བོད་ཀྱི་གུར་ལ།གུར་མོ་ཆེ་དང་།གུར་ཆར་ཁེབས་ཅན་དང་།གུར་ཟུར་བརྒྱད་ན།གུར་མགོ་ནག འགྲུལ་གུར།བསིལ་གཡབ་སོགས་རིགས་མང་པོ་ཡོད་པ་ལས།
བོད་ཀྱི་རས་གུར་བཟོ་བའི་རྒྱུ་ནི།རས་དཀར་མཐུག་པོས་རྒྱུ་བྱས་ཐོག རས་ནག་པོའི་པ་ཏྲ་དང་།མཐའ་ཤད།དུང་ཕྲེང་།དར་ཕྲུག་དམར་སྔོན་གྱི་འཕུར་མ།འབྲི་དང་གཡག་གི་རྔ་རྩིད་དཀར་ནག་གི་ཆོན་ཐག །ཤིང་གི་ཀ་ར་དང་ཕུར་པ་གདུང་ཤིང་།ཆ་རུ།རྩིད་པ་དམར་པོའི་ཆོན་ཐག་འཕན་བཅས་ཏེ།རྒྱུའི་དགོས་ཚད་ནི་རས་གུར་ཆེ་ཆུང་ལ་གཞིགས་ནས་བཟོ་བོའི་ཉམས་མྱོང་ལས་ཤེས་དགོས།
བཟོ་ཐབས།གུར་མོ་ཆེ་མི་སྟོང་ཚོ་འགའ་ཤོངས་པའི་དགོན་པའི་འཚོགས་གུར་ཆེན་མོ་ཞིག་བཟོ་ན།རྒྱུ་ཆ་གོང་གི་སྟེང་དུ་རབ་ན་འགོ་སྣམ་སྲབ་ལ་རྒྱུ་སྤུས་བཟང་པོ་ཚོས་ལད་སླ་བའི་སྐྱོན་མི་འབྱུང་བ་སེར་མཐིང་དམར་ལྗང་སྣ་འཛོམས།ཟུར་སྐུད་སྦོམ་པོ་སོགས་གུར་མོ་ཆེའི་ཙི་པ་ཏྲ་ཚོན་ལྡན་དང་།ནོར་བུ་དང་།པད་མ་དང་གཡུང་དྲུང་ལག་བསླ་སོགས་བཟོ་བའི་རྒྱུ་དང་།རི་མོ་ཕྱི་ནང་ནས་འཐེན་བྱེད་ཀྱི་ཟུར་སྐུད།གདུང་ཤིང་སྟེང་དུ་ཟང་གསེར་གཉྫུ་ར་དང་ཡང་ན་རི་དྭགས་ཆོས་འཁོར།གུར་གྱི་ནང་ཤ་ཡོད་མེད་སྣ་ཚོགས་ཡོད་ཀྱང་གུར་མོ་ཆེ་ལ་མེད་ན་བཟང་ཞེས་གླེང་བས་གང་འདོད། འདི་ལ་པ་ཏྲ་རིགས་ཀྱི་ཚོན་གོས་ཆེན་གྱི་རིགས་ལས་བྱེད་པ་དང་རས་ལས་བྱེད་པ་སྣ་ཚོགས་སྣང་བས།གང་ལྟར་ཡང་ཚོན་ལད་གུར་གྱི་གཞི་རྫོད་ཉེན་པ་ཏྲའི་མདོག་ཤོར་ཉེན་ཡོང་པས་པ་ཏྲ་བཟོ་བའི་རྒྱུ་དང་ནང་ཤ་བཅས་རྒྱུ་བཟང་ཚོས་ལེགས་པ་ཞིག་གལ་ཆེ།
གུར་མོ་ཆེ་དངོས་སུ་དྲུབ་པ།བཟོ་དང་བཀོད་པ་ལ་མཁས་ཤིང་གུར་དྲུབ་པའི་ཉམས་མྱོང་ཕུན་སུམ་ཚོགས་པའི་བཟོ་དཔོན་ཞིག་དང་།པ་ཏྲའི་རི་མོ་མཁས་པའི་རི་མོ་པ།བཟོ་དྲུབ་ལ་མཁས་པའི་བཟོ་བོ་དུ་མ།ཆོན་ཐག་གི་རྩིད་སྐུད་འཁེལ་མཁན་བཅས་བཅུ་ཕྲག་ལ་རྒལ་བ་ཞིག་དགོས། དེ་ལྟར་རྒྱུ་ཆ་དང་མིའི་ཆ་རྐྱེན་ཕུན་སུམ་ཚོགས་པ་ཞིག་འཛོམས་པ་དང་།དང་པོར་བཟོ་དཔོན་གྱིས་གུར་གྱི་སྟེང་ཁེབས་དྲས་ནས་དྲུབ་པར།གུར་གྱི་རྒྱ་ཁྱོན་དང་།ཕུབ་བདེ་ཞན།དབྱིབས་མཛེས་མིན།ཆར་ཁོག་དང་མི་ཁོག་ཐམས་ཅད་སྟེང་ཁེབས་ལ་རག་ལས་པས།དེའི་དྲ་ལུགས་དྲུབ་ལུགས་ཐམས་ཅད་ལ་ཤེས་བྱ་མང་པོ་ཞིག་ཡོད་དེ།གཅིག་ཏུ་དྲ་ལུགས་ཀྱིས་གུར་ལ་ལྐུག་མེད་པས་ཕུབ་དུས་ཕྱོགས་བཞི་ཟུར་བཞི་ཐམས་ཅད་ཐིག་བཏབས་པ་བཞིན་བརྒྱང་ཐུབ་པ་དང་།གཉིས་སུ་གུར་གྱི་མགོ་བོ་དྲུབ་དུས་བསྡུས་མ་ཐུབ་པས་བྱ་རྒོད་གཤོག་ཆགས་ལྟ་བུ་མི་འབྱུང་བ་དང་།གསུམ་པ།དྲུབ་སྟངས་བྱ་སྤུ་འགེབ་ཀྱི་ཆུ་འགྲོས་ལེགས་པས་ཆར་གྱིས་གནོད་མེད་པ་དང་།བཞི་པ་གུར་གྱི་པ་ཏྲ་ཧ་ཅང་རྒྱས་དྲག་ནས་རྒྱང་མཛེས་མེད་པར་མ་གྱུར་པ་དང་།ལྔ་པ།གུར་གྱི་རི་མོར་ཚོན་ཁྲ་ཅན་གྱི་རི་མོ་ཙི་པ་ཏྲ་དང་།པད་མ་དང་།ནོར་བུ་སོགས་དགོད་མང་ན།གནས་སྐབས་མཛེས་ཀྱང་ཡུན་རིང་ན་ཆུར་རླུང་དང་ཉི་འོད་སོགས་ཀྱིས་ཚོས་བོར་ནས་སྐྱ་བོར་འགྲོ་ཉེན་ཆེ་བས་ཚོན་ཁྲའི་རི་མོ་ཉུང་དུ་གཞུག་པ་དང་།གལ་སྲིད་མང་ཙམ་དགོད་དགོས་བྱུང་ན་ཚོན་མདོག་ཡལ་དཀའ་བའི་རྒྱུ་དང་ཁ་དོག་འགའ་ལས་སེར་པོ་དང་།སྤང་དང་སྐྱའི་རིགས་སོགས་ཁ་དོག་འགྱུར་སླ་བའི་རྒྱུ་མི་སྤྱོད་པ་དང་།དྲུག་པ།གུར་མོ་ཆེའི་མགོ་བོའི་དུས་སུ།དགོན་པའི་འཚོགས་གུར་ཆེན་མོ་ཡིན་ན་ཆོས་སྡེ་སྣོད་གསུམ་གྱི་མཚོན་བྱེད་རི་དྭགས་ཆོས་འཁོར་དང་།སྐྱེས་ཕོ་མོའི་ཚོགས་གུར་ཡིན་ན་ཙི་པ་ཏྲ་དང་ནོར་བུ་མེ་འབར་སོགས་བཀྲ་ཤིས་རྟེན་འབྲེལ་གྱི་རི་མོའི་རིགས་དགོད་དགོས་ལ།དེ་ནི་སྤྱོད་སྒོར་ལེགས་པར་བརྟགས་ཏེ་གང་ལ་གང་འཚམས་པ་སྦྱར་བ་གལ་ཆེ་སྟེ།བོད་ཀྱི་རྒྱན་རིས་ཕལ་ཆེ་བ་ནི་རྟེན་འབྲེལ་གྱི་དོན་སྣ་ཚོགས་མཚོན་བྱེད་ཀྱི་རི་མོ་ཡིན་ལ།རྒྱན་རིས་རི་མོའི་རིགས་ཤིན་ཏུ་མང་བར་དེ་དག་གི་མཚོན་དོན་ཤེས་ན་གདམ་བྱ་ཕུན་སུམ་ཚོགས་པ་ཞིག་ཡོད་པ་ལ།གལ་སྲིད་དེ་མ་ཤེས་པའམ་ཡང་ན་བསམ་མནོ་ཙམ་ཡང་མ་བཏང་ནས་གང་བདེར་བཀོད་ན་དོན་ལྡོག་འབྱུང་སྲིད་པས་ར་མགོ་ལུག་ལ་སྦྱར་བའི་དཔེར་མི་འགྲོ་བར་བྱེད་པ་དང་།བདུན་པ།ཆོན་ཐག་ནི།གུར་གྱི་འཛིན་བྱེད་དེ་རྒྱུ་ཞན་པས་བཟོས་ནས་ཆར་ཆུས་ཡུན་བངས་ནས་རུལ་ཉེན་ཆེ་བས་འབྲི་གཡག་གི་རྔ་རྩིད་དང་མིན་ཀྱང་རྩིད་པ་སྤུས་ལེགས་ཀྱི་ཐག་པར་མཛེས་རྒྱན་དུ་རྩིད་པ་དཀར་པོ་ཚོས་སུ་བཙོས་པའི་རྩིད་འཕན་དམར་པོ་བཏགས་པ་ནི་མཛེས་ཤིང་ཁྱད་ཆོས་ཅན་ཞིག་ཡིན། བརྒྱད་པ།གུར་གྱི་མཐའ་ར་མཐོ་དམན་གུར་ཆེ་ཆུང་ལ་གཞིགས་ནས་བྱ་ལ།གུར་མགོ་ཆེ་ལ་ར་བ་དམའ་ན་མནན་པའི་སྣང་བ་དང་།མགོ་ཆུང་ཞིང་ར་བ་མཐོ་ན་བརྗིད་མེད་ཅིང་རྒྱང་མཛེས་ཆུང་བས་ཆ་ལྡན་གལ་ཆེ།དགུ་པ།གུར་མགོ་དང་པ་ཏྲ་དྲུབ་སྐབས་ངེས་པར་དུ་ཆར་འབབ་པར་བསམ་བློ་བཏང་ནས་མཐའ་ཤན་དང་ཐག་པ་འཐེན་སྐབས་བྱ་སྤུ་འགེབས་ཀྱི་འགྲོས་དང་མཐུན་པ་དང་།པ་ཏྲ་དྲུབ་དུས་མཐའ་ཟུར་ཁབ་ཚུགས་ཀྱིས་མནན་མ་ཐུབ་ན།པ་ཏྲའི་མཚམས་ནས་ཆུ་འཛག་པ་ཡིན་པས་གཟབ་དགོས།བཅུ་པ།གུར་མོ་ཆེའི་སྟེང་དུ་ཟངས་གསེར་གྱི་གཉྫུ་ར་དང་ཡང་ན་འཁོར་ལོ་ནི།དགོན་པའི་འཚོགས་གུར་མ་གཏོགས་པའི་མི་སྐྱ་ཕོ་མོའི་གུར་ལ་འཇོག་སྲོལ་མེད་ལ།དགོན་ཆེན་གྱི་འཚོགས་གུར་ཤིན་ཏུ་རྒྱས་པའི་སྟེང་གི་དབུས་སུ་གཉྫུ་ར་དང་ཕྱོགས་གཉིས་སུ་བྱ་ཤང་ཤང་ཟུར།ཡང་ན་རི་དྭགས་ཆོས་འཁོར།གདུང་ཤིང་སྣེ་གཉིས་སུ་ཁ་ཕྱི་བསྟན་དུ་ཆུ་སྲིན།འབྲིང་པོར་དཀྱིལ་དུ་འཁོར་ལོ་དང་ཡང་ན་གཉྫུ་ར་ཆུང་ཙམ།བསྡུས་པ་ལ་ཟངས་གསེར་གྱི་སྟེང་རྒྱན་མེད་པ་སོགས་ཏེ།སྟེང་རྒྱན་རི་དྭགས་ཆོས་འཁོར་ཡིན་ན།གུར་གྱི་སྟེང་ཁེབས་ཀྱི་པ་ཏྲའི་དབུས་སུ་ཡང་རི་དྭགས་ཆོས་འཁོར་བྲིས་ན་བསྐྱར་ཟློས་སུ་འགྲོ་བས།གཞི་གང་སྟེང་རི་མོ་གང་ཞིག་བྲི་སོགས་ཐོག་མ་ཉིད་ནས་འཆར་གཞི་ཡག་པོ་ཞིག་ཡོད་དགོས་ལ།སྟེང་ཁེབས་ཀྱི་ངོས་ཆུང་ས་གཉིས་སུ་རྣམ་བཅུ་དབང་ལྡན་རེ་བྲིས་ན་གུར་དེ་ས་གང་དུ་ཕུབ་ཀྱང་གནས་དེའི་ས་དགྲ་འགོག་པས་ལེགས་ཅེས་བཤད། གུར་མོ་ཆེའི་རིགས་ལ་ནང་ཤ་མེད་ན་དྭངས་པས་བཟང་ལ།སྟེང་ཁེབས་ཀྱི་མཐར་དུང་ཕྲེང་དང་འཕུར་མ་རིམ་པ་གཉིས་སམ་རྒྱས་པ་ལ་འཇའ་རིམ་པ་དང་བཅས་པའོ།