གཞན་ཡང་རས་གུར་གྱི་རིགས་མང་སྟེ།གཟིམ་གུར་ནི་བླ་ཆེན་དང་དཔོན་པོ་སོགས་ཡུལ་གཞན་དུ་འགྲོ་བ་དང་ཡང་ན་དབྱར་སྐྱིད་སོགས་ཀྱི་སྐབས་དབུབ་བྱ་མི་བཞི་ལྔ་ཙམ་ལས་མི་ཤོང་ལ་པ་ཏྲ་རྒྱན་རིས་དང་བཟོད་བཀོད་ཕུལ་དུ་བྱུང་ཞིང་།རྒྱུ་དང་དྲུབ་སྟངས་སྤུས་ཀ་ཅན་ཞིག་སྟེ།དེབ་འདིའི་པར་རིས་སུ་བཀོད་པའི་རྒྱལ་དབང་ལྔ་པའི་གཟིམ་གུར་ལྟ་བུའོ།།
རེ་འགའ་གུར་དེ་ཉལ་ས་ཙམ་མ་ཡིན་པར་ནང་དུ་དཀྱིལ་འཁོར་བསྡུས་པ་རེ་བཤམས་ནས་བླ་གྲྭ་བཞི་ལྔ་རེས་སྒྲུབ་པ་འདོན་བཞིན་ཡོད་པའང་མཐོང་།
མི་སྐྱ་ཕོ་མོ་འདུས་སའི་གུར་མོ་ཆེ་ནི།སྤྱིར་གོང་སྨྲོས་ཀྱི་གུར་མོ་ཆེ་དང་ཕྱོགས་མཚུངས་ལ།གསེར་ཏོག་དང་རི་དྭགས་ཆོས་འཁོར་སོགས་ཀྱི་སྟེང་རྒྱན་མེད་ལ།སྟེང་ཁེབས་ཀྱི་དཀྱིལ་དུ་ནོར་བུ་མེ་འབར་དང་།རྣམ་བཅུ་དབང་ལྡན།ཙི་པ་ཏྲ་སོགས་དང་།མཐའ་ར་ལ་ནོར་བུ་ཆ་བདུན་སོགས་ཀྱིས་མཛེས་པར་བྱེད།
 གུར་ཟུར་བརྒྱད་པ་ནི།སྟེང་དུ་གདུགས་ལྟ་བུའི་ཆར་ཁེབས་དུང་ཕྲེང་འཕུར་མ་དང་བཅས་པ།དེའི་འོག་ཏུ་གུར་དྲིལ་མདོང་གི་དབྱིབས་དང་འདྲ་བར་ངོས་བརྒྱད་དུ་བགོད་པར་རྟགས་བརྒྱད་དང་རྫས་བརྒྱད་སོགས་ཀྱི་པ་ཏྲས་མཛེས་ཤིང་ལོགས་རེའི་མཐའ་ནས་རས་ནག་གི་ཤན་ཆ་ཅན།སྟེང་ཁེབས་ནི་གུར་གྱི་སྟེང་ཁེབས་ལས་ཅུང་ཟད་ཆེ་བས་སྟེང་དུ་ཞྭ་ལྟར་ལྡིང་བ་སྟེ་ཕལ་ཆེར་རས་ཁྲ་སྐྱ་མདོག་ཅན་མེ་ཏོག་ཆུང་ཆུང་ཅན་གྱི་ནང་ཤ་ཡོད་མོད།གུར་སྒོ་ནི་ལོགས་བརྒྱད་ཀྱི་ངོས་གང་ཞིག་ཕྱེས་ནའང་ཆོག་ལ།ཆར་ཁེབས་ཅན་གུར་གྲུ་བཞི་སོགས་ལའང་ཡོད་དེ་དབྱིབས་དང་འཕུར་མ་ཡོད་མེད་ཀྱང་སྣ་ཚོགས་འབྱུང་ངོ་།།
གུར་མགོ་ནག་ནི།སྟེང་ཁེབས་རེ་ལྡེ་ལས་བཟོས་ཤིང་སྟེང་གི་དཀྱིལ་དུ་མཐོང་གྲུ་བཞི་ལ་རེ་ལྡེའི་ཁེབ་གཅོད་རང་འགྲིག་ཅན།མཐའ་ར་རས་དཀར་ལས་བཟོས་ཤིང་མཛེས་རྒྱན་པ་ཏྲ་སོགས་གང་ཡང་མེད་པ་ཞིག་སྟེ།དེ་ནི་ཕལ་ཆེར་ཐབ་ཚད་དུ་སྤྱད་བྱ་དཀྱིལ་དུ་ཐབ་ཆེན་བཙུགས་པར་མེ་བུས་ནས་ཟས་གཡོ་བ་དང་ཇ་སྐོལ་སྐབས་ཚ་རླངས་དང་དུ་བ་གུར་ཀླད་ཀྱི་མཐོང་ནས་ཕྱིར་འགྲོ་ཞིང་།ཆར་དྲག་པོ་འབབ་ན་ཁེབ་གཅོད་ཀྱིས་དགབ་ཆོག་པ་ཞིག་གོ།། བསིལ་གཡབ་ནི།སྟེང་ཁེབས་ཁོ་ན་ཙམ་གྱིས་གྲུབ་ལ་རྒྱན་རིས་སོགས་གང་མེད་པའི་ཕྱར་བ་ལྟ་བུ།གདུང་ཤིང་གཅིག་དང་ཀ་ར་གཉིས་ཕུར་པ་བཞི་ལས་གཞན་གང་ཡང་མི་དགོས་པའི་རི་ཁར་ལས་ཀར་འགྲོ་བ་དང་།ཁུར་པོ་ཁུར་ནས་ལམ་ཐག་རིང་པོར་འགྲོ་བར་ཁྱེད་བདེ་མི་གཉིས་ཙམ་ཞིག་ཉལ་ན་ཆར་པ་ཁོག་ཙམ་པ་ཞིག་ཡིན་ལ།དེ་མཚུངས་ཀྱི་བཟོ་ཐབས་ཀྱང་སྟབས་བདེ་ཡིན། གུར་ལ་ནང་ཤ་ཡོད་མེད་རང་རང་གི་འདོད་པ་ལྟར་ལ།ནང་ཤ་ལ་སྐྱོན་དང་ཡོན་ཏན་གཉིས་སྣང་བ་ནི།ནང་ཤ་སྦྱར་ན་ཆར་ཟེགས་ཁོག །དྲོ་བ་ལའང་ཅུང་ཟད་ཕན།འོན་ཀྱང་གུར་ཆར་པས་བངས་ནས་སྐེམ་དཀའ།ནང་ཤའི་ཚོས་དང་རྒྱུ་ངན་ན་ཚོས་བོར་བས་རས་དཀར་རྫོད་ཉེན་ཆེ།གུར་མ་སྐམ་ནས་སྟེབས་ན་མཐུག་རྐྱེན་གྱིས་རུལ་སླ།གནམ་གཤིས་ལེགས་དུས་ཀྱི་སྤང་སྟེང་དུ་གུར་ཕུབ་ནས་འདུག་པ་ནི་ཧ་ཅང་སྐྱིད་པོ་ཞིག་ཡིན་མོད་ཀྱང་།ནང་ཤ་ཅན་གྱི་གུར་ནང་དེ་ཙམ་སྣང་བ་མི་དྭངས་བ་སོགས་སོ།། གུར་ལ་ངེས་པར་དུ་ནང་ཤ་སྦྱར་འདོད་ན།དེང་གི་ཆུ་མི་འཐུང་ལ་ཆར་ཁོག་པ།མདོག་ཨེ་ཙམ་ལས་མི་འགྱུར་པ།རྒྱུ་སྲབ་པ་ཕྱི་ནང་ཕལ་ཆེར་མི་སྒྲིབ་ལ་ཉི་མ་ཚ་དུས་དྲི་ངན་མེད་པ་བཟང་ཡང་མཚན་མོའི་ཉལ་གུར་ནི་དེ་ལས་ཁྱད་པར་ཅན་དུ་ཤེས་པར་བྱའོ། བོད་སྔར་ལུགས་ཀྱི་ལག་ཤེས་ལྟར་ན།གུར་གྱི་པ་ཏྲའི་རིགས་ཐམས་ཅད་རས་དང་གོས་ཆེན་སོགས་ལ་དྲས་ནས་ལྷན་དྲུབ་ཀྱི་ཚུལ་དུ་མཐའ་ནང་ཕྱོགས་སྟེབས་ནས་དྲུབ།རི་མོ་ཞིབ་པ་ལ་ཟུར་སྐུད་ཀྱི་བཅད་རིས་ལྟ་བུ་གཏོང་བ་ཡིན་མོད།དེང་སང་མགྱོགས་ཐབས་སུ་རས་དཀར་གྱི་ཚད་གཅིག་མཚུངས་ཀྱི་གུར་མང་པོ་བཟོས་ཐོག་དེང་གི་རྫས་འགྱུར་གྱིས་བཟོས་ལ་ཆར་གྱིས་མི་གནོད་པའི་སྣག་ཚས་པ་ཏྲ་དང་མཐའ་ཤན་བཅས་པར་གྱིས་བཏགས་པ་དང་།ཡང་སྟེང་ཁེབས་བོད་གུར་གྱི་རྣམ་པར་མཐའ་ར་ཤེལ་གྱི་སྐར་བཀྲ་ཅན་ལྕགས་དང་ཡང་ན་འགྱིག་རྒྱུ་ལས་བཟོས་པ་དང་།ཡང་གུར་གྱི་འཛིན་བྱེད་ཐམས་ཅད་ལྕགས་རྒྱུག་གི་སྤྲས་ཀ་ཅན།ཆོན་ཐག་དང་ཕུར་པ་སོགས་གང་ཡང་མི་དགོས་པའི་བོད་གུར་དཔེ་གསར་མང་དུ་ཡོད་ཀྱང་བོད་སྲོལ་རྒྱུན་གྱི་ལག་ཤེས་དངོས་མིན་ཕྱིར་འཕྲོས་ཙམ་དུ་བྲིས་པའོ།། དེ་ཡང་བོད་མ་གཏོགས་ཡུལ་གཞན་ན་མི་སྲིད་པའི་གུར་ཞིག་ཡོད་པ་ནི།གཅན་ཟན་སྟག་གི་ལྤགས་པ་བརྒྱ་ཐམ་པ་ལས་བཟོས་ཤིང་།དབྱིངས་སོག་གུར་དང་ཡང་ན་གོང་དུ་བཤད་པའི་ཟུར་བརྒྱད་མ་དང་ཕྱོགས་མཚུངས་ལ་སྟེང་ཁེབས་དང་མཐའ་ར་གཉིས་ལས་གྲུབ་ཅིང་སྤུ་ཕྱི་ཕྱོགས་སུ་བསྟན་པ།སྟེང་ཁེབས་ཀྱི་ཀླད་དབུས་སུ་ཟངས་གསེར་གྱི་ཏོག་གི་མཛེས་པ།ནང་དུ་འབུ་རས་དཀར་དམར་ཤོ་སྒྲིག་གི་ནང་ཤ་ཅན།སྟེང་ཁེབས་ཀྱི་མཐའ་ནས་སྲམ་ལྤགས་དམར་པོ་དང་།སྲམ་ལྤགས་དཀར་པོ།སྲམ་ལྤགས་ནག་པོ་གསུམ་གྱི་འཇའ་རིས་རིམ་པ་གསུམ།དེའི་མཐར་འཕུར་མའི་དོད་དུ་མགྲོན་བུ་ལས་བཟོས་པའི་དྲ་བ་དྲྭ་ཕྱེད་ཅན།གུར་ཕུབ་དུས་ནང་གི་རུ་ཤིང་དང་ཕྱིའི་ཆོན་ཐག་གཉིས་ཀར་བརྟེན་ནས་ཕུབ་དགོས་པའི་གུར་ཁྱར་པར་བ་ཞིག་སྟེ།དེ་བཟོ་མཁན་ནི་སྔོན་ལི་ཐང་གཡོན་རུ་དཔོན་ཡིན་པར་བཤད་ལ།ད་ལྟར་དཀར་མཛེས་ཁུལ་དངོས་འཛིན་ཁང་དང་ལི་ཐང་བྱམས་ཆེན་ཆོས་འཁོར་གླིང་ཕྱོགས་གཉིས་ནས་བདག་བྱེད་བཞིན་ཡོད་དོ།།
སྤྱིར་སྟག་ལྤགས་གུར་གྱི་བཟོ་རྒྱུན་བོད་དམངས་ཁྲོད་དུ་ཡོད་ཁུངས་མེད་ལ།ཕྱིས་དེ་བས་ཀྱང་འབྱུང་བ་དཀའ་བས་ལག་ཤེས་ཐད་ནས་དགོས་ཆེས་མེད་པ་འདྲ་ཡང་བོད་ཀྱི་ལག་ཤེས་ལས་བྱུང་བའི་དངོས་པོ་ཁྱད་པར་ཅན་ཞིག་ཡིན་ཕྱིར་མདོ་ཙམ་བྲིས་པའོ།།