཡན་ཆད།དེ་ནས་མགྱོགས་རིང་ཞེས་ཤིང་སྡོང་ལ་འཁྱོག་མེད་ཅིང་སྦོམ་ལ་དྲང་ལ་དཀྱིལ་ཟམ་དང་མཐུད་ཟམ་གྱི་ཟམ་ཐག་རིང་ཐུང་ལ་གཞིས་པའི་ཟམ་ངོས་ཀྱི་གཞི་ཤིང་རིང་པོ་དཀྱིལ་ཟམ་ལ་འགྱོགས་རིང་ལྔ།ཟམ་ཆུང་དང་ཟམ་ཆེན་བར་གྱི་འགྱོགས་ཐུང་བཅུ་ཙམ་སྟེ།འདི་ནི་ཟམ་ངོས་ཡོ་འཁྱམ་མི་འགྲོ་བའི་འགག་རྩ་འདི་ལ་ཐུག་པས་ཤིང་གི་རྒྱུ་སྤུས་བཟང་པོ་གལ་ཆེ་ལ།གཞན་ཡང་ཟམ་ཁང་ཞེས་ཟམ་ཆེན་གྱི་ཕྱོགས་གཉིས་སུ་ཟམ་སྲུང་སྡོད་ཁང་བཟོ་བའི་རྒྱུ་ཆ་དང་།སྣ་བུག་འཛིན་བྱེད་ཀྱི་སྣ་གཟེར།ཟམ་པའི་བགྲོད་ལམ་ཤིང་གཅལ་མཐའ་རྭ་བཟོ་བ་སོགས་ཤིང་གི་རྒྱུ་ཆ་འདང་ངེས་དང་།རྡོ་ནི་ཟམ་པ་མཇུག་མ་རྫོགས་ཀྱི་བར་དུ་མི་བརྒྱ་ཕྲག་ཡན་གྱིས་དབོར་ནས་ཟམ་ཁང་ཐམས་ཅད་དགང་དགོས་པས་དུས་གཅིག་ལ་གསོག་མི་ཚར་བས་ཐོག་མཐའ་བར་གསུམ་དུ་བསྒྲུབ་བྱ་ཞིག་ཡིན། གོང་གི་སྟ་གོན་གྲུབ་པ་དང་ཟམ་པ་འཛུགས་པའི་འགོ་བརྩམ་ཆོག་སྟེ།དཔེར་ན།འབྲི་ཆུ་སྟོད་དང་།རྫ་ཆུ།རྒྱལ་མོ་རྔུལ་ཆུ་ལྟ་བའི་ཆུ་བོ་ཆེན་པོ་རིགས་ནི་ཆུ་རྒྱ་ཆེ་བས་ཟམ་ཐག་རིང་བ་དང་།ཟམ་ཆེ་ཆུང་བཞི།ཆུ་གཤགས་གཉིས་ཟམ་སྲུང་ཁང་དང་བཅས་བཟོ་བ་ནི་བཟོ་སྐྲུན་རྒྱ་ཆེན་པོ་ཞིག་སྟེ།མི་སྟོང་ཚོ་འགས་དགུན་ཟླ་བ་གཉིས་ནས་གསུམ་བར་བཟོ་དགོས་ཏེ།ཤིང་མཁན་རྣམས་ཀྱིས་ལག་ཆ་སྟ་རེ་དང་།སོག་ལེ།གཟོང་།དགྲ་སྟ་སོགས་བཟུང་ནས།ཤིང་གི་མགོ་སྔས་དང་།སྣ་བུག སྔས་གཟེར་བཟོ་བ་དང་།འཕྲེད་དྲས་ཤིང་ལེབ་འདྲ་བ་དང་།མི་མང་གིས་རྡོ་དབོར་བ།རྩིག་དཔོན་གྱི་བཀོད་འདོམས་ལྟར་རྩིག་མཁན་རྣམས་ཀྱིས་རྡོ་དང་།ཤིང་སྔས།སྣ་བུག་བཅས་ཀྱིས་བརྩིགས་ཤིང་རྡོ་རྩབ་དང་ཤིང་གཟེར་རྒྱག་ཞོར་དུ་རྩིག་པ།དབྱར་ཆུ་ཆེ་རྒྱས་དུས་ཆུ་རླབས་ཀྱི་སླེབ་ཚད་ལས་འདོམ་གསུམ་ཙམ་འཕགས་པའི་མཚམས་ནས་མཆེ་བ་རིམ་པ་དང་པོ་བཏང་།དེའི་སྟེང་མཇུག་ཕྱོགས་ཀྱི་ཕྲེང་དུ་སྔས་རིམ་པ་གཉིས་ཀྱི་སྟེང་ནས་རིམ་གཉིས་དང་།དེའི་སྟེང་ནས་རིམ་པ་གསུམ་སྟེ་འོག་ནས་གོང་གི་རིམ་པར་འདོམ་གང་རེ་གང་རེ་ཆུ་གཞུང་གི་ཕྱོགས་སུ་ཇེ་རིང་དུ་འགྲོ་བའི་ཚད་དུ་བྱས་ཏེ་བཏང་བར་ཟམ་ལ་ཅི་ཙམ་ཕྱིར་ཐོན་དགོས་པ་སོགས་ཆུ་རྒྱ་ཆེ་ཆུང་ལ་གཞིགས་ནས་ལས་དཔོན་གྱི་བཀོད་པ་ལྟར་ཏེ།འདི་ལ་འགའ་རེས་དཔུང་རིང་དཔུང་ཐུང་ཞེས་ཀྱང་འབོད་དོ།།ཟམ་རྟེན་ཆུང་བ་དང་ཟམ་རྟེན་ཆེ་བའི་བར་གྱི་འགྱོགས་ཤིང་རིང་ཐུང་སྣེ་ཟམ་གྱི་ཟམ་ཐག་དང་བསྟུན་ཐོག །ཟམ་རྟེན་ཆུང་བ་ལ་མཆེ་བ་རིམ་པ་གཅིག་ལས་མི་དགོས། དེ་ནས་དཀྱིལ་ཟམ་གྱི་འགྱོགས་སོགས་འདྲེན་བདེ་བའི་ཆེད་དུ་ཟམ་རྟེན་ཆུང་བ་ནས་ཟམ་རྟེན་ཆེ་བ་བར་གྱི་མཆེ་བ་འགྱོགས་བཅས་བརྟན་པོར་གྲུབ་པ་དང་།དེའི་ཐོག་ནས་དཀྱིལ་ཟམ་གྱི་འགྱོགས་ལ་མི་མང་གིས་ཐག་པ་བཏགས་ནས་དྲུད་དེ་ཟམ་རྟེན་ཆེ་བའི་མཆེ་བ་ཐོག་སླེབས་འཕྲལ་འབྲེང་པའི་སྣེ་ལ་རྡོ་བཏགས་ནས་ཆུ་ཕར་ཁའི་མཆེ་བའི་ཐོག་ཏུ་འཕངས་ཏེ་ཕྱོགས་གཉིས་ནས་ཕོ་སར་མང་པོས།ཀི་སོ་ཧོ་གསུམ་གྱི་འུར་སྒྲ་དང་བཅས་འགྱོགས་གཅིག་འཐེན་ཐུབ་པ་དང་།ཕོ་སར་ཀླད་བཟང་པོ་ཚོས་འགྲན་སྡུར་གྱིས་འཐན་མ་ཐག་པའི་འགྱོགས་ཐོག་ནས་རང་སྡེའི་ཕྱོགས་སུ་སྔོན་མར་སུ་ཐོན་བལྟ་ཞིང་།སྔོན་མ་སུ་ཐོན་པ་དེ་ལ་ཁ་བཏགས་དང་གཏང་རག་གཏོང་།ཐོག་མར་སླེབས་ཕྱོགས་དེ་ལ་གཡང་དང་བཀྲ་ཤིས་འབྱུང་པའི་རྟེན་འབྲེལ་དུ་བརྩི་བས་ལ་རྒྱ་ཆེན་པོ་རྩོད་པ་ཡིན། འགྱོགས་འཐེན་པ་དེ་ནི་ཆུར་ལྷུང་ཉེན་སོགས་ཉེན་ཁ་ཆེ་ཞིང་ཟམ་ལས་ཀྱི་འགག་རྩ་ཡིན་པས་གལ་ཆེན་པོ་ཞིག་ཏུ་བརྩིས་ཏེ།གཟའ་སྐར་འཕྲོད་སྦྱོར་དགེ་བའི་ཉིན་མོར་བསང་དང་གསོལ་ཀ་སོགས་རྒྱས་པ་དགོས་ལ།འགྱོགས་འཐེན་ཐུབ་པ་དང་བཟའ་བཏུང་རྩེད་མོ་སོགས་དགའ་སྟོན་ལ་རོལ་བ་ཡིན།