ཀོ་བའི་ཁ་དོག་སྣ་ཚོགས་ཀྱི་བཟོའི་ལག་རྩལ།བྲང་གཏད་ཅེས་ལྕགས་གྲི་ཟླ་བ་ཕྱེད་པའི་དབྱིབས་ཅན་གྱི་ལྟག་པའི་དབུས་ནས་ཤིང་གི་ཡུ་བ་གོང་དུ་བྲང་ལ་གཏད་བདེ་བའི་ཡར་སྣེ་ཤིང་གི་གདུ་བུ་ཕྱེད་པ་ལྟར་སྤྲས་པ།བཞར་གྲི་ཞེས་ཀོ་སྤུ་བཞར་གྲི་ལྕགས་ཁེམ་གྱི་དབྱིབས་སོ་རྣོ་ཞིང་ཤིང་གི་ཡུ་བ་རིང་པོ་ཅན།ཀོ་འཐེན་ཞེས་དབྱིབས་ཡུར་འཇོར་དང་ཕྱོགས་མཚུངས་ལ་མཆུ་ཅུང་ཟད་གུག་ཅིང་ཡུ་བ་རིང་པོ་ཅན།བཀྲ་བ་ཞེས་ཀོ་སྤུ་རུབ་བྱེད་ཀྱི་ཤིང་གི་སྦར་མོ།ཀོ་ཐབ་ཅེས་ཀོ་བ་དུད་བདུག་བྱ་བའི་ཐབ་ཀ་ཆེ་ཙམ་དང་།ཆུ་རུལ་དོང་དང་རྡོ་ཞོའི་ཆུ་དོང་གཉིས།གཞན་ཡང་མཚུར་དཀར་ནག་དང་ད་ཏྲིག་བསྐོལ་སྣོད་སོ་སོ་མ་འདྲེས་པའི་སྣོད་དང་ཚོས་སྦྱང་སྣོད།ཆུ་རྡོའི་སྐྱི་གཅོད་དང་གྲི་སོགས་སོ།། ཀོ་དཀར་དང་ཀོ་དམར་ཀོ་ནག་དང་ཀོ་ལྗམ་ངམ་སྐྱི་སྔོ་བཟོ་བའི་རྒྱུ་ནི།འབྲི་དང་མཛོ་མོ་གཡག་སོགས་ཀྱི་ཀོ་བ་སྤུས་ལེགས།དཔྱིད་ཀའི་ལྟོགས་ཤི་སོགས་མ་ཡིན་ཞིང་ཚོ་ཀོ་བུག་རྡོལ་དང་ཚིག་གྱོང་མ་ཤོར་བའི་ཀོ་བའི་རིགས་ཏེ།རྟ་སྒྲོའི་ཤན་ཆ་སོགས་ལ་མཁོ་བའི་ཀོ་ལྗང་ནི་ཕལ་ཆེར་ར་ལྤགས་ལས་བཟོ་བ་ཡིན།
གཅིག བཟོ་ཐབས་ལ།རྒྱུ་གང་ཡིན་པའི་ཀོ་བ་དེ་ཆུ་དོང་ནང་དུ་ཉིན་ལྔ་ནས་བརྒྱད་ཀྱི་བར་དུ་སྦངས་རྗེས་བླངས་ནས་རྒལ་བའི་ཤ་བཅད།དེ་ནས་སྤུ་བྱི་བའི་ཐབས་སུ་ཀོ་བའི་སྤུའི་ཕྱོགས་སུ་རྡོ་ཞོ་བྱུགས་སྟེ།ཉིན་བཅུ་ཙམ་སྦངས་མཐར་སྤུ་བྱིད་དང་རྡོ་ཞོ་འདག་ངེས་ཀྱི་བཀྲུ་བཤལ་བྱས་རྗེས།ཡང་བསྐྱར་ཆུ་དོང་དུ་ཉིན་བཞི་ཙམ་སྦངས་ནས་རྒལ་བའི་ཤ་མ་ཡིན་པའི་ཀོ་ཤ་ཐམས་ཅད་བཅད་དེ་ཤིན་ཏུ་གཙང་བར་བཀྲུས་རྗེས།ཀོ་བའི་སྤུ་ངོས་སུ་སྨན་ད་ཏྲིག་གདུས་པའི་ཁུ་བ་སྙོམས་པར་འབྱུག་ཀོ་ཐབ་ཏུ་གྲོ་སོག་དང་།ཡང་ན་མཁན་པས་དུད་བདུག་ཉིན་རེའི་ཐེངས་རེ་བདུག་པ་བརྩིས་ནས་ཉིན་བརྒྱད་ཙམ་གྱི་མཐར་ཡང་བསྐྱར་ཤ་གཅོད་སྐྱ་མཉེ་ཉིན་གཅིག་ཙམ་བྱེད།དེ་ནི་ཀོ་དཀར་སྟེ།ཀོ་དཀར་ཡིན་ན་གཞི་དེས་ཆོག་ལ་ཀོ་བུབས་རེ་ལ་མར་རྒྱ་ཕྱེད་ཙམ་རེའི་སྣུམ་བྱུགས་རྗེས་རྡོག་བརྫིས་ཀྱིས་ཉིན་ཞག་བཞི་ཙམ་མཉེས་པས་གྲུབ་བོ།། གཉིས།ཀོ་དམར་བྱེད་ན།ཀོ་དཀར་གྱི་གཞི་སྟེང་དུ་མཚུར་དཀར་ཁུ་བའི་ནང་རྒྱ་མཚོས་དམར་པོ་བླུགས་ཏེ་ཁོལ་ཙམ་བསྐོལ་བ་དེ་ཀོ་དཀར་གྱི་སྤུ་ཕྱོགས་ཀྱི་ངོས་སུ་ལན་གཉིས་སྙོམས་པར་བྱུགས་ནས་སྐམ་ཐག་ཆོད་པ་དང་།གོང་གི་ཀོ་དཀར་ལྟར་ཀོ་བུབས་རེ་ལ་མར་རྒྱ་ཕྱེད་རེའི་ཚད་དུ་བྱེད་པའི་མར་ཁུ་བྱུགས་རྗེས་རྡོག་བརྫི་ཉིན་བཞི་ཙམ་བཏང་ནས་གྲུབ་ལ།རྡོག་རྫིས་ཀྱིས་མཉེ་ཅི་ཙམ་ཐུབ་ན་ཀོ་མདོག་དང་ཀོ་རྒྱུ་དེ་ཙམ་གྱིས་ལེགས་པས་ཀོ་མཉེ་གནད་སྨིན་གལ་ཆེའོ།།
གསུམ།ཀོ་ནག་བཟོ་ན།ཀོ་དཀར་གྱི་གཞི་སྟེང་དུ་མཚུར་ནག་ཁོ་ན་བསྐོལ་བའི་ཁུ་བ་ལན་གཉིས་ཙམ་བྱུགས་ནས་གྲུབ་ལ།སྐམ་ཟིན་པ་དང་རྡོག་མཉེ་སྣུམ་བྱུག་གོང་ལྟར་རོ།། བཞི།ཀོ་ལྗང་ངམ་སྐྱི་སྔོན་ནི།མཚུར་དཀར་བསྐོལ་བའི་ནང་དུ་རྒྱ་མཚོ་ལྗང་སྐྱའི་རིགས་བླུགས་ནས་བྱུག་སྟངས།སྣུམ་བྱུག རྡོག་མཉེ་ཐམས་ཅད་སྤྱི་ལྟར་ལ།གཟབ་བྱར་རྒྱ་ཚོས་ལྗང་ནག་དང་སྔོ་ནག་སོགས་ཀྱིས་བཟོས་ན་ཁ་དོག་ནག་ཁྲ་ཅན་འབྱུང་བ་དང་།ཀོ་ལྗང་ནི་མཆོད་ཆས་ཀྱི་ཤུབས་དང་།ཀོ་དག།རྟ་སྒའི་ཆ་ལག་གི་ཤན་ཆ་སོགས་ལས།ཌྰ་མ་རུའི་གཡོག་སོགས་ལ་ནི་སྣུམ་བྱུག་དང་རྡོག་མཉེ་སོགས་མི་རུང་ལ།དེའི་རྒྱུ་ཡང་ར་ལྤགས་ལས་བཟོ་དགོས་པ་བཅས་ཏེ་བཟོ་ཐབས་ཚོས་བཙོ་བའི་ས་བཅད་ལས་ཤེས་པར་བྱའོ།།