བོད་ཀྱི་གྲུ་དང་གཟིངས་བཟོ་ཐབས།
བོད་ཀྱི་ལག་ཤེས་ཀུན་འདུས་ཆེན་མོ། 2011-01-21
གྲུ་དང་གཟིངས་ནི།བསམ་ཡས་ཀྱི་ལྡེབས་རིས་སོགས་ལས་བྱུང་བར་བརྟགས་ན།ཆེས་སྔ་མོ་ཞིག་ནས་འབྲི་ཆུ་དང་།རྨ་ཆུ།རྫ་ཆུ།རྒྱལ་མོ་དངུལ་ཆུ།ཡར་ཀླུང་གཙང་པོ་སོགས་ཆུ་བོ་ཆེན་པོའི་ཁར་གནས་པའི་བོད་ཁུལ་ལ་ཕན་པ་ཆེ་བའི་འགྲིམ་འགྲུལ་གྱི་སྤྱོད་ཆས་ཤིན་ཏུ་སྣང་ལ།
གྲུའི་རྒྱུ་ཆ་ལ།ཤིང་ལས་བཟོས་པའི་གྲུ་དང་།ཀོ་བ་ལས་བཟོས་པའི་གླུ།ཤིང་སྡོང་ཕྲ་བ་ལས་བཟོས་པའི་གཟིངས།གྲུ་ཤན་ཞེས་ཆུ་བོ་ཆེན་པོར་གཏོང་བྱེད་ཀྱི་གྲུ་ཆེན་རིགས་བཅས་དུ་མ་ཞིག་ཡོད། ཤིང་གྲུ་ཆེ་བའི་རིགས་ལ་གྲུ་ཤན་རྟ་མགོ་མ་ཞེས།དེའང་སྔ་རྗེས་བར་གསུམ་དུ་དབྱིབས་མི་འདྲ་བ་གསུམ་བྱུང་བར་བཤད་དེ།དང་པོར་དབྱིབས་གྲུ་བཞི་མདུན་ངོས་སུ་ཤིལ་ལས་བརྐོས་པའི་རྟ་མགོ་ཆེན་པོ་ཁ་མདུན་དུ་ཕྱོགས་པ།རྟ་མགོ་ལ་རླུང་རྟ་དང་ཁ་བཏགས་སོགས་ཀྱིས་བརྒྱན་པ།གྲུ་ཁོག་ཤིང་སྡོང་གྲུ་བཞིར་གཞོག་པའི་བཞི་ལིང་ཤིང་ཤ་སྟག་ལས་གྲུབ་པ།མཐའ་བཞིར་གྱེན་དུ་བསླངས་པའི་ཤིང་བཞི་ལིང་གི་ར་བ་དང་བཅས་པ།ར་བའི་ཕྱི་ནང་དུ་ལྕགས་ལེབ་ལས་བཟོས་པའི་གཡུང་དྲུང་དང་།རྡོ་རྗེ།སེང་གེ།རྟ་མཆོག གླང་ཆེན་སོགས་བརྟན་ཅིང་འགྱུར་བ་མེད་པ་དང་།མགྱོགས་པའི་ཤུགས་དང་ལུས་ཀྱི་རྩལ་དང་སྟོབས་ལ་སོགས་མཚོན་བྱེད་ཀྱི་བཀྲ་ཤིས་རྟེན་འབྲེལ་རི་མོས་རྒྱན་སྤྲས་པ།ལོགས་ཀྱི་རྒྱབ་ཕྱོགས་འགྲུལ་པ་བཞུད་པའི་སྒོ་ཆུང་ཡོད་པ།གྲུ་མཇུག་ཏུ་སྟེགས་བུ་ཕྲེད་དུ་བཀོད་པའི་སྟེང་གྲུ་པ་ཤེད་ཆེན་གཉིས་ཀྱིས་སྐྱ་བ་བཟུང་ནས་གྲུ་གཏོང་བའོ།།
དེ་ནས་གོང་གི་གྲུ་དེ་དབྱིབས་གྲུ་བཞི་ཡིན་པའི་རྐྱེན་གྱིས་གྲུ་མགོས་ཆུ་གཤག་རྒྱ་ཆེ་སྟབས་ཆུར་བགྲོད་པ་དལ་བ་དང་།ཁ་སྐོར་མི་བདེ་བ།ཆུའི་ཤུགས་ཀྱིས་སྒྲིབ་ཆེ་བ་བཅས་ཀྱིས་ལེགས་བཅོས་ལན་གཅིག་བཏང་སྟེ།རྒྱུ་དང་བཀོད་པ་གོང་དང་ཕྱོགས་མཚུངས་པ་དབྱིབས་གྲུ་བཞི་ནར་མོ་ཅན་དུ་བསྒྱུར་ཅིང་རླུང་གཡོར་དུ་ཤིང་གི་རྒྱབ་ཡོལ་མཐོན་པོ་སྤྲས།གྲུ་པའི་སྟེགས་བུ་ཏེ་གྲུ་མགོའི་ཕྱོགས་གཉིས་སུ་སྤོས།འགྲུལ་སྒོ་མདུན་གཡོན་ལོགས་སུ་བཀོད་ལ་མི་སུམ་ཅུ་ཙམ་རེ་ཤོང་བའི་གྲུ་ཤན་གྱི་དཔེ་དབྱིབས་གཉིས་པ་དེ་བྱུང་། དེ་ནས་ཡང་གྲུ་ཤན་ཡུན་རིང་བཏང་བའི་ཉམས་མྱོང་ལས།གྲུ་གོང་གི་གྲུ་ཤན་